1, 2. a) ¿Mbaʼérepa apóstol Pablo heʼi vaʼekue pe mborayhu iñimportanteveha? b) ¿Mbaʼe mbaʼépa ñaanalisáta jahávo?

 APÓSTOL Pablo oñeʼẽrõ guare pe jerovia, esperánsa ha mborayhúre, ultimoitépe heʼi vaʼekue ‘pe iñimportantevéva koʼãvagui haʼeha hína pe mborayhu’ (1 Cor. 13:13). Péro ¿mbaʼérepa haʼe heʼi vaʼekue upéicha? Ñapensamína, oñekumplipa vove Ñandejára promesakuéra pe múndo pyahúpe, natekotevẽmoʼãvéima jajerovia umívare pórke oikopátama. Péro siémpre jahayhu vaʼerã umi héntepe ha Jehovápe, ha opa árare jahayhuvéta voi jahávo chupekuéra.

² Siémpre ningo tekotevẽta japorohayhu, upévare ñaanalisáta mbohapy pregúnta: ¿Mbaʼérepa jajoayhu vaʼerã? ¿Mbaʼéichapa ikatu jahechauka jajoayhuha? ¿Ha mbaʼéichapa ikatu jasegi jajoayhu ñande pyʼaite guive?

3. ¿Mbaʼe mbaʼérepa jajoayhu vaʼerã?

³ ¿Mbaʼérepa iñimportánte jajoayhu? Iñimportanteterei jajoayhu pórke Jesús heʼi vaʼekue voi péicha umi hénte ohechakuaataha ñande haʼeha kristiáno verdadéro. Haʼe heʼi vaʼekue voi ijapostolkuérape: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:35). Avei iñimportánte jajoayhu pórke péicha jasegíta ñaime en unida. Apóstol Pablo heʼi vaʼekue: “Pe mborayhu oipytyvõ enterovépe oĩ hag̃ua unído oñondivepa” (Col. 3:14).  Péro ndahaʼéi upévante, apóstol Juan heʼi vaʼekue umi ermánope: “Pe ohayhúva Ñandejárape ohayhu vaʼerã avei iñermánope” (1 Juan 4:21). Upéicharõ, jajoayhúramo jahechauka hína jahayhuha Ñandejárape.

4, 5. ¿Mbaʼérepa jaʼekuaa jahayhúramo ñane ermanokuérape, jahayhuha avei Ñandejárape? Emoĩ peteĩ ehémplo.

⁴ ¿Mbaʼérepa jaʼekuaa jahayhúramo ñane ermanokuérape jahayhuha avei Ñandejárape? Ñamoĩmi peteĩ ehémplo. Peteĩ doktór oikuaaséramo mbaʼéichapa oĩ ñane korasõ, ikatu orrevisa ñande púlso, ikangýpa térã imbarete porãpa hína. ¿Mbaʼépa ñaaprende ko ehémplogui?

⁵ Pe doktór ikatu oikuaa mbaʼéichapa oĩ ñane korasõ orrevisa rupi ñande púlso. Ñande kásope avei ikatúta jaikuaa mbaʼeichaite pevépa jahayhu Ñandejárape jahechárõ mbaʼeichaite pevépa jahayhu ñane ermanokuérape. Oimérõ ndajahayhuvéi ñane ermanokuérape yma guaréicha, upéva ikatu heʼise ikangyha ohóvo ñane mborayhu Ñandejárare. Péro oimérõ jahechauka meme jahayhuha ñane ermanokuérape, péva heʼise jahayhuetereiha avei hína Jehovápe.

6. Jahechakuaárõ ndajahayhuveimaha ñane ermanokuérape yma guaréicha, ¿mbaʼérepa upéva peteĩ provléma isériova? (1 Juan 4:​7-9, 11).

⁶ Oimérõ ndajahayhuvéi ñane ermanokuérape yma guaréicha, upéva peteĩ provléma isériova. ¿Mbaʼérepa? Pórke ohechauka ikangyha ohóvo ñane amista Jehová ndive. Apóstol Pablo heʼi voi: “Pe ndohayhúiva iñermáno ohechávape, ndaikatúi ohayhu Ñandejára ndohecháivape” (1 Juan 4:20). ¿Mbaʼépa ñaaprende? Jahechakuaa Jehová ñandeguerohorytaha jahayhúrõ añoite ñane ermanokuérape (elee 1 Juan 4:​7-9, 11).

7, 8. ¿Mbaʼéichapa ikatu jahechauka japorohayhuha?

⁷ Ñandejára Ñeʼẽ heʼi jey jey ñandéve jajoayhu vaʼerãha (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Péro ñapensa porãramo pe mborayhu haʼe hína peteĩ kualida ñañandúva ñande pyʼaite guive ha ni peteĩ persóna ndaikatúi ohecha. Upévare, ¿mbaʼéichapa ikatu jahechauka japorohayhuha? Upéva ojekuaáta jaʼéva ha jajapóvare.

⁸ Heta hendáicha ningo ikatu jahechauka jahayhuha ñane ermanokuérape. Koʼãva hína unos kuánto ehémplo: “Peje vaʼerã ojupe siertoguáva” (Zac. 8:16). ‘Peiko pyʼaguapýpe oñondivepa’ (Mar. 9:50). “Púntape pehechauka vaʼerã pemombaʼeha pende rapichápe” (Rom. 12:10). “Pejorresivi porãkena” (Rom. 15:7). ‘Pesegíkena peñoperdona pende pyʼaite guive’ (Col. 3:13). “Pesegíkena peñopytyvõ pegueraha hag̃ua ojupe pende kárga pohýi” (Gál. 6:2). “Pesegíkena peñokonsola” (1 Tes. 4:18). ‘Pesegíkena peñomombarete’ (1 Tes. 5:11). “Peñemboʼe ojuehe” (Sant. 5:16).

9. ¿Mbaʼérepa ñaporokonsola jave jahechauka hína japorohayhuha? (Ehecha pe taʼanga).

⁹ Jahechamína peteĩ fórma ikatuhápe jahechauka jahayhuha ñane ermanokuérape. Pe ótro párrafope jahecha kuri Pablo heʼi hague: “Pesegíkena peñokonsola”. ¿Mbaʼérepa ikatu jaʼe ñakonsoláramo ótrope jahechaukaha hína jahayhuha chupe? Peteĩ lívro oexplika pe palávra “peñokonsola” oipurúva Pablo heʼiseha ñaĩha peteĩ persóna ykére ñamokyreʼỹ hag̃ua chupe ohasa asyeterei jave. Upéicharõ ñakonsola jave peteĩ ermánope, ñaipytyvõ chupe opuʼã jey hag̃ua ha osegi  hag̃ua oservi Jehovápe fiélmente. Ñaporokonsola jave jahechauka hína ñane ermanokuérape jahayhuha chupekuéra (2 Cor. 7:​6, 7, 13).

10. ¿Mbaʼérepa tekotevẽ jaiporiahuvereko raẽ ñande rapichápe ñakonsola hag̃ua chupe?

¹⁰ Ñakonsola hag̃ua ótrope, tekotevẽ jaiporiahuvereko chupe. ¿Mbaʼépa heʼise upéva? Peteĩ persóna oiporiahuverekóva hapichápe oñehaʼã okonsola chupe ha ojapo álgo oipytyvõ hag̃ua pe ohasa asývape. Upéicharõ, ñaporokonsola hag̃ua tekotevẽ jaiporiahuvereko raẽ ñande rapichápe. Apóstol Pablo oexplika voi Jehová ombyasy rupi umi héntepe, upéva omomyiha chupe okonsola hag̃ua chupekuéra. Pablo heʼi Jehová haʼeha ñande “Túa ñanderayhúva ha ñandeporiahuverekóva, ha peteĩ Dios omeʼẽva konsuélo” (2 Cor. 1:3). Koʼápe heʼi Jehová haʼeha ñande “Túa ñanderayhúva ha ñandeporiahuverekóva”, pórke chugui voi ou umichagua sentimiénto ha haʼe ombyasyeterei umi héntepe. Haʼe ñandeporiahuvereko rupi “ñanekonsola jahasa jave opaichagua provlémare” (2 Cor. 1:4). Pe y hoʼysã asýva ningo ombopiroʼy peteĩ ijuhéivape, péicha avei Jehová ombopiroʼy ha okonsola umi ohasa asývape. ¿Mbaʼéichapa ñande ikatu jaiporiahuvereko ñande rapichápe ha ñaporokonsola ojapoháicha Jehová? Por ehémplo, ikatu ñañehaʼã jareko umi kualida ñanepytyvõtava jaiporiahuvereko ha ñakonsola hag̃ua. ¿Mbaʼe mbaʼépa hína umi kualida?

11. Ohechaukaháicha Colosenses 3:12 ha 1 Pedro 3:​8, ¿mbaʼe ótra kualidápa ñanepytyvõta jahayhu ha ñakonsola hag̃ua ótrope?

¹¹ ¿Mbaʼépa ñanepytyvõta jasegi hag̃ua jahayhu ñane ermanokuérape ha ñakonsola chupekuéra? Upearã tekotevẽ ñañehaʼã jareko unas kuánta kualida iporãva. Por ehémplo ñanembaʼeporã ha jajoayhu oñoermánoicha (elee Colosenses 3:12; 1 Pedro 3:8). ¿Mbaʼéichapa koʼã kualida ñanepytyvõta? Jaiporiahuvereko jave ñande rapichápe ha sinséramente jajepyʼapýrõ hesekuéra ñande pyʼaite guive, ñakonsolaséta umi ohasa asývape. Jesús heʼi vaʼekue voi: “Umi mbaʼe omyenyhẽva ñane korasõ osẽ ñande jurúrupi. Pe persóna ivuénova oñeʼẽ iporãvare, pórke ikorasõ henyhẽ mbaʼe porãgui” (Mat. 12:​34, 35). Ñakonsola jave ñane ermanokuéra ohasa asývape, jahechauka hína jahayhuha chupekuéra.

12. a) ¿Mbaʼérepa tekotevẽterei ñañatende porã koʼág̃arupi? b) ¿Mbaʼe pregúntapa ñaanalisáta koʼág̃a?

¹² Enterovéva ningo ‘jasegise jajoayhu’ (1 Juan 4:7). Upéicharõ jepe, aníkena ñanderesarái Jesús ñandeavisa hague ‘hetaiterei hénte outaha ndojoayhuvéi’ (Mat. 24:12). Upérõ guare Jesús ndeʼiséi vaʼekue la majoría idisipulokuéra outaha ndojoayhuvéi. Upéicharõ jepe tekotevẽterei ñañatende, pórke ko múndope la hénte noñeinteresái ojuehe ha upéva ikatu ova ñanderehe avei. Upévare iñimportánte ñaanalisa ko porandu: ¿Mbaʼéichapa ikatu jaikuaa jasegípa jahayhu ñande pyʼaite guive ñane ermanokuérape?

13. ¿Mbaʼépa ñanepytyvõta jaikuaa hag̃ua mbaʼeichaite pevépa japorohayhu?

¹³ Jaikuaa hag̃ua mbaʼeichaite pevépa japorohayhu, por ehémplo jareko vaʼerã enkuénta mbaʼéichapa ñarreaksiona oñepresenta jave peteĩ situasión ijetuʼúva (2 Cor. 8:8). Apóstol Pedro oñeʼẽ peteĩ situasión peichaguáre. Haʼe heʼi: “Koʼýte pejoayhu  vaʼerã pende pyʼaite guive, pórke pe oporohayhúva siémpre oĩ operdona hag̃uáicha hapichápe” (1 Ped. 4:8). Upéicharõ, la jajapóva oĩ jave ofalláva ikatu ohechauka ñandéve mbaʼeichaite pevépa japorohayhu.

14. Ohechaukaháicha 1 Pedro 4:​8, ¿mbaʼéichapa japorohayhu vaʼerã? Emoĩ peteĩ ehémplo.

¹⁴ Jahecha porãmiéna mbaʼépa heʼi vaʼekue apóstol Pedro. Ñepyrũrã pe versíkulo 8-pe haʼe heʼi: “Pejoayhu vaʼerã pende pyʼaite guive”. Pe palávra ojetradusíva “pende pyʼaite guive” heʼise “ojepyso”. Pe segunda párte pe versíkulope katu ohechauka mbaʼépa jajapóta japorohayhúrõ ñande pyʼaite guive. Heʼi ‘siémpre ñaĩtaha ñaperdona hag̃uáicha ñande rapichápe’. Epensamína peteĩ ehémplore. Ñamoĩ chupe jarekoha peteĩ mesa ikuaʼipáva térã imanchapáva. Katuete ningo jaipysóta peteĩ mantél pe mesa ári siémpre ñamoʼã hag̃ua kompléto umi mbaʼe vai orekóva, ha ndahaʼéi peteĩ térã mokõi mbaʼénte. Péicha avei japorohayhúrõ ñande pyʼaite guive, siémpre ñaĩta ñaperdona hag̃uáicha entéro umi fálla orekóva ñane ermanokuéra jaipuruháicha pe mantél ñamoʼã hag̃ua umi mbaʼe vai orekóva pe mesa.

15. ¿Mbaʼépa jajapóta japorohayhúrõ ñane korasõ mbytete guive? (Colosenses 3:13).

 ¹⁵ Japorohayhúramo ñaĩta ñaperdona hag̃uáicha ñane ermanokuérape sapyʼánte ijetuʼúramo jepe (elee Colosenses 3:13). Ñaperdona jave ñane ermanokuérape jahechauka jahayhuha chupekuéra ñane korasõ mbytete guive ha ñambovyʼaseha Jehovápe. ¿Mbaʼe ótra kósapa ikatu ñanepytyvõ ñaperdona hag̃ua oĩ jave ofalláva ha ani hag̃ua ñandepochypa rei?

16, 17. ¿Mbaʼépa ñanepytyvõta ñambohasa reínte hag̃ua ñane ermanokuéra fálla mimi? Emoĩ peteĩ ehémplo. (Ehecha pe taʼanga).

¹⁶ Jajesareko vaʼerã umi mbaʼe porã orekóvare ñane ermanokuéra ha ani idefektokuérarente. Ñamoĩmi peteĩ ehémplo, ñapensami ñañembyatyha ermanokuérandi ñande rógape. Upéi ohopotápe hikuái ñasẽ oñondivepa la fótope ha ñanohẽ voi unos kuánto oĩrõ g̃uarã nosẽporãiva. Upe rire jarrevisa ha jatopa peteĩva umi fótope peteĩ ermáno nosẽporãi hague. ¿Mbaʼépa jajapóta? Ñaeliminánte, pórke jareko hetave fóto enterovéva osẽ porã haguépe ha pe ermáno avei opukavy haguépe.

¹⁷ Ñakomparamína umi fóto umi mbaʼe jahasávare ñane ermanokuérandi. Ñande ningo jareko heta rrekuérdo porã hendivekuéra, péro ñamoĩ chupe upeichahágui peteĩ ermáno térã ermána ojapoha álgo nañandegustapáiva. ¿Jasegítapa ñapensa upévare  térã jaipeʼáta ñane akãgui ñaeliminarõguáicha ñande selulárgui peteĩ fóto osẽ vai haguépe álgien? (Prov. 19:11; Efes. 4:32). Ikatúta ningo ñanderesarái ñane ermanokuéra fálla mimígui, pórke jahasáma hetaiterei mbaʼe porã hendivekuéra ha ñanemanduʼave umívare ke la idefektokuérare. Upévare, ñañehaʼãkena siémpre ñanemanduʼa umi mbaʼe porã jahasávare ñane ermanokuérandi.

18. ¿Mbaʼe mbaʼépa jahecháma ko artíkulope?

¹⁸ ¿Mbaʼérepa iñimportánte jahayhu ñane ermanokuérape? Jahecháma haguéicha jahayhúramo chupekuéra jahechaukáta hína jahayhuha Jehovápe. ¿Ha mbaʼéichapa jahechaukáta jahayhuha ñane ermanokuérape? Upearã tekotevẽ ñakonsola chupekuéra. Jasegíta ñaporokonsola, jaiporiahuverekóramo ñande rapichápe. ¿Ha mbaʼéichapa jasegíta jajoayhu ñande pyʼaite guive? Tekotevẽ ñaperdona ñane ermanokuéra fálla mimi ijetuʼúramo jepe sapyʼánte.

19. ¿Mbaʼérepa koʼág̃arupi koʼýte jajoayhu vaʼerã?

¹⁹ ¿Mbaʼérepa koʼág̃arupi koʼýte iñimportánte jajoayhu? Apóstol Pedro omombeʼu ñandéve mbaʼérepa: ‘Hiʼag̃uimbaitéma entéro mbaʼe oñemohuʼã hag̃ua. Upévare koʼýte pejoayhu vaʼerã pende pyʼaite guive’ (1 Ped. 4:​7, 8). Ko múndo aña oñehundi potaitéma ha amedída ke hiʼag̃ui pe fin, ¿mbaʼépa oikóta? Jesús heʼi vaʼekue: “Umi hénte opa tetãygua ndaijaʼemoʼãi penderehe peẽ haʼe haguére che disípulo” (Mat. 24:9). Ñaaguanta hag̃ua upe situasión ñaikotevẽmante ñane ermanokuérare ha jasegi vaʼerã ñaĩ unído. Jajoayhúramo, Satanás ni mbaʼevéicharõ ndaikatumoʼãi ñandedividi, “pórke pe mborayhu oipytyvõ enterovépe oĩ hag̃ua unído oñondivepa” (Col. 3:14; Filip. 2:​1, 2).