TANOBADA ena kahana momo dekenai, tomadiho eiava tanobada ena dina badadia moalelaia karana be Baibel ese ia gwauraia lasi. Vadaeni, unai bamona dina badadia be edena bamona idia matamaia? Bema laiberi ta dekenai emu hetahu karana oi karaia, buka idauidau ese emu gabu dekenai idia moalelaia dina badadia idia herevalaia dalana oi laloa. Haheitalai haida mani ita itaia.

 Ista. Buka ta (The Encyclopædia Britannica) ia gwau: “Taravatu Matamatana lalonai Ista hahelagaia karana idia gwauraia lasi.” Ista be edena bamona ia matamaia? Ista be Dirava koikoi tomadiho henia taudia ese idia matamaia. Idia gwau unai nega ai, taunimanima ese Iesu ena toreisi lou idia laloatao, to unai nega ai idia karaia karadia be Keristani kara lasi. Hegeregere, buka ta (The Catholic Encyclopedia) ese “Ista rabiti” be inai bamona ia gwauraia: “Rabiti be Dirava koikoi tomadiho henia taudia edia toana badana ta bona idaunega amo ema bona hari ia be natuna havaraia siahuna ena toana.”

Lagani Matamata Ena Moale Karadia. Tano momo dekenai Lagani Matamata ena deit bona ena kastom be idauidau. Buka ta (The World Book Encyclopedia) ese unai dina ena matamana be inai bamona ia gwauraia: “Lagani 46 B.C. ai, Roma ena pavapava, Julius Caesar, ese January 1 ia gwauraia Lagani Matamatana. Roma taudia ese unai dina be Janus​—ikoukou, iduara, bona gau idauidau edia matamana edia dirava​—totona idia hahelagaia. January hua ena ladana be Janus diravana amo ia abia. Unai dirava be mai ena vairana rua​—ta be vaira kahana ia itaia bona ta be muri kahana ia itaia.” Unai dainai Lagani Matamata ena moale karadia be dirava koikoi tomadiho henia taudia ese idia hamatamaia.

Dina Badadia Ma Haida. Tanobada hegegemadai idia noho taudia ese idia moalelaia dina badadia ibounai ita herevalaia diba lasi. To, taunimanima edia ladana, eiava edia orea idia abia isi dina badadia be Iehova ese ia abia dae lasi. (Ieremia 17:​5-7; Kara 10:​25, 26) Laloaboio lasi, tomadiho idauidau edia dina badadia edia matamaia dalana ese do ia hahedinaraia, idia be Dirava ese ia abia dae eiava lasi. (Isaia 52:11; Apokalupo 18:4) Inai buka ena Karoa 16 ai ia noho Baibel ena hakaua herevadia, ese oi do idia durua Dirava ena lalohadai tanobada ena dina badadia moalelaia karadia dekenai oi abia totona.