BAIBEL ENA HAKAUA HEREVANA: “Haheauka tauna ese, tuari tauna goadana ia hereaia noho.”​—Aonega Herevadia 16:32.

ANINA BE DAHAKA: Bema mai lalogoada ida iseda hemami ita biagua, namo do ita davaria. Ena be badina maorona dainai ita badu, to bema iseda badu ita biagua lasi, dika bada ia havaraia diba. Hari idia noho diba bada taudia haida idia gwau, taunimanima idia badu neganai idia laloa namonamo lasi bona idia gwauraia o karaia gaudia haida be gabeai idia lalohisihisilaia.

DAHAKA OI KARAIA DIBA? Namona be emu badu oi biagua karana oi dibaia. Taunimanima haida idia laloa badu taudia be mai edia goada, to momokani idia be goada lasi. Baibel ia gwau: “Ia badu neganai mai ena haheauka lasi tauna, be hanua ta mai ena magu lasi bamona, idia hadikaia ore vadaeni.” (Aonega Herevadia 25:28)Emu badu oi biagua dalana ta be, hereva o kara ta oi do karaia lasi neganai, ia vara gauna ena badina oi tahua guna. “Tau ta ena aonega ese haheauka ia henia noho, vadaeni ia badu haraga lasi.” (Aonega Herevadia 19:11) Ita ura ta ta ena hereva ita kamonai namonamo, unai ese ita dekenai laloparara ia henia iseda hemami ita biagua totona.

BAIBEL ENA HAKAUA HEREVANA: “Tanikiu karana do umui hahedinaraia.”​—Kolose 3:15.

ANINA BE DAHAKA: Haida idia gwau, tanikiu karana ia hahedinaraia tauna be ia moale. Bona edia lalokau tauna ta o dava bada gauna ta idia haboioa taudia haida idia gwau unai be momokani. Idia gwau unai hemami idia hanaia totona, idia haboioa gaudia idia laloa bada lasi, to idia dekenai idia noho gaudia dainai, edia tanikiu karana do idia hahedinaraia.

DAHAKA OI KARAIA DIBA? Namona be dina ta ta ai, oi moalelaia gaudia ena lista oi torea. Idia be gau badadia sibona lasi to gau maragidia danu. Hegeregere dina ia daekau ena hairai, lalokau tauna ida oi herevalaia gaudia, eiava dina ma ta ena mauri oi moalelaia. Unai gau namodia ese emu hemami ia hanamoa diba bema nega oi atoa unai gaudia oi laloa bona moalelaia.

Danu emu famili bona turadia dainai oi moale ena badina oi laloa neganai, unai ese oi do ia durua bada. Bema taunimanima haida edia kara namodia oi itaia bona oi moalelaia, namona be idia oi hereva henia, eiava revareva, e-mail o teks meseij amo emu hanamoa herevadia oi siaia diba. Unai ese emu hetura karana ma haida ida do ia hagoadaia bona do oi moale badina idia totona gau namodia oi karaia.​—Kara 20:35.

HEPAPAHUAHU HEREVADIA AMO OI RAKA SIRI.

“Heai hamatamaia kara, be ranu bada gabuna ena magu makohia kara bamona. Unai dainai heai do ia vara lasi neganai, do oi raka siri.”​—AONEGA HEREVADIA 17:14.

VAIRA NEGA TOTONA LALOHEKWARAHI LASI.

“Unai dainai, kerukeru totona umui lalohekwarahi lasi, badina kerukeru danu be mai ena lalohekwarahi. Dina ta ena metau be unai dina sibona ena.”​—MATAIO 6:34.

KARA TA OI DO KARAIA LASI NEGANAI, OI LALOA NAMONAMO GUNA.

“Oiemu laloa kehoa bona oiemu diba maoro ese, oiemu mauri do idia naria namonamo.”​—AONEGA HEREVADIA 2:11.