Sega, era tiko tale ga na agilosi ca. Vakacava era sa ca ga mai na ivakatekivu? Nanuma tiko ni a solia na Kalou vei ira na agilosi na galala ni vakatulewa ena gauna a buli ira kina. Oti vakalailai ga nodrau buli o Atama kei Ivi, a vakatanitaka e dua na kabula uasivi nona galala ni vakatulewa ena nona tekivuna na talaidredre e vuravura. A rawai rau o Atama kei Ivi me rau talaidredre vua na Kalou. (Vakatekivu 3:1-7; Vakatakila 12:9) E sega ni vakamacalataka na iVolatabu na yacana na kabula vakayalo qori se na iwasewase cava ni agilosi a lewena ni bera ni talaidredre. Ia ena vuku ni nona talaidredre, e veiganiti me vakatokai koya na iVolatabu me o Setani, kena ibalebale “Dauveivorati,” kei na Tevoro, kena ibalebale “Dauvakaucaca.”​—Maciu 4:8-11.

Ka ni rarawa ni levu tale era talaidredre vua na Kalou. E sega ni kilai na iwiliwili ni agilosi era “biuta na nodra itikotiko dodonu” ena gauna i Noa se na vuvale vakalomalagi ni Kalou. Era liatamata ra qai lako sobu mai vuravura mera vakaceguya nodra gagadre tawakilikili. Na ka torosobu era cakava e veisaqasaqa kei na inaki era buli kina.​—Juta 6; Vakatekivu 6:1-4; 1 Pita 3:19, 20.

Na cava e yaco vei ira na agilosi qori? Ni vakasavasavataka na vuravura na Kalou ena dua na waluvu, era vukici ira tale na agilosi ena yagodra vakayalo mera lesu i lomalagi. Ia a sega ni vakatara na Kalou mera lesu na agilosi ca ina “nodra vanua.” E biuti ira ena dua na vanua lolovira, “ena qara butobuto loaloa [vakayalo]” e vakatokai me Tatarusi. (Juta 6; 2 Pita 2:4) Na ka era cakava na timoni e vakaraitaka ni sa lewai ira o Setani na Tevoro “na nodra iliuliu na timoni,” e “vukici koya tiko ga me agilosi ni rarama.”​—Maciu 12:24; 2 Korinica 11:14.

E kaya na iVolatabu ni a tauyavu ena 1914 e dua na matanitu vakalomalagi, na Matanitu vakaMesaia ni Kalou. * Ni yaco oti ga na ka vakairogorogo qori, a vagalalataki mai lomalagi o Setani kei ira nona timoni ra qai kolotaki sobu mai vuravura. Na ivalavala torosobu qai vakasisila e yaco tu e vuravura e ivakadinadina ni nodra voravora kei na vakatubu ca.​—Vakatakila 12:9-12.

Ia na takalevu ni ivalavala vakasisila kei na ivalavala voravora e vakadinadinataka tale ga ni sa vakarau oti nona veivakatotogani o Setani kei ira na timoni. Ena muduki ena dua na gauna lekaleka qo na nodra veivakamuai. Oti e 1,000 na yabaki ni veiliutaki ni Matanitu ni Kalou e vuravura, ena soli vakalekaleka na gauna vei ira na timoni mera vakacala ena iotioti ni gauna na kawatamata ni bera nira qai vakarusai vakadua.​—Maciu 25:41; Vakatakila 20:1-3, 7-10.