APENDIKS
Daniela Ena Peroveta Herevana ese Mesia Ena Mai Ia Perovetalaia Dalana
PEROVETA tauna Daniela ia noho bena lagani 500 mai kahana idia hanaia murinai, Iesu ia vara. To Iehova ese Daniela dekenai ia gwauraia herevana ese ita ia durua, Iesu be Mesia eiava Keriso ai ia lao negana ita diba totona. Daniela ia hamaoroa: “Namona be do oi diba bona emu lalona danu do ia parara, Ierusalema hanamoa lou bona haginia lou herevana do ia hedinarai negana ela bona Mesia, Hakaua Tauna, do ia mai be pura 7 bona pura 62.”—Daniela 9:25, NW.
Mesia ia ginidae negana ita diba totona, namona be Mesia ia mai negana ena matamana ita diba. Unai peroveta herevana hegeregerena, unai nega be “Ierusalema hanamoa lou bona haginia lou herevana” idia gwauraia neganai ia matamaia. Unai be edena negai ia vara? Baibel torea tauna Nehemia ia gwau bamona, Ierusalema ena magu haginia lou herevana be “King Aratasaseta ena lohia laganina 20 ai” idia halasia. (Nehemia 2:1, 5-8; BHğ) Histori torea taudia ese idia hamomokania lagani 474 B.C.E. be King Aratasaseta ena lohia laganina ginigunana. Unai dainai, King Aratasaseta ena lohia laganina 20 be lagani 455 B.C.E. ai ia matamaia. Hari ita diba Daniela ena Mesia peroveta herevana be lagani 455 B.C.E. ai ia matamaia.
Daniela ia gwau pura hida do idia hanaia bena “Mesia, Hakaua Tauna” do ia ginidae. Unai peroveta herevana ese “pura 7 bona pura 62”—pura ibounai 69 unai—ia gwauraia. Unai nega ena lata be edena bamona? Baibel momo ese idia hahedinaraia, unai be pura mai edia dina 7 lasi, to idia be lagani edia pura. Anina be, pura ta ta be lagani 7 ia laulaulaia. Idaunega Iuda taudia be unai idia diba. Hegeregere, lagani namba 7 iboudiai, idia ese Sabati laganina idia hahelagaia. (Esodo 23:10, 11) Unai dainai, peroveta herevana ese ia gwauraia pura 69 be lagani 7 ida oi taims neganai, lagani ibounai 483 oi abia.
Mani lagani ibounai ita duahia. Bema lagani 455 B.C.E. amo lagani ibounai 483 ita duahia neganai, lagani 29 C.E. do ita abia. Unai lagani dekenai Iesu be bapatiso ia abia bona Mesia ai ia lao! * (Luka 3:1, 2, 21, 22) Unai Baibel ena peroveta herevana ia guguru karana ese iseda abidadama ia hagoadaia, ani?
^ par. 6 Lagani 455 B.C.E. amo ita duahia ela bona lagani 1 B.C.E. be lagani ibounai 454. Bona lagani 1 B.C.E. amo ia lao lagani 1 C.E. be lagani tamona (lagani siro be lasi). Bona lagani 1 C.E. amo ita duahia ela bona lagani 29 C.E. be lagani ibounai 28. Vadaeni, bema unai lagani toi (lagani 454, 1 bona 28) ita hakapua neganai, lagani ibounai 483 ita abia. Iesu be lagani 33 C.E., unai be lagani edia pura namba 70 ai, idia “hamasea.” (Daniela 9:24, 26) Daniela Ena Peroveta Herevana! ena karoa 11 bona Insight on the Scriptures, Volium 2, rau 899-901 itaia. Unai buka rua be Iehova ena Witnes taudia ese idia karaia.
