1. ¿Jameena waya waʼwaajüle Maleiwa sümaa waainjain tü nüchekakat?

AISHII maʼin waya nüpüla Jeʼwaa. Sutuma tia, niiʼiyateein wamüin tü waainjainjatkat. Waʼwaajüle nia sümaa waainjain tü nüchekakat talateena otta taasheena waya suulia kasa mojusü. Otta müsia, aneerü wakuwaʼipa otta nükaaliinjeena waya (Isaías 48:17). Wainma tü iküleesiakalüirua, mayaapejeʼe nekirajüin tü shiimainkat naashin, nnojoishii paaʼinwajiraain sünain tü nekirajakat nüchiki Maleiwa otta tü nuchuntakat wamüin.

2. ¿Kasa paainjainjatka süpüla pütüjaain saaʼu jaralüin tü iküleesia shiimainkat? ¿Kasa shiyaawaseka?

² ¿Kasa paainjainjatka süpüla pütüjaain saaʼu jaralüin tü iküleesia shiimainkat? Nnojotsü choʼujaain pikirajaain otta puʼwanaajireʼerüin nanoula na suluʼukana tü iküleesiakalüirua. Shia neʼe pikirajaainjatka anain tü shikirajakat maʼin tü Wiwüliakat süchiki tü iküleesia shiimainkat. Weʼitaa wanee shiyaawase. Sainküin tü mmakat, wainma maʼin tü nneerü nnojotkat shiimain. Piʼitaanüle sünain akatalaa tü nnojotkat shiimain suulia tü shiimainkat, ¿kaseerü piyaawataka anainjee tü nneerü nnojotkat shiimain? ¿Pikirajaainjatche anain tü sukuwaʼipakat? ¿Shiataapa pikirajaainjatüin  anain sukuwaʼipa tü nneerü shiimainkat? Pütüjaapa saaʼu, piyaawateerü tü nneerü nnojotkat shiimain. Müsia tü iküleesia nnojotkat shiimain, wayaawateerü aaʼu wekirajaale sünain sukuwaʼipa tü iküleesia shiimainkat.

3. ¿Kasa waainjainjatka süpüla anain waya nümüin Maleiwa naashin Jesuu?

³ Waʼwaajüle Jeʼwaa pansaa sümaa tü nüchekakat, anasü maʼin. Naashin na wayuukana, anasü nümüin Maleiwa süpüshuaʼa tü iküleesiakalüirua. Tia, nnojotsü shikirajüin tü Wiwüliakat. Nnojoishii müinjanain neʼe waya: «Anoujashii waya». Müshi Jesuu: ‹Mayaasüje, «Senyotkalee, kojutüshi pia watuma» jümüin tamüin, nnojorüle jaaʼinrüin tü nüchekakat chi Tashi chakai iipünaa, nnojoleena ekerotüin jia suluʼumüin tü nuluwataayakat›. Sutuma tia, aneena waya noʼuluʼu Maleiwa watüjaale saaʼu tü nuchuntakat wamüin otta waainjüle shia. «Jia kaainjaraliikana» müshi Jesuu namüin na nnojoliikana aainjüin tü keeʼireekat naaʼin Maleiwa (Mateo 7:21-23). Tü iküleesia nnojotkat shiimain müsü aka tü nneerü nnojotkat shiimain: mojutsat otta eesü kasa mojusü sutuma.

4. ¿Kasa kayaakuaka naashin Jesuu tü piamasükat wopu? ¿Jalamüinsü wayuu sutuma?

⁴ Kateesü noʼu waneepia na wayuukana nutuma Jeʼwaa. Süpüla tia, waʼwaajüinjachi nia sümaa waainjain tü nüchekakat. Eeshii eeka nnojoluin naainjeein tia. Makalaka nümüin Jesuu: ‹Jikerota suluʼu tü wopu mouisü sünainmüinkat tü kataakalü oʼuu süka wainmain na ekerotakana suluʼu tü wopu jerutsü sünainmüinkat tü ouktaakat› (Mateo 7:13, 14). Maʼaka wekirajaain, tü iküleesia shiimainkat sünainmüinsü tü kataakalü oʼuu otta tü iküleesia nnojotkat shiimain sünainmüinsü tü ouktaakat. Akaisaʼa Jeʼwaa, nnojotsü nücheküin ouktüin wayuu saaliijee manoujain, makalaka naapirüin naya süpüla neʼraajüin nia (2 Pedro 3:9). Tü waainjakat süpüla waʼwaajüin Maleiwa eesü süpüla katüin woʼu jee ouktüin waya sünainjee.

5. ¿Kasa waainjainjatka süpüla wayaawatüin na suluʼukana tü iküleesia shiimainkat?

⁵ ¿Kasa waainjainjatka süpüla wousütüin ‹tü wopu sünainmüinkat tü kataakalü oʼuu›? Naashin Jesuu, mapüleejeerü wamüin wayaawatüin na suluʼukana tü iküleesia shiimainkat jülüjale waaʼin nakuwaʼipa. Müshi nia: ‹Shiʼnnüle süchon wanee wunuʼu, atüjaaneerü aaʼu kasain kachoin› süka «wane wunuʼu eekai shikaajünüin achoin, anasü tü süchonkot» (Mateo 7:16-18). Na suluʼukana tü iküleesia shiimainkat ayaawatünüshii sükajee tü nanoulakat otta tü naainjakat. Mayaapejeʼe nnojoluin anain maʼin naya, aʼyataashii maʼin süpüla naainjain tü keeʼireekat naaʼin Maleiwa. Süpüla wayaawatüin naya, wekirajaa sünain aipiruasü nakuwaʼipa.

6, 7. ¿Jamüsü nanüiki na aʼyataakana nümüin Maleiwa süchiki tü Wiwüliakat? ¿Jamüsü shiiʼiyatia nutuma Jesuu?

⁶ Na aʼyataakana nümüin Maleiwa, nekirajüin tü sümakat tü Wiwüliakat. Müsü tü Wiwüliakat: ‹Aapünüsü tia pütchikat wamüin nutuma chi naaʼinkai Maleiwa süpüla wekirajüinjatüin wayuu sünain. Na aapakana shia, achiajaaneena sutuma, anouktüneerü nakuwaʼipa jee akaaliinjüneena sutuma sünain aaʼinraa tü kasa anasü talatakat atuma naaʼin Maleiwa› (2 Timoteo 3:16, 17). Müshi Pablo namüin na anoujashiikana: «Wanaa sümaa jaapaain tü nünüiki waküjakat jümüin paalainka. Kapülasü jaaʼin shia süka jiyaawatüin saaʼu sünain nnojolüin süleʼeruʼujeejatüin wayuu neʼe» (1 Tesalónica 2:13). Tü nekirajakat otta tü naainjakat na suluʼukana tü iküleesia shiimainkat, nnojotsü sünüikin wayuu. Suluʼujeejatü shia tü Wiwüliakat, tü nüshajiralakat Maleiwa.

⁷ Niiʼiyatüin shia Jesukürisüto, nikirajüin tü sümakat tü Wiwüliakat. Müshi nia nümüin chi Nüshikai: ‹Tü pünüikikat shia tü shiimainkat› (Juan 17:17). Nunouja anainrü  Jesuu tü Wiwüliakat otta nikirajüin tü sümakat. Müshi nia pejeewa: «Müsü tü ashajuushikat», süchikijee tia nüküjüin tü sümakat tü Wiwüliakat (Mateo 4:4, 7, 10). Müshiʼiya na anoujashiikana maaʼulu nünain Maleiwa, tü nekirajakat anain nnojotsü naleʼeruʼujeejatüin. Nanouja anainrü Nünüikin Maleiwa tü Wiwüliakat otta nekirajüin tü sümakat.

8. ¿Kasa sünainpünaaka tü aʼwaajaakat Jeʼwaa?

⁸ Na suluʼukana tü iküleesia shiimainkat, naʼwaajüin neʼe Jeʼwaa otta neʼraajirüin nünülia. Müshi Jesuu: «Nia juʼwaajüinjachika, chi Jümaleiwasekai nümüiwa» (Mateo 4:10). Makalaka naʼwaajüin neʼe Jeʼwaa na aʼyataashiikana nümüin. Naʼwaajüin chi Maleiwa shiimainkai sükajee neʼraajirüin nünülia otta nukuwaʼipa. Müsü Salmo 83:18, TNM: «Piain neʼe pümüiwaʼa chi Miyoʼushikai saaʼu tü mmakat süpüshua, piakai chi kanüliakai Jeʼwaa». Nashatüin nukuwaʼipa Jesuu sünain neʼraajirüin Maleiwa na wayuukana. Müshi nia nümüin chi Nüshikai: «Teʼraajirüin tü pünüliakat» (Juan 17:6, TNM). Müsia maaʼulu, na aʼyataakana nümüin Maleiwa neʼraajirüin tü nünüliakat, tü naainjainjatkat otta tü nukuwaʼipakat.

9, 10. ¿Kasa naainjaka na anoujashii shiimainshiikana süpüla neeʼiyatüin aijiraain naya?

⁹ Aijiraashii maʼin na aʼyataakana nümüin Maleiwa. Müshi Jesuu: ‹Aijiraale jia, ayaawatüneena jia sünain tekirajanain jia› (Juan 13:35). Naainjapuʼuin tia na nikirajüinkana Jesuu. Sutuma aijiraain na aʼyataashiikana nümüin Maleiwa, pawalaawajiraashii, nnojotsü üttüin naaʼin nanain na naatakana eʼirukuu otta na naatakana oumain (paashajeʼera Colosas 3:14). Nnojoishii müin na suluʼukana tü iküleesia nnojotkat shiimain. Müle naya, nnojoishiijee oʼutuin saaʼin wayuu sutuma naatain noumain jee neʼiruku. Na anoujashii shiimainkana, nnojotsü noʼutüin naaʼin na anoujakana namaa otta na waneeinnua. Saashin tü Wiwüliakat ‹naata nakuwaʼipa na nüchonniikana Maleiwa suulia  nakuwaʼipa na nüpüshikana chi Yolujaakai. Chi wayuu nnojoikai aaʼinrüin tü kasa anasükat sümaa maalin nüpüla na anoujashiikana, nnojoishi nia nüchoin Maleiwa. Aijiraainjana waya. Nnojoluinjana waya müin aka naaʼin Caín, oʼutaka naaʼin Abel› (1 Juan 3:10-12; 4:20, 21).

¹⁰ Na anoujashii shiimainshiikana nnojoishii oʼutüin saaʼin wayuu. Akatalüshii kaʼi, aʼyataashii, asülajüshii kasa süpüla nakaaliinjain otta natütüleʼerüin naaʼin na nawalayuukana (Hebreokana 10:24, 25). Akaaliinjiraashii sülatüle kasa mojusü namüin otta nnojoishii nemeejüin na waneeinnua. ‹Naaʼinrüin tü anasükat namüin na wayuukana› maʼaka süküjüin shia tü Wiwüliakat (Galacia 6:10).

11. ¿Jamüsü anaka maʼin wanoujale sünain woʼtteʼennüin nükajee Jesukürisüto?

¹¹ Na anoujashii shiimainshiikana, nanouja anainrü noʼtteʼennüin nükajee Jesukürisüto. Saashin tü Wiwüliakat ‹nia neʼe oʼtteʼeraka wayuu süka nnojoluin eein wanee wayuu saaʼu tü mmakat oʼtteʼeraka waya› (Aluwataaushikana 4:12). Maʼaka wekirajaain suluʼu ekirajaaya 5, ouktüshi Jesuu süpüla naakajirüin na jaa makana waneepia (Mateo 20:28). Otta nia, Sülaülashi Nuluwataaya Jeʼwaa, tü aluwataainjatkat Mmapaʼa. Sutuma tia, oonooinjana waya sümaa nünüiki Jesuu otta waainjainjatü tü nikirajakalü anain süpüla katüin woʼu waneepia. Saashin tü Wiwüliakat ‹kateerü noʼu waneepia chi anoujakai nünain chi Nüchonkai Maleiwa› (Juan 3:36).

12. ¿Kasa nnojoluinjatka kanainpünaain na anoujashiikana?

¹² Na aʼyataakana nümüin Maleiwa, nnojotsü naainjain tü naainjakat na manoujainsaliikana. Müshi Jesuu nümüin Pilato, chi aluwataakai Roma: ‹Sukuwaʼipa tü taluwataayakat nnojotsü müin aka nakuwaʼipa na sülaülashiikana mma› (Juan 18:36). Jaʼitaina kepiain suluʼu wanee mma naata na anoujashii shiimainshiikana, jaa müshii sümaa tü Nuluwataayakat Jesuu. Makalaka nnojoluin naya sünainpünaain poliitika otta tü atkawaakat. Akanasaʼa naya,  nnojoishii nanainpünaain na awotaajünakana aaʼu jee na awotaajakana. Mayaapejeʼe nnojoluin naainjain tia, oonooshii sümaa nanüiki na sülaülashiikana mma. ¿Jamüsü? Shia süka ‹jüüjüüinjatüin wayuu namüin na sülaülashiikana mma› saashin tü Wiwüliakat (Roma 13:1). Naainjinnüle kasa eeka mojuin nümüin Maleiwa natuma na sünainpünaakana poliitika, naainjain tü naainjakat na aluwataaushiikana, müshii naya: ‹Niainjachi woonooka amaa anüiki Maleiwa suulialeʼeya wayuu› (Aluwataaushikana 5:29; Marcos 12:17).

13. ¿Kasa naküjaka süchiki Nuluwataaya Maleiwa na anoujashii shiimainshiikana? ¿Kasa naainjaka sutuma tia?

 ¹³ Na anoujashii shiimainshiikana, naküjain shiainjatüin Nuluwataaya Maleiwa anoukteʼeraka sukuwaʼipa wayuu. Müshi Jesuu: ‹Aküjüneerü sümüin wayuu süchiki nuluwataaya Maleiwa, kettaapa shia, ajaʼlajaainjatü tü kasakat süpüshuaʼa› (Mateo 24:14). Na anoujashii shiimainshiikana, nnojotsü nanoujirüin wayuu sünain nayainjanain na sülaülashiikana mma ajaʼlajeʼeraka tü kasa mojusükat. Shiainjatü Nuluwataaya Maleiwa aainjaka tia (Salmo 146:3). Naashin Jesuu achuntajana waya süpüla süntüin Nuluwataaya Maleiwa. Müshi nia: ‹Pünta maalü sünain aluwatawaa süpüla saainjünüin tü keeʼireekat paaʼin› (Mateo 6:10). Saashin tü Wiwüliakat, tü Nuluwataayakat Maleiwa «sajaʼttireerü süpüshuaʼa tü aluwataayakalüirua otta shiainjatü eeka waneepia» (Daniel 2:44, TNM).

14. Saaʼin pümüin, ¿jaralii na aainjakana tü waashajaaitpakalü achiki?

¹⁴ Sutuma tia, püsakira paaʼin: «¿Jaralii na ekirajakana tü sümakat tü Wiwüliakat otta na eʼraajirakana nünülia Maleiwa? ¿Jaralii na aijiraakana maʼin, anoujakana nünain Jesuu, nnojoliikana aainjain tü naainjakat na manoujainsaliikana otta na aküjakana shiainjatüin Nuluwataaya Maleiwa anoukteʼeraka sukuwaʼipa wayuu? Saʼakajee tü iküleesia eekat Mmapaʼa, ¿jara aainjaka tü waashajaaitpakalü achiki?». Naya na aküjüliikana pütchi nüchiki Jeʼwaa (paashajeʼera Isaías 43:10-12).

15. Wanoujale eein Maleiwa, ¿kasa waainjainjatka naashin?

¹⁵ Süpüla talatüin Maleiwa watuma, nnojotsü wanoujainjatüin neʼe eein nia. Saashin tü Wiwüliakat anoujashii na yolujaakana sünain eein Maleiwa (Santiago 2:19). Akatsaʼa nnojoluin naainjain tü nümakat Maleiwa otta nnojoishii naya anain noʼuluʼu. Süpüla talatüin Maleiwa watuma, waainjainjatü tü nümakat, ojuʼitajana waya  suluʼujee tü iküleesia nnojotkat shiimain otta ekeroluinjana waya suluʼumüin tü iküleesia shiimainkat.

16. ¿Kasa waainjainjatka süpüla nnojoluin sünainpünaain waya tü iküleesia nnojotkat shiimain?

¹⁶ Nnojoluinjana waya sünainpünaain tü iküleesia nnojotkat shiimain naashin chi aluwataaushikai Juan. Müshi nia: ‹Jujuʼita suluʼujee Babilonia süpüla nnojoluin jaaʼinrüin tü kasa mojusükat› (Alateetkat Mapeena 18:4). Makalaka nnojoluin sünainpünaain tü iküleesia nnojotkat shiimain na anoujashii shiimainshiikana.

17, 18. ¿Kasa wayuu ‹Babilonia tü Miyoʼusükat›? ¿Jamüshii ‹wojuʼitajanaka maalü suluʼujee›?

¹⁷ Saashin tü Wiwüliakat, süpüshuaʼa tü iküleesia nnojotkat shiimain süpüshi ‹Babilonia tü Miyoʼusükat› (Alateetkat Mapeena 17:5). * Sutuma tia, sotusü waaʼin Babilonia, eejeejatüle sukumajaain tü iküleesia nnojotkat shiimain süchikijee tü juya miyoʼushaatakat. Tü shikirajakat maaʼulu tü iküleesia nnojotkat shiimain otta tü saainjakat sümaʼanajeejatü tü Babilonia sümaiwajatkat. Na kepiakana suluʼu tia pueulokat anoujapuʼushii sünain apünüinshin sümaa waneeshiain na namaleiwasekana. Tia shia tü shikirajakat maʼin maaʼulu tü iküleesia nnojotkat shiimain. Akatsaʼa ekirajüin tü Wiwüliakat sünain waneeshiain neʼe chi Maleiwa shiimainkai, Jeʼwaa otta müshia Jesukürisüto Nüchon (Juan 17:3). Naashin na chejeʼewaliikana Babilonia, ouktapa wanee wayuu, nnojotsü ouktüin tü naaʼinkat otta eesü müliale shia saʼaka siki. Müsia tü shikirajakat maaʼulu tü iküleesia nnojotkat shiimain.

¹⁸ Tü iküleesia eejatkat chaaʼaya Babilonia eeipa shia sainküin tü Mmakat. Makalaka shiain maaʼulu süpüshuaʼa tü iküleesia nnojotkat shiimain Babilonia tü Miyoʼusükat. Naashin Maleiwa antalaa meerü tü kaʼi sajaʼlajaainjatkat oʼu. ¿Pütüjaaitpa aaʼu jamüin anaka maʼin akatalawaa suulia Babilonia  tü Miyoʼusükat? Keeʼireesü naaʼin Jeʼwaa pujuʼitüin maalü suluʼujee süpülapünaa sajaʼlajeʼennüin (paashajeʼera Alateetkat Mapeena 18:4, 8, TNM).

19. ¿Kaseerü piʼraka piʼyataale nümüin Jeʼwaa?

¹⁹ Pujuʼitapa suluʼujee tü iküleesia nnojotkat shiimain, eesü süpüla sükatalaain wayuu puulia. Piʼyataale nümüin Jeʼwaa namaa na anoujashiikana, piʼreerü wainmain maʼin na wayuu puwalayuujeenakana. Meerü pukuwaʼipa maʼaka naaʼin na nikirajüinkana Jesuu wanaa sümaa napütüin wainma kasa süpüla noʼunüin nüchiirua: wainma na wayuu nawalayuukana. Otta müsia püpüsheena na anoujashii shiimainshiikana, na wainmakana sainküin tü mmakat otta neeʼiyateerü alin maʼin pia napüla. Otta müsia, kateerü poʼu waneepia ‹suluʼu tü mma jeketüinjatkat› (paashajeʼera Marcos 10:28-30, TNM). Akanasaʼa na akatalaakana puulia sutuma punoujain, eeshii süpüla nekirajaain sünain tü Wiwüliakat mapa otta naʼyataain nümüin Jeʼwaa.

20. ¿Kaseerü alataka namüin na suluʼukana tü iküleesia shiimainkat?

²⁰ Saashin tü Wiwüliakat, najaʼttirajana Maleiwa na mojulaashiikana otta naya eeinjanaka na anamiakana, suluwataainjatka aaʼu Nuluwataaya Maleiwa (2 Pedro 3:9, 13). ¡Anashaateerü maʼin tia! Shieerü eeka neʼe tü iküleesia shiimainkat. ¡Puutkajaa jooluʼu namaa na anoujashii shiimainshiikana!