TOPIKO SA KOBER | INTERESADO BALA ANG DIOS SA IMO?
Nagapakigsuod sa Imo ang Dios
“Wala sing tawo nga makakari sa akon kon indi sia pagbuyukon sang Amay nga nagpadala sa akon.”
NGAA NAGADUHADUHA ANG IBAN? Madamo sang nagapati sa Dios ang nagabatyag nga indi sila suod sa iya. “Para sa akon, ang Dios amo ang nagtuga sang tanan nga butang,” aku ni Christina nga taga-Ireland nga nagasimba kada semana. “Pero indi ko sia kilala. Indi ako suod sa iya.”
ANO ANG GINATUDLO SANG PULONG SANG DIOS? Kon daw wala na kita sing mahimo pa, wala kita ginapabay-an ni Jehova. Gin-ilustrar ni Jesus kon paano nagaulikid ang Dios sa aton: “Kon ang isa ka tawo may isa ka gatos ka karnero kag magtalang ang isa sini, indi bala bayaan niya ang kasiaman kag siam sa mga bakulod kag maglakat agod pangitaon ang isa nga nagtalang?” Ano ang aton matun-an? “Subong man indi luyag sang akon Amay nga yara sa langit nga ang isa sining mga kubos malaglag.”
Ang tagsa “sining mga kubos” hamili sa Dios. Paano ‘ginapangita sang Dios ang isa nga nagtalang’? Suno sa teksto nga ginsambit sa ibabaw, ginabuyok ni Jehova ang mga tawo sa iya.
Sin-o subong ang nagakadto sa mga balay kag sa publiko nga mga lugar para isugid ang mensahe sang Biblia parte sa Dios?
Binagbinaga kon paano ginabuyok ni Jehova ang sinsero nga mga tawo. Sang unang siglo C.E., ginpadala sang Dios ang Cristiano nga disipulo nga si Felipe para makig-angot sa Etiopianhon nga opisyal kag gin-istoryahan nila ang kahulugan sang tagna sa Biblia nga ginabasa sini. (Binuhatan 8:26-39) Sang ulihi, gingiyahan sang Dios si apostol Pedro nga kadtuan ang Romano nga opisyal nga si Cornelio, nga nagapangamuyo kag nagatinguha nga simbahon ang Dios. (Binuhatan 10:1-48) Gingiyahan man sang Dios si apostol Pablo kag ang iya mga kaupdanan pakadto sa suba sa gua sang siudad sang Filipos. Naistorya nila didto ang “isa ka sumilimba sang Dios” nga si Lidia, kag “ginbuksan ni Jehova ang iya tagipusuon” agod mamati.
Ginapat-od gid ni Jehova nga ang mga nagapangita sa iya may kahigayunan nga makilala sia. Sin-o subong ang nagakadto sa mga balay kag sa publiko nga mga lugar para isugid ang mensahe sang Biblia parte sa Dios? Madamo ang magasabat, “Mga Saksi ni Jehova.” Pamangkuta ang imo kaugalingon, ‘Indi ayhan nga ginagamit sila sang Dios para mangin suod sia sa akon?’ Ginapalig-on ka namon nga mangamuyo sa Dios nga buligan ka nga batunon ang iya mga panikasog nga mangin suod ka sa iya. *
^ par. 8 Para sa dugang nga impormasyon, tan-awa ang video nga Ngaa Dapat Tun-an ang Biblia? sa www.dan124.com/hil.
Basi Manamian Ka Man
PARTE SA AMON
Ngaa Dapat Tun-an ang Biblia?
Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?
