NGAA NAGADUHADUHA ANG IBAN? Bisan pa nagakinahanglan gid ang iban sing lugpay, nagabatyag sila nga maiyaiyahon sila kon pangabayon nila ang Dios nga magpasilabot kag magbulig sa ila nga malandas ang ila mga problema. “Sa kadamo sang tawo sa kalibutan—kag sa ka daku sang ila mga problema,” siling ni Raquel, “ang akon mga problema tuman ka gamay amo nga nagapangalag-ag ako nga magpabulig sa Dios.”

ANO ANG GINATUDLO SANG PULONG SANG DIOS? Daku na ang nahimo sang Dios sa pagbulig kag paglugpay sa mga tawo. Ang tanan sa kalibutan subong nakapanubli sang sala amo nga indi naton matuman ang tanan nga ginapatuman sang Dios. Pero, “ginhigugma [kita sang Dios] kag ginpadala ang iya Anak [si Jesucristo] subong nagapasag-uli nga halad para sa aton mga sala.” (1 Juan 4:10) Paagi sa kamatayon ni Jesus, mapatawad sang Dios ang aton mga sala, may matinlo kita nga konsiensia, kag may paglaum nga kabuhi nga walay katapusan sa mahidaiton nga bag-ong kalibutan. * Ini bala nga halad para lang sa katawhan sa kabilugan, ukon ginapakita bala sini nga interesado ang Dios sa imo mismo?

Binagbinaga si apostol Pablo. Natandog gid sia sa halad ni Jesus amo nga nagsulat sia: “[Nagakabuhi ako] sa pagtuo sa Anak sang Dios, nga naghigugma sa akon kag nagtugyan sang iya kaugalingon para sa akon.” (Galacia 2:20) Napatay si Jesus antes nangin Cristiano si Pablo. Pero, ginkabig ni Pablo ina nga halad nga personal nga regalo sang Dios sa iya.

Ang kamatayon ni Jesus personal man nga regalo sang Dios sa imo. Ina nga regalo nagapamatuod nga ginapabaloran ka sang Dios. Makahatag ini sa imo sing “wala katapusan nga lugpay kag maayong paglaum” kag gani “magpalig-on sa inyo sa tagsa ka maayong buhat kag pulong.”—2 Tesalonica 2:16, 17.

Pero, ginhalad ni Jesus ang iya kabuhi sing halos 2,000 ka tuig na ang nagligad. Ano ang pamatuod nga gusto sang Dios nga mangin suod ka sa iya subong?