ADZESUA 35
Yebesi Dɛn Esisi Gyinae Pa?
Hɛn nyina wɔ gyinae ahorow bi a ɔsɛ dɛ yesisi wɔ asetsena mu. Dɛm gyinae ahorow yi mu pii botum ama yɛnye Jehovah ntamu ebusuabɔ no aayɛ papa anaa obotum asɛɛ no. Dɛ mfatoho no, ɔwɔ dɛ yesi beebi a yɛpɛ dɛ yɛtsena nye edwuma a yɛbɛyɛ dze ahwɛ hɛnho no ho gyinae. Afei so, sɛ yɛbɔwar o, sɛ yɛronnwar o, ɔsɛ dɛ yesi ho gyinae. Sɛ yesi gyinae pa a, hɛn enyi botum agye wɔ asetsena mu na Jehovah bɛpɛ hɛn asɛm.
1. Ibesi dɛn ama Bible no aboa wo ama eesi gyinae pa?
Sɛ iribesi gyinae bi a, ɔyɛ a dzi kan bɔ Jehovah mpaa dɛ ɔmboa wo, na hwehwɛ n’adwen wɔ dɛm gyinaesi no ho wɔ Bible no mu. (Kenkan Mbɛbusɛm 2:3-6.) Gyinae ahorow no mu bi wɔ hɔ a, Jehovah dze ho akwankyerɛ pɔtsee bi ama. Sɛ isi gyinae dze dɛm akwankyerɛ no yɛ edwuma a, esi gyinae pa.
Naaso, sɛ asɛm pɔtsee biara nnyi Bible no mu a ɔkyerɛ wo gyinae a ɔsɛ dɛ isi a, ebɛyɛ no dɛn? Jehovah bɔboa wo na ɔaakyerɛ wo “ɔkwan a ewɔ dɛ efa do.” (Isaiah 48:17) Obesi dɛn ayɛ dɛm? Ɔama hɛn afotusɛm pii wɔ n’Asɛm Bible no mu a obotum aboa hɛn. Ebɛnadze nye dɛm Bible mu afotusɛm no? Ɔyɛ Bible mu nokwasɛm ahorow bi a ɔma yehu Nyankopɔn n’adwen nye mbrɛ osi tse nka wɔ nsɛm bi ho. Ɔtɔfabi na sɛ yɛkenkan Bible mu asɛm bi a, ɔma yehu Nyankopɔn n’adwen wɔ asɛm bi ho. Sɛ yehu mbrɛ Jehovah si tse nka wɔ nsɛm bi ho a, obotum aboa hɛn ma yeesisi gyinae a ɔsɔ n’enyi.
2. Ebɛn ndzɛmba na ɔsɛ dɛ isusu ho ansaana esi gyinae bi?
Bible se: ‘Ɔbadwembanyi hwɛ ne nantsew yie.’ (Mbɛbusɛm 14:15) Iyi ma yehu dɛ ansaana yebesi gyinae bi no, ɔsɛ dɛ yesie abotar dwendwen dza yɛpɛ dɛ yɛyɛ no ho yie. Adze biara a ebɛpɛ dɛ eyɛ no, ɔyɛ a bisa woho dɛ: ‘Ebɛn Bible mu afotusɛm na ɔfa asɛm yi ho? Dɛm gyinae yi bɛma matse nka dɛn? Sɛ misi dɛm gyinae yi a, ɔbɛka afofor dɛn? Dza ohia paa no, ana ɔbɛma Jehovah n’enyi agye?’—Deuteronomy 32:29.
Jehovah wɔ ho kwan dɛ ɔkyerɛ hɛn dza oye nye dza ɔnnyɛ. Sɛ yehu ne mbra nye n’afotusɛm a ɔwɔ Bible mu no yie, na yɛyɛ dza yebotum biara dzi do a, yebenya tsibowa pa. Ebɛnadze nye tsibowa? Ɔyɛ biribi a ɔma yehu dɛ adze bi a yɛpɛ dɛ yɛyɛ no yɛ papa anaa bɔn. (Romefo 2:14, 15) Sɛ yɛtsetse hɛn tsibowa no yie a, ɔbɔboa hɛn ma yeesi gyinae pa.
PƐNSAPƐNSA MU KƆ EKYIR
Ma yɛnhwɛ dwuma tsitsir a Bible mu afotusɛm na tsibowa no dzi wɔ hɛn gyinaesi mu no ho nsɛm pii.
3. Ma Bible no nkyerɛ wo kwan
Sɛ yɛpɛ dɛ yesisi gyinae a, Bible no besi dɛn akyerɛ hɛn kwan? Ma yɛnhwɛ VIDEO yi, na yensusu nsɛmbisa a odzidzi do no ho.
-
Ebɛn akyɛdze soronko na Jehovah dze ama hɛn?
-
Ebɛnadze ntsi na Jehovah ama hɛn kwan dɛ hɛnankasa yebotum esisi hɛn gyinae?
-
Ebɛnadze na ɔdze ama hɛn dɛ ɔmboa hɛn ma yensisi gyinae pa?
Ma yɛnkenkan Ephesusfo 5:15, 16, na yɛnhwɛ afotusɛm a ɔwɔ Bible mu no mu kor. Yewie a, yebosusu nsɛmbisa a odzidzi do yi ho: Ebɛnadze na ibotum ayɛ dze akyerɛ dɛ ‘apon aber no,’ anaa edze wo mber ridzi dwuma yie ama . . .
-
aakenkan Bible no da biara?
-
aayɛ okun pa, ɔyer pa, ɔwofo pa, anaa abofra pa?
-
eetum akɔ asafo nhyiamu ahorow?
4. Tsetse wo tsibowa ama eetum esisi gyinae pa
Sɛ Bible no dze ahyɛdze pɔtsee bi ma wɔ asɛm bi ho a, bi a ɔrennyɛ dzen dɛ ibohu gyinae a ɔsɛ dɛ isi. Naaso, sɛ ɔba no dɛ ahyɛdze pɔtsee biara nnyi hɔ so ɛ, ebɛyɛ no dɛn? Ma yɛnhwɛ VIDEO yi, na yensusu asɛmbisa a odzi do no ho.
-
Wɔ video no mu no, ebɛn ndzɛmba na akyerɛbaa no yɛe dze tsetsee ne tsibowa ama oeesi gyinae a ɔbɔsɔ Jehovah n’enyi?
Ebɛnadze ntsi na ɔnnsɛ dɛ yɛma afofor si gyinae ma hɛn? Ma yɛnkenkan Hebrewfo 5:14, na yensusu nsɛmbisa yi ho:
-
Ɔwɔ mu dɛ ɔrennyɛ dzen dɛ yɛbɛma nkorɔfo esi gyinae ama hɛn dze, naaso kyerɛwsɛm yi se ɔsɛ dɛ yetum hu ebɛnadze?
-
Ebɛn ndzɛmba ahorow na ibotum dze edzi dwuma dze atsetse wo tsibowa ama eesi gyinae pa?
Yebotum dze hɛn tsibowa atoto maap ho, osiandɛ ɔkyerɛ hɛn kwan wɔ hɛn asetsena mu
5. Kyerɛ obu ma gyinae a afofor gyina hɔn tsibowa do si no
Ɔsor gyinae ahorow a afofor besi wɔ nsɛm bi ho. Sɛ afofor gyina hɔn tsibowa do sisi gyinae a, yebesi dɛn akyerɛ dɛ yebu gyinae a woesi no? Ɔwodze ma yɛnhwɛ tsebea ahorow ebien yi:
Tsebea 1: Akyerɛbaa bi a ɔtaa yɛ n’enyim makeup no etu kɔ asafo bi a ahosiesie a ɔtse dɛm no haw enuanom mbaa pii a wɔwɔ mu no.
Ma yɛnkenkan Romefo 15:1 na 1 Corinthfo 10:23, 24, na yensusu nsɛmbisa yi ho:
-
Akyerɛbaa yi besi dɛn egyina kyerɛwnsɛm yi do esi gyinae? Sɛ wo tsibowa ma kwan dɛ yɛ biribi, naaso dɛm adze no haw afofor hɔn tsibowa a, ebɛnadze na ebɛyɛ?
Tsebea 2: Onua bi nyim dɛ Bible no nnkasa nntsia nsadzen a obi bɔnom, naaso nankasa dze, oesi gyinae dɛ ɔronnom nsa. Wɔato nsa afrɛ no akɔ aponto bi ase, na oehu dɛ enuanom afofor ronom nsadzen.
Ma yɛnkenkan Ɔsɛnkafo 7:16 na Romefo 14:10, na yensusu nsɛmbisa yi ho:
-
Onua yi besi dɛn egyina kyerɛwnsɛm yi do esi gyinae? Sɛ ihu dɛ obi reyɛ biribi a wo tsibowa ka kyerɛ wo dɛ ɔnnyɛ a, ebɛnadze na ebɛyɛ?
Ebɛn ndzɛmba na ɔsɛ dɛ obi yɛ ama oeetum esisi gyinae pa?
1. Serɛ Jehovah ma ɔmboa wo ama eehu dza ɔsɛ dɛ eyɛ.—James 1:5.
2. Yɛ nhwehwɛmu wɔ Bible nye Bible ho nwoma ahorow mu fa hwehwɛ afotusɛm ahorow a ibotum egyina do esi gyinae. Ibotum so nye Christianfo a wonyim Nyankopɔn n’Asɛm no mu yie no esusu ho.
3. Susu mbrɛ gyinae a ibesi no bɛka wo tsibowa nye afofor hɔn tsibowa no ho.
BINOM KA DƐ: “Ewɔ ho kwan dɛ eyɛ adze biara a epɛ. Mma nntsie obiara.”
-
Sɛ yɛpɛ dɛ yɛyɛ biribi a, ebɛnadze ntsi na ɔsɛ dɛ yesusu mbrɛ Nyankopɔn na nyimpa afofor tse nka wɔ dɛm adze no ho?
DZA ESUA
Sɛ yɛpɛ dɛ yesi gyinae bi, na yesusu mbrɛ Jehovah tse nka wɔ dɛm gyinaesi no ho, nye mbrɛ hɛn ndzeyɛɛ botum aboa afofor anaa wɔahaw hɔn no ho a, ɔboa ma yesisi gyinae pa.
Mbobɔdo
-
Ibesi dɛn esisi gyinae a ɔsɔ Jehovah n’enyi?
-
Ibesi dɛn atsetse wo tsibowa?
-
Ibesi dɛn akyerɛ dɛ ibu gyinae a afofor gyina hɔn tsibowa do si no?
HWEHWƐ PII KA HO
Ibesi dɛn esisi gyinae a ɔbɛhyɛ ɔwo na Nyankopɔn ntamu ebusuabɔ no mu dzen?
“Sisi Gyinae A Ɔhyɛ Nyankopɔn Enyimnyam” (Ɔweɔn-Aban, April 15, 2011)
Hwɛ video yi, na ibohu kwan a Jehovah fa do ma hɛn afotu no ho adze pii.
Hwɛ adze a ɔboaa papa bi ma osii gyinae bi a nna no ho hia paa.
Ibesi dɛn esisi gyinae a ɔsɔ Jehovah n’enyi aber a ɔmmfaa mbra pɔtsee bi mmae wɔ asɛm bi ho no? Kenkan asɛm yi, na ibohu kwan a ibotum afa do esisi gyinae pa.
“Ana Ihia Bible Mbra Aber Biara?” (Ɔweɔn-Aban, December 1, 2003)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
