Ginatudlo Bala sang Biblia ang Reinkarnasyon?
Ang sabat sang Biblia
Wala. Ang tinaga nga “reinkarnasyon” ukon ang ideya sini indi mabasa sa Biblia. Ang pagpati sa reinkarnasyon nabase sa panudlo nga ang kalag indi mapatay. a Pero ginatudlo sang Biblia nga ang kalag amo ang tawo mismo kag gani nagakapatay ini. (Genesis 2:7, footnote; Ezequiel 18:4) Kon mapatay ang isa ka persona wala na sia nagaluntad.—Genesis 3:19; Manugwali 9:5, 6.
Ano ang kinalain sang reinkarnasyon sa pagkabanhaw?
Ang panudlo sang Biblia parte sa pagkabanhaw wala nabase sa doktrina nga ang kalag wala nagakapatay. Sa pagkabanhaw, ang mga tawo nga napatay mabuhi liwat paagi sa gahom sang Dios. (Mateo 22:23, 29; Binuhatan 24:15) Ang pagkabanhaw nagahatag sing matahom nga paglaum nga ang isa mabuhi liwat sa isa ka bag-o nga duta kag posible indi na gid mapatay liwat.—2 Pedro 3:13; Bugna 21:3, 4.
Sayop nga pagpati parte sa reinkarnasyon kag ang ginatudlo sang Biblia
Sayop nga pagpati: Ang Biblia nagsiling nga si manalagna Elias nabuhi liwat bilang si Juan nga Manugbawtismo.
Kamatuoran: Ang Dios nagtagna: “Ipadala ko sa inyo si Elias nga manalagna,” kag ginpakita ni Jesus nga gintuman ni Juan nga Manugbawtismo ini nga tagna. (Malaquias 4:5, 6; Mateo 11:13, 14) Pero indi buot silingon sini nga si Elias nabuhi liwat bilang si Juan nga Manugbawtismo. Si Juan mismo nagsiling nga indi sia si Elias. (Juan 1:21) Kundi ang mga ginhimo ni Juan pareho sa ginhimo ni Elias. Nagwali sia sang mensahe sang Dios nga maghinulsol ang mga tawo. (1 Hari 18:36, 37; Mateo 3:1) Ginpakita man ni Juan nga ‘may kusog sia kag gahom kaangay kay Elias nga propeta.’—Lucas 1:13-17, Maayong Balita nga Biblia.
Sayop nga pagpati: Ginapatuhuyan sang Biblia ang reinkarnasyon subong ‘pagkabun-ag liwat.’
Kamatuoran: Ginapakita sang Biblia nga ang pagkabun-ag liwat amo ang pagkatawo liwat sa espirituwal nga nagakatabo samtang buhi pa ang isa. (Juan 1:12, 13) Ini nga pagkabun-ag liwat, indi resulta sang nahimo sang nagligad, kundi isa ini ka pagpakamaayo sang Dios. Amo nga ang mga nagabaton sini may pinasahi nga paglaum sa palaabuton.—Juan 3:3; 1 Pedro 1:3, 4.
a Ang pagpati nga ang kalag wala nagakapatay kag ang reinkarnasyon halin pa sa Babilonia sang una. Sang ulihi, ang mga philosopher sa India naghimo sang doktrina nga Karma. Suno sa Britannica Encyclopedia of World Religions, ang Karma amo ang pagpati nga “ang ginahimo subong sang isa may epekto sa iya masunod nga kabuhi.”—Pahina 913.
Basi Manamian Ka Man
SABAT SA MGA PAMANGKOT SA BIBLIA
Ano ang Buot Silingon sang Mabun-ag Liwat?
Kinahanglan ka bala mabun-ag liwat para mangin Cristiano?
IMPORTANTE NGA MGA PANUDLO SANG BIBLIA
Ano ang Kahimtangan sang mga Patay?
Ang Biblia nagapromisa nga maabot ang tion nga banhawon ang madamo nga tawo nga napatay, pareho sa ginhimo kay Lazaro.
SABAT SA MGA PAMANGKOT SA BIBLIA
Ano ang Kalag?
Ara bala ini sa sulod mo? Buhi bala ini gihapon bisan patay ka na?
ANG LALANTAWAN
Nagapati Ka Bala nga Nabuhi Ka Na Sadto?
Bantog ang pagpati sa reinkarnasyon. Pero ginatudlo bala ini sang Biblia?
PANUDLO SANG BIBLIA
Testingi ang Amon Pagtuon sa Biblia
Testingi ang libre nga interactive nga pagtuon sa Biblia upod sa isa ka instruktor.