Famili Maurina Bona Hetura Karana
Taunimanima momo idia laloa famili bona turadia tura henia karana be ia auka. Baibel ena hakaua herevadia haida ese oi ia durua diba ma haida ida emu hetura karana ia hanamoa dalana mani oi laloa.
SIBONA EMU NAMO OI LALOA LASI
BAIBEL ENA HAKAUA HEREVANA: “Sibona emui namo do umui laloa lasi, to ma haida edia namo danu do umui laloa.”—Filipi 2:4.
ANINA BE DAHAKA: Ma haida ida emu hetura karana ia namo totona henia karana be gau badana, to abia karana amo lasi. Bema emu mauri ai sibona emu namo laloa bada karana oi badinaia, ma haida ida emu hetura karana ia hadikaia diba. Hegeregere, sibona ena namo ia laloa bada headava tau eiava hahine ese ena tau o hahine do ia lalokau henia lasi. Danu, taunimanima idia ura lasi nega momo ena kohu o ena diba ia heagilaia tauna idia tura henia. Buka ta ladana, The Road to Character ia gwau, “sibona idia laloa bada bona ma haida idia laloa bada lasi taudia be hekwakwanai momo idia davaria.”
DAHAKA OI KARAIA DIBA?
Ma haida durua. Tura namodia be ta ta idia laloa bada bona hanaihanai idia noho hegaegae ta ta idia durua totona. Stadi haida idia gwau, ma haida idia durua taudia be idia lalohisihisi momo lasi bona sibodia idia hagoadaia.
Ma haida edia hemami laloa. Ma haida edia hemami laloa karana ena anina be emu kudouna lalonai iena hisihisi oi mamia. Bema ma haida edia hemami oi laloa, hereva kereredia do oi gwauraia lasi, hegeregere oi laloa unai be hevaseha herevadia to unai ese ma haida edia hemami ia hahisia diba.
Hebogahisi karana oi laloa neganai, oi hahedinaraia haida oi laloa bada. Hebogahisi karana ese oi ia durua diba ta inai henia karana oi dadaraia totona, bona bese o mauri dala idauidau taudia oi tura henia totona.
Nega oi atoa taunimanima ida oi hebamo. Nega oi atoa ma haida ida oi hebamo neganai, idia do oi diba namonamo. Bema oi ura tura namona ta oi davaria, namona be ia ura henia bona ia laloa bada gaudia oi herevalaia. Bona iena hereva oi kamonai namonamo. Danu ena lalohekwarahi gaudia oi laloa bada. Vanegai, idia karaia tahua gaukarana ta ia gwau, “mai anina bada gaudia herevalaia karana ese taunimanima ia hamoalea.”
TURADIA ABIA HIDI NAMONAMO
BAIBEL ENA HAKAUA HEREVANA: “Hebamo dikadia ese ta ena kara namodia idia hadikaia diba.”—1 Korinto 15:33.
ANINA BE DAHAKA: Nega momo oi bamoa taudia ese emu kara do idia hanamoa eiava hadikaia. Taunimanima edia noho dalana idia stadilaia taudia idia gwau, ta ena turadia ese ena mauri dalana idia haidaua diba. Hegeregere, bema tau ta ena turadia be kuku idia ania eiava edia adavadia idia divos, reana ena turadia edia kara ia tohotohoa diba.
DAHAKA OI KARAIA DIBA? Namona be oi tura henia taudia be oi ura henia karadia o oi ura tohotohoa karadia idia hahedinaraia. Hegeregere, oi ura ma haida edia hemami idia laloa bada, hemataurai, hariharibada bona heabidae karana idia hahedinaraia taudia oi bamoa.
BAIBEL ENA HAKAUA HEREVA MA HAIDA
Idia karaia Baibel-vidio ese headava taudia, matamata taudia, bona natudia ia durua edia famili maurina idia hanamoa totona, oi itaia diba
HAHISIA HEREVADIA DADARAIA.
“Ia hereva haraga tauna ena hereva, be tuari kaia ia gwadaia noho bamona.”—AONEGA HEREVADIA 12:18.
HARIHARIBADA KARANA HAHEDINARAIA.
Hariharibada tauna be do ia “noho namo.”—AONEGA HEREVADIA 11:25.
HAIDA OI KARA HENIA HEGEREGERENA OI URA OI IDIA KARA HENIA.
“Gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”—MATAIO 7:12.
