SA NODRA ivakarau ni bula voli mai ena dua na gauna balavu na lewe i Kazakhstan na veitokiyaki. Ena gauna mada ga qo, era dau tokitaka eso na lewenivanua nodra manumanu ina vanua mera kana vinaka kina. Ni katakata na draki, era gole ina vanua batabata ena lomanivanua. Ia ni batabata na draki qai lutu na ucacevata, era toki sobu tale ina vanua bucabuca ni dau katakata e kea.

Era vakaitikotiko ena siti eso na lewe i Kazakhstan. Ia se laurai tiko ga ena nodra ivakarau vakavanua, kedra kakana, kei na cakacakaniliga na nodra ivakarau ni bula nodra qase. E kilai o Kazakhstan ena kena serekali, sere, kei na ivakatagi ra qai cakava ga nodra iyaya ni ivakatagi.

Nodra vale na lewe i Kazakhstan e vakatokai na yurt.  E rawa nira kauta nira veitokiyaki voli. Na itaratara ni nodra vale e sega ni vakaleqa na veika bula. Era vakayagataka vakalevu na yurt o ira era va qele ni manumanu, ia o ira na vakaitikotiko ena veikoro lelevu era dau vakayagataka ke ra caka soqo. E icili vinaka vei ira na saravanua. E laurai tale ga ena iukuuku ni vale nira maqosa na marama ni Kazakhstan ena talitali, cula isulutali, kei na ibe ni valagi.

E manumanu taleitaki e Kazakhstan na ose. E rauta ni 21 na vosa vaKazakh ni ose, qai dui tu na kedra ibalebale. E 30 vakacaca na vosa se matavosa e rawa ni vakamacalataka na roka ni vutina. Dua na iloloma saulevu qai vakamareqeti na ose. Levu na gonetagane era sa tekivu vulica na vodo ose nira se gone.

E vakayagataki vakalevu ena kedra kakana na lewe i Kazakhstan na lewenimanumanu, ia e sega ni levu na kena isaluaki. Era dau taleitaka e dua na gunu e vakatokai na koumiss, e caka mai na sucu ni ose qai tukuni ni na bulabula vinaka o koya e gunuva. Dua tale na medra gunu taleitaki na shubat e caka mai na sucu ni kameli, e uro qai wiwi vakalailai kena igunugunu.

E rawa nira lai sarasara na vulagi ena valenivolavola ni iVakadinadina i Jiova e Almaty, Kazakhstan.