ZABURU 83:19 bayɛlɛmana cogo di e ka Bibulu kɔnɔ? Bible Senuma (ABU, 1961) be o vɛrise bayɛlɛma ten ko: “Walisa u k’a dɔn ko e min tɔgɔ ko Jehova, ko e kelenpe ye Kɔrɔtalen Ba ye dugukolo bɛɛ kun na.” O vɛrise bayɛlɛmana o cogo ɲɔgɔn na Bibulu dɔ wɛrɛw kɔnɔ fana. Nka Bibulu caaman kɔnɔ, u ye Jehova tɔgɔ falen ni bonyali tɔgɔ dɔw ye i n’a fɔ “Matigi” wala “Masaba.” Mun lo be sɔrɔ o vɛrise nin kɔnɔ tigitigi? Bonyali tɔgɔ, walima tɔgɔ min ko Jehova?

O vɛrise be kumana tɔgɔ dɔ lo koo la. Bibulu fanba sɛbɛra Heburukan fɔcogo kɔrɔ la. O sɛbɛninw kɔnɔ, tɔgɔ dɔ be sɔrɔ min ɲɔgɔn tɛ yen. A be sɛbɛ ko יהוה ( YHWH). Julakan na, u ka teli k’o tɔgɔ sɛbɛ ko “Jehova.” Yala o tɔgɔ nin be sɔrɔ vɛrise kelen dɔrɔn lo la wa? Ayi. Heburukan sɛbɛnin kɔrɔw kɔnɔ, a be sɔrɔ siɲɛ 7 000 ɲɔgɔn!

Mun lo b’a yira ko Ala tɔgɔ kɔrɔtalen lo? A filɛ Yezu Krista ye delili modɛli min di a ka kalandenw ma. A be daminɛ nin cogo la: “An Fa min bɛ sankolo la, i tɔgɔ ka saniya.” (Matiyo 6:9, ABM ). Kɔfɛ, Yezu ye Ala deli ko: “N Faa, i k’i yɛrɛ tɔgɔ boɲa!” K’a to sankolo la, Ala y’a jaabi ko: “Ne y’a boɲa, ne bena tila k’a boɲa tugu.” (Zan 12:28). Tiɲɛn na, Ala tɔgɔ kɔrɔtalen lo kosɔbɛ ka tɛmɛ fɛɛn bɛɛ kan. N’o lo, mun na Bibulu bayɛlɛmabaga dɔw ye bonyali tɔgɔw sɛbɛ o tɔgɔ nɔɔ na u ka Bibuluw kɔnɔ do?

A be komi u y’o kɛ kuun jɔnjɔn fila kosɔn. Fɔlɔ, mɔgɔ caaman b’a fɔ ko Ala tɔgɔ man kan ka fɔ sabu mɔgɔ tɛ a fɔcogo fɔlɔ lɔn tugun bi. Galen, heburukan tun tɛ sɛbɛ ni sigininden dɔw ye i n’a fɔ a, e, i, o, u. O kama, bi, mɔgɔ si tɛ se ka YHWH fɔcogo tigitigi lɔn i n’a fɔ Bibulu sɛbɛwagati la. Nka, yala o ka kan k’an bali ka Ala tɔgɔ fɔ wa? Bibulu sɛbɛwagati la, n’a sɔrɔ Yezu tɔgɔ  tun be fɔ ko Yesuwa walima Yehosuwa. Mɔgɔ si kɔni tɛ se k’a fɔcogo tigitigi lɔn. O bɛɛ n’a ta, bi, mɔgɔw be Yezu tɔgɔ fɔ hali n’a fɔcogo tɛ kelen ye kaan caaman na duniɲa kɔnɔ. Hali n’u t’a lɔn a tun be fɔ cogo min na saan kɛmɛkulu fɔlɔ wagati la, u t’o kɛ kuun ye ka sigasiga k’a fɔ. O cogo kelen na, n’i tagara jamana wɛrɛ la, n’a sɔrɔ i bena a ye ko i tɔgɔ fɔcogo be dan na kaan wɛrɛ la. O cogo kelen na, hali n’an t’a lɔn fɔlɔfɔlɔ mɔgɔw tun be Ala tɔgɔ fɔ cogo min na, o tɛ kuun ye ka ban k’o tɔgɔ fɔ.

Kuun filanan: Mɔgɔw ka teli ka basigi Yahutuw ka landa kɔrɔ-kɔrɔ dɔ kan ka Ala tɔgɔ bɔ Bibulu kɔnɔ. Yahutu caaman b’a jati ko Ala tɔgɔ man kan ka fɔ abada. Nka a gwɛnen lo k’o landa kɔrɔ-kɔrɔ basiginen be Bibulu ka sariya dɔ lo kan u ye min sira tagama a ɲɛɛ jugu kan. O sariya b’a fɔ ko: “Aw kana ne, Masaba [ Jehova, NW ] aw ka Ala tɔgɔ wele gwansan, bari mɔgɔ min be ne tɔgɔ wele gwansan, ne Masaba [ Jehova, NW ] tena o tigi jalakibali to.” (Ekizɔdi 20:7).

O sariya be mɔgɔ bali ka Ala tɔgɔ weele fuu. Nka, yala a be mɔgɔ bali k’o tɔgɔ fɔ ni bonya ye wa? Ayi dɛ! Heburukan Bibulu (“Layidukɔrɔ”) sɛbɛbagaw bɛɛ tun ye mɔgɔ kantigimanw ye minw tun be Sariya sira tagama, Ala ye min di Israɛldenw ma. O bɛɛ n’a ta, u tun ka teli ka baara kɛ ni Ala tɔgɔ ye. Ɲɛyirali fɛ, u y’o tɔgɔ nin sɛbɛ zaburu caaman kɔnɔ jama tun be minw fɔ dɔnkiliw la ni kaanba ye walisa ka Ala bato. Jehova Ala yɛrɛ y’a ɲini a sagokɛlaw fɛ u k’ale tɔgɔ weele ani kantigiw y’a kaan minɛ (Zowɛli 2:32, ABM; Kɛwaliw 2:21). O kama, bi, kerecɛnw tɛ sigasiga ka Ala tɔgɔ fɔ ni bonya ye. Siga t’a la, Yezu tun be o lo kɛ fana.—Zan 17:26.

Bibulu bayɛlɛmabagaw kɛtɔ ka bonyali tɔgɔw sɛbɛ Ala tɔgɔ nɔɔ na, u be kojuguba lo kɛ. U b’a to mɔgɔw k’a miiri ko Ala tɛ mɔgɔ yɛrɛ-yɛrɛ ye ani ko an tɛ se k’an magwɛrɛ a la k’a masɔrɔ Bibulu be adamadenw jija u ka “kɛ Matigi [ Jehova, NW ] teriw ye.” (Zaburuw 25:14, ABM ). I ka miiri i teri sɔbɛ dɔ koo la. Yala aw tun bena kɛ teri sɔbɛw ye tiɲɛn-tiɲɛn na n’i tun t’a tɔgɔ lɔn fewu wa? O cogo kelen na, mɔgɔw be se k’u magwɛrɛ Ala la kosɔbɛ cogo di ni Ala tɔgɔ, Jehova, ma yira u la? Ka fara o kan, mɔgɔ minw tɛ baara kɛ ni Ala tɔgɔ ye, u fana be bɔnɛ sabu u t’a kɔrɔ kabakoman lɔn. Ala tɔgɔ kɔrɔ ko di?

 Ala yɛrɛ ye a tɔgɔ kɔrɔ ɲɛfɔ a sagokɛla kantigiman Musa ye. Musa ye Jehova ɲininga a tɔgɔ la minkɛ, a y’a jaabi ko: “Ne bena kɛ min ye, ne bena kɛ o ye.” (Ekizɔdi 3:14, NW ). Rotherham be o kumaw bayɛlɛma ten angilikan na: “A ka di ne ye ka kɛ fɛɛn min ye, ne bena kɛ o ye.” O b’a yira ko fɛɛn o fɛɛn ka di Jehova ye, a be se ka kɛ o ye walisa a sagonata ka dafa.

I ka miiri k’a filɛ, fɛɛn o fɛɛn ka di i ye n’i tun be se ka kɛ o ye. I tun bena mun kɛ i teriw ye? Ni bana jugu dɔ tun ye u la dɔ minɛ, i tun bena kɛ dɔgɔtɔrɔ ɲuman ye walisa k’a kɛnɛya. Ni u la dɔ wɛrɛ tun bɔnɛna a ka wari la, i tun bena kɛ nafolotigi ɲuman ye k’a dɛmɛ. Nka tiɲɛn na, koo bɛɛ see t’i ye. An si tɛ se ka kɛ fɛɛn bɛɛ ye. Bibulukalan kɛtɔ, i bena kabakoya k’a ye ko Jehova sago kɛli tɛ ɲɛ fɛɛn o fɛɛn kɔ, a b’a yɛrɛ kɛ o ye. Ani, minw b’a kanu, a ka di a ye k’a ka fanga kɛ k’u dɛmɛ (2 Masaw ka loon o loon kibaru 16:9). O ye Jehova ka jogo ɲuman dɔw ye mɔgɔ tɛ se ka minw faamu n’i t’a tɔgɔ lɔn.

Tiɲɛn na, tɔgɔ min ko “Jehova,” a daganen lo o ka kɛ Bibulu kɔnɔ. Nafa b’a la kosɔbɛ an k’o tɔgɔ kɔrɔ lɔn ani an kana sigasiga ka baara kɛ n’a ye an ka batoli la walisa an ka se k’an magwɛrɛ koɲuman an sankolola Faa Jehova la. *