Cava Keimami Sega ni Sauma Kina na iVakadinadina i Jiova na Veibeitaki Kece?
Keimami muria na ivakasala ni iVolatabu me keimami kua ni sauma kina na veibeitaki, se veivakalialiai. Kena ivakaraitaki, e kaya na iVolatabu: “O koya e vakadodonutaka na dauveivakalialiai ena kana madua.” (Vosa Vakaibalebale 9:7, 8; 26:4) Keimami sega ni via kauaitaka na veibeitaki vakailasu, qai okati ena veiba. Ia keimami na vakamarautaka ga na Kalou.—Same 119:69.
E macala ni tiko na “gauna ni tikolo kei na gauna ni vosa.” (Dauvunau 3:7) Keimami tu vakarau me keimami veivosaki kei ira na yalomalumalumu era via kila na ka dina. Ia keimami sega ni via okati ena veiba e sega na betena. Keimami muria ga na ivakavuvuli kei na nona ivakaraitaki o Jisu, kei ira na lotu vaKarisito taumada.
A sega ni sauma o Jisu nona beitaki vakailasu vei Pailato. (Maciu 27:11-14; 1 Pita 2:21-23) E sega tale ga ni sauma lesu nona beitaki ni daumateni se dau kana. Ia e kilai na ka e cakava ena nona itovo, e salavata kei na ivakavuvuli: “Ena kilai na vuku ena ka e cakava.” (Maciu 11:19) E dau digia ga na gauna veiganiti me sauma kina ena doudou nodra veibeitaki eso tale.—Maciu 15:1-3; Marika 3:22-30.
O Jisu e vakavulici ira nona imuri mera kua ni yalolailai ena veibeitaki vakailasu. E kaya: “Moni marau ni oni vakasewasewani, vakacacani, se vosavakacacataki ena vukuqu.” (Maciu 5:11, 12) Ia e kaya tale ga ke rawa nira vunau ena gauna era beitaki kina, e yalataka: ‘Ena solia vei ira na gusu kei na vuku era na sega ni sabaya rawa se veibataka na meca kece.’—Luke 21:12-15.
E vakaroti ira na lotu vaKarisito na yapositolo o Paula mera kua ni okati ena veileti kei ira na dauveitusaqati. E kaya na veiba va qori e “sega ni yaga, qai vakaoti gauna.”—Taito 3:9; Roma 16:17, 18.
E uqeti ira na lotu vaKarisito na yapositolo o Pita mera valataka nodra vakabauta ena gauna veiganiti. (1 Pita 3:15) Ia e liaca ni vinaka me laurai qori ena ka era cakava, sega ni ka era tukuna. E vola: “Moni caka vinaka tiko ga mera galu kina na tamata lecaika ena nodra vosa vakalialia.”—1 Pita 2:12-15.