E Dua e Donu e Lomai Jiova

NA CAVA o bau vakasamataka me baleti Tevita e talanoataki ena iVolatabu? Na nona qaqa vei Koliaci na tuawa ni Filisitia? Nona dro voli ena vanualiwa ni sevaki koya o Tui Saula? Na cala a vakayacora kei Pacisepa kei na ca a sotava kina? Se na nona serekali uqeti vakalou ena Same?

A levu dina na itavi lavotaki a soli vei Tevita, a qaqa vakalevu ena ivalu, a sotava tale ga na leqa. Ia na ka eda taleitaka duadua me baleti koya e cavuta na parofita o Samuela—o Tevita a ‘donu e lomai Jiova.’—1 Samuela 13:14.

A vakayacori na parofisai i Samuela ni se gone o Tevita. O bau vinakata tale ga mo donu e lomai Jiova? Mo donu e lomai Jiova, na cava o rawa ni vulica vei Tevita vakabibi ena gauna se gone kina? Meda raica mada.

Vuvale kei na Cakacaka

E yalodina ni qaravi Jiova na tamai Tevita o Jese, na makubudrau o Ruci kei Poasa. Ni se gone o Tevita, a vakavulici ratou kece na luvena o Jese ena lawa a soli vei Mosese. A tukuna o Tevita ena dua na same a vola, ni luveni “vada” i Jiova. (Same 86:16) Era mani nanuma kina eso ni rairai yaga tale ga vei Tevita na veituberi vakayalo nei tinana e sega ni cavuti ena iVolatabu. E tukuna e dua na vuku ni “rairai rogoca ena imatai ni gauna mai na tebenigusui tinana na cakacaka veivakurabuitaki i Jiova vei ira na nona tamata,” kei na italanoa me baleti Ruci kei Poasa.

 Ni tekivu vakamacalataki o Tevita, sa dua toka na gonetagane lailai e dau vakatawana na sipi i tamana. Na cakacaka qori e okati kina na nona tu duadua ena vanua veico me vica vata siga kei na bogi. Vakasamataka mada na ituvaki qori.

Eratou vakaitikotiko na vuvale i Tevita e Peceliema, na taoni lailai e tiko ena dua na delana ena veitokaitua ni veiulunivanua o Juta. Na qele vatuvatu e Peceliema e dau tubu vinaka kina na sila. Na loga kauvuata, loga ni veiolive, kei na loganivaini era robota tu na buca kei na baba e malumu na kena qele. Ena gauna i Tevita, na vanua e sega tu ni teivaki ena lomanivanua e rairai dau vanua ni vakana manumanu. E toka sara e muri na vanualiwa kei Juta.

E vakarerevaki toka na vakatawa manumanu. A sotava o Tevita ena veiulunivanua e Juta e dua na laioni kei na bea erau saga me rau kauta tani e dua na sipi mai na qelenisipi. * Na cauravou yaloqaqa qori a cemuria qai vakamatea ruarua na manumanu qori, a vakabula na sipi mai na gusudrau. (1 Samuela 17:34-36) De dua a vulica ena gauna qori o Tevita me kenadau ena vakayagataki ni irabo. E sega ni yawa sara mai na taoni e tiko kina na vanua o Penijamini. Ke ra rabotaka o ira era ligalaulau ena yavusa qori na vatu ‘e lailai sara mada ga me vaka na drauniulu, ena lau tu ga.’ A va tale ga qori na laulau ni ligai Tevita.—Dauveilewai 20:14-16; 1 Samuela 17:49.

Vakayagataki Vinaka ni Gauna

E levu na vakanomodi kei na tu duadua ena vakatawa manumanu. Ia a sega ni vucesataka o Tevita na cakacaka qori. Ena yasana adua, na gauna vakanomodi va qori e dau vakayagataka o Tevita me vakasama kina vakatitobu. E rairai okati tale ga ena same i  Tevita eso na ka a dau vakasamataka ni se cauravou. A vakasamataka beka ena gauna e tu duadua kina qori na inaki ni noda bula tu qo e vuravura, na ibulibuli vakatubuqoroqoro ni lomalagi me vaka na matanisiga, vula kei na kalokalo, na ‘cakacaka ni qaqalo ni ligai Jiova’? E vakasamataka tale beka ga ena nona tu ena vanua veico e Peceliema na vanua bulabula vinaka, na bulumakau, manumanu vuka kei na “manumanu talega ni vanua”?—Same 8:3-9; 19:1-6.

E sega ni vakabekataki ni vakadinadinataka o Tevita ena veika a sotava ena gauna ni nona vakatawa sipi ni kauaitaki ira vakalevu era yalodina vua o Jiova. Mani lagata o Tevita: “A noqui vakatawa ko Jiova; ena sega na ka me yali vei au. Sa vakadavori au e na vanua veico drokadroka: Sa tuberi au e na bati ni uciwai sa drodro malua. Io, kevaka ka’u sa lako e loma ni buca ni yaloyalo ni mate, ka’u na sega ni rerevaka na ca: ni kemuni sa tiko vata kei au; ena vakacegui au na nomuni titoko kei na nomuni matanakilagi.”—Same 23:1, 2, 4.

De dua o na vakasamataka se na yaga vakacava vei iko na italanoa kei Tevita. E yaga qori ni dua na vuna e marautaka kina o Tevita na nona veiwekani voleka kei Jiova qai “donu e lomana” ni dau vakasamataka vakatitobu na cakacaka i Jiova kei na nona veiwekani kei na Kalou. O rawa ni va tale ga qori?

O bau vakacaucautaka qai vakalagilagia na Dauveibuli ni o vakadikeva na nona ibulibuli? O bau lomani Jiova ni o vakasamataka na nona itovo e vakavotui ena veika e cakava vei keda? O na vakavinavinakataka ga na veika qori ke tiko na gauna mo masu qai vakasamataka vakatitobu ena vakanomodi na Vosa ni Kalou kei na nona ibulibuli. Ni o cakava qori, o na kilai Jiova vinaka, o na lomani koya tale ga. Eda rawa ni marautaka kece qori se da gone se qase. Kena irairai ni a volekati Jiova o Tevita mai na gauna sara se gone kina. Eda kila vakacava qori?

Lumuti o Tevita

Ni sa sega ni ganiti Tui Saula me liutaki ira na tamata ni Kalou, a tukuna o Jiova vua na parofita o Samuela: “Sa na bogi vica mada na nomu tagicaki Saula tiko, ni ka’u sa biuti koya me kakua ni nodra tui na Isireli? mo vakasinaita mada na nomu tavaya e na waiwai, ka lako, au na talai iko vei Jese na kai Pecileema: ni’u sa kunea e dua vei ira na luvena me’u lesia me tui.”—1 Samuela 16:1.

Ni yaco yani i Peceliema na parofita ni Kalou, a tukuna vei Jese me kacivi ratou mai na luvena tagane. O cei vei ratou ena lumuta o Samuela me tui? Ni rairai vinaka na ulumatua o Iliapi, a nanuma o Samuela: ‘Qo sara ga o koya.’ Ia e tukuna o Jiova vei Samuela:  “Mo kakua ni raica na matana, se na kena balavu; ni’u sa sega ni digitaki koya: ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova.” A sega tale ga ni digitaki Epinatapi, Sama, kei na va tale na luvei Jese tagane. E tomani ena kena itukutuku: “A sa kaya vei Jese ko Samuela, sa oti kece mai ko iratou na luvemu, se segai? A sa kaya ko koya, sa vo ga e dua, o koya sa gone, ka raica, sa vakatawa sipi tiko ko koya.”—1 Samuela 16:7, 11.

A rairai nanuma o Jese: ‘E sega ni rawa ni o Tevita.’ Ni gone duadua o Tevita ena vuvale qai sega soti ni levu na ka e rawa ni cakava, a nona itavi ga me dau vakatawa sipi. Ia a digitaki koya sara ga na Kalou. Ni raica na lomada o Jiova, a raica gona e dua na ka talei vei Tevita. Ni talatala o Jese me kau mai o Tevita, a tukuna o Jiova vei Samuela: “Mo ia, mo lumuti koya, ni sai koya ga oqo. A sa taura na tavaya waiwai ko Samuela, ka lumuti koya e na kedra maliwa na tuakana: a sa daucurumi Tevita na Yalo i Jiova mai na siga ko ya.”—1 Samuela 16:12, 13.

Eda sega ni kila se sa yabaki vica o Tevita ena gauna qori. Ia ena dua na gauna e muri, eratou lewe ni mataivalu i Saula na tolu na tuakana o Iliapi, Epinatapi, kei Sama. Eratou rairai sega ni gole na lima tale na tuakai Tevita ni ratou se gone. E rawa ni tukuni ni ratou se bera ni yabaki 20, oya na yabaki e rawa ni curu kina e dua ena mataivalu ni Isireli. (Tiko Voli Mai na Lekutu 1:3; 1 Samuela 17:13) Se mani cava e yaco, a lumuti Tevita o Jiova ni se gonetagane lailai. Ia sa rairai dau vakaliuca ena gauna qori o Tevita na veika vakayalo. Erau veiwekani voleka gona kei Jiova ni dau vakasamataka na veika e kila me baleta na Kalou.

Mera uqeti tale ga na gone nikua mera cakava qori. Kemuni na itubutubu, oni dau uqeti luvemuni mera dau vakasamataka vakatitobu ena vakanomodi na veika vakayalo, mera vakavinavinakataka na ibulibuli ni Kalou ra qai vulica na ka e tukuna na iVolatabu me baleta na Dauveibuli? (Vakarua 6:4-9) Vakacava o kemuni na gone, oni dau cakava duadua qori? Na ivola vakaivolatabu me vaka Na Vale ni Vakatawa kei na Yadra! * e vakarautaki me vukei kemuni moni cakava qori.

Dauqiri Api

Eda kila ena levu na same a vola o Tevita eso na ka e dau cakava ni vakatawa sipi voli, kena irairai eda kila tale ga kina na ka me baleta na ivakatagi. E macala ni sega ni dua na ivakatagi e lakovata kei na same a buli ena gauna oya e se tu nikua. Eda kila ga ni daunivakatagi maqosa na kena daunivucu. Qori na vuna a kacivi kina o Tevita mai na vanua veico me lako vei Tui Saula ni dauqiri api.—1 Samuela 16:18-23. *

Na vanua kei na gauna cava a vulica kina o Tevita me dauqiri api? A rairai cakava qori ena gauna e vakatawa sipi tu kina ena vanua veico. E ka vakayalomatua me vakabauti ni se gone o Tevita sa dauvakacaucautaka tiko na Kalou mai vu ni lomana ena sere. Sa rauta, ni vu sara ga ni nona digitaki koya o Jiova qai lesi koya ena itavi lavotaki na nona yalodina kei na nona vakaliuca na veika vakayalo.

E vakamacalataki ga ena ulutaga qo na gauna se gone kina o Tevita. Ia e rairai yaga ena nona bula taucoko na veika e cakava ni se gone ena vanua veico e Peceliema. Vakasamataka mada na nona lagata o Tevita vei Jiova: “Au sa nanuma na gauna makawa; au sa vakanananu ki na nomuni cakacaka kecega; au sa vakanananu vakalevu ki na cakacaka ni ligamuni.” (Same 143:5) Na veivakacegui ni same qori kei na levu tale na same a vola o Tevita ena uqeti ira kece era vinakata mera donu e lomai Jiova.

[iVakamacala e ra]