1. Terangka kebuah nya beguna ngadang enggau jam tauka utai ke benung nyadi ngelingi kitai. (Peda gambar ba pun artikel.)

GEMPURU besai nyauka berengkah. Chairman nuju pentas, lalu ngelaluka penatai semua orang. Musik nyauka berengkah. Bala ke datai nemu, nya maya sida patut duduk. Sida deka ninga musik ti ngerinduka ati, lalu sida nganti cheramah ti deka dikenataika. Tang, sekeda bala ke datai enda beratika chairman nya tauka enda ibuhka musik ke ditebah. Nya alai, sida enda sedar gempuru besai benung berengkah. Sida agi bejalai kin kitu tauka berandau enggau bala kawan sida. Pekara tu mandangka utai ke ulih nyadi enti kitai enda ngadang enggau jam tauka utai ke benung nyadi ngelingi kitai. Tu lalau ti beguna ke kitai laban enda lama da agi bisi utai ke besai agi deka berengkah, lalu kitai enda tau enda besedia enggau utai nya. Nama utai nya?

2. Nama kebuah Jesus ngasuh bala murid iya “bejaga”?

² Jesus Kristus nangkan bala murid iya pasal kebuah patut mengkang bejaga, lalu besedia enggau “pengujung dunya.” Iya ngasuh sida: “Bejaga, besedia, laban kita enda nemu kemaya hari nya deka datai.” Udah nya iya berapa kali madah ngagai sida: “Bejaga.” (Mat. 24:3; bacha Mark 13:32-37.) Cherita ba bup Matthew mega madahka, Jesus nangkan bala murid iya pasal utai tu. Iya ngasuh sida: ‘Nya  alai, bejaga kita, laban kita enda nemu hari Tuan kita deka datai.’ Lalu iya nangkan sida baru: “Kita enda tau enda sedia, laban Anak Mensia deka datai ba jam ti enda disangka kita.” Udah nya, iya nandu: “Nya alai bejaga kita, laban kita enda nemu hari tauka jam.”—Mat. 24:42-44; 25:13.

3. Nama kebuah kitai beratika tangkan ari Jesus?

³ Saksi-Saksi Jehovah beratika tangkan ke diberi Jesus. Kitai nemu, kitai benung idup ba “pengujung dunya,” lalu “penusah ti besai” deka berengkah enda lama da agi! (Dan. 12:4; Mat. 24:21) Baka ke dipadah Jesus, nembiak Jehovah benung nusui berita manah pasal Perintah Petara di serata dunya. Ba maya ti sama, kitai meda perang, penyakit, tanah berenyang sereta lapar pungkang ba mayuh endur. Bisi pengarap ti nyarutka runding, mayuh penyai sereta ulah ti kasar ari ke udah. (Mat. 24:7, 11, 12, 14; Luk. 21:11) Kitai diatu enda sabar nganti jam Jesus deka datai, lalu ngamatka tuju Apai iya.—Mrk. 13:26, 27.

4. (a) Nama kebuah kitai ulih pechaya Jesus diatu nemu kemaya Armagedon deka nyadi? (b) Taja pan kitai enda nemu kemaya penusah ti besai deka berengkah, nama ulih dipechayaka kitai?

⁴ Lebuh kitai datai ke gempuru besai, kitai nemu jam tiap iti sesi deka berengkah. Tang kitai enda nemu enggau nyemetak kemaya penusah ti besai deka berengkah. Lebuh ba dunya, Jesus madahka: “Tang nadai orang nemu hari tauka jam utai tu deka nyadi. Melikat ke di serega enda nemu, lalu Anak Mensia pen enda mega nemu. Semina Apai aja nemu.” (Mat. 24:36) Endang amat, laban Jesus nya orang ke deka ngulu ba perang Armagedon, iya diatu tentu nemu kemaya perang nya deka nyadi. (Pem. 19:11-16) Tang kitai agi enda nemu haribulan tauka jam pengujung nya deka datai. Nya kebuah beguna bendar kitai terus bejaga. Jehovah udah netapka kemaya penusah ti besai deka berengkah, lalu hari nya majak semak-sesemak. “Iya enda masau jam.” (Bacha Habakuk 2:1-3.) Nama kebuah kitai ulih pechaya ke tu?

5. Beri siti chunto kena nunjukka utai ti dipadah Jehovah pasal jemah ila endang seruran dikeamatka ba maya ti udah ditetapka.

⁵ Utai ti dipadah Jehovah pasal jemah ila seruran dikeamatka ba maya ti udah ditetapka! Ngambika chunto, pikirka pasal maya Iya ngelepaska nembiak Iya ari menua Ejip. Maya nya, 14 Nisan kena taun 1513 sebedau Kristus ada. Udah nya, Moses nulis pasal hari nya: ‘Lalu ba ujung empat ratus tiga puluh taun nya, ba hari nya, semua nembiak Jehovah angkat magang ari menua Ejip.’ (P-sut. 12:40-42) Kena 14 Nisan ba taun 1943 sebedau Kristus ada, 430 taun sebedau orang Israel dilepaska, semaya Jehovah ke deka merekatka peturun Abraham pan berengkah. (Gal. 3:17, 18) Enda lama udah nya, Jehovah madah ngagai Abraham: “Nuan enda tau enda nemu tu: bala peturun nuan deka nyadi orang kampar di menua bukai. Sida deka nyadi ulun di menua nya, lalu deka kena perinsa empat ratus taun.” (P-kal. 15:13; SKR. 7:6) Timpuh 400 taun nya berengkah ba taun 1913 sebedau Kristus ada, maya nya Ismail berengkah beduan Isak. Dua iti timpuh nya abis maya Jehovah ngelepaska orang Israel ari menua Ejip. (P-kal. 21:8-10; Gal. 4:22-29) Amat, beratus-ratus taun dulu agi, Jehovah udah netapka hari Iya deka ngelepaska nembiak Iya!

6. Nama kebuah kitai ulih pechaya Jehovah deka nyelamatka nembiak Iya?

⁶ Josua nya seiku ari orang Israel ke dilepaska ari menua Ejip. Betaun-taun udah nya, iya ngingatka orang Israel: ‘Genap iku  kita nemu dalam ati enggau dalam semengat kita, Jehovah Petara kita udah meri ngagai kita semua utai ti manah, ti udah disemaya Iya. Genap semaya ti udah digaga Iya, udah dikamatka Iya magang. Nadai siti semaya nya ti enda dikamatka Iya.’ (Jos. 23:2, 14) Jehovah udah besemaya deka nyelamatka nembiak Iya ari penusah ti besai, lalu meri sida pengidup ti meruan belama iya ba dunya baru. Lalu kitai ulih pechaya, semaya Iya deka dikeamatka. Nya alai, enti kitai deka diau ba dunya baru nya, kitai enda tau enda terus bejaga.

7, 8. (a) Nama pengawa jejaga kelia menya, lalu nama ulih dipelajarka kitai ari iya? (b) Beri siti chunto pasal utai ke ulih nyadi enti bala jejaga tinduk lebuh bejalaika pengawa.

⁷ Kitai ulih belajar ari bala jejaga ke nyaga nengeri kelia menya. Mayuh ari nengeri nya, nyengkaum nengeri Jerusalem, dikelingi dinding kuta ti tinggi ngambika munsuh enda ulih tama. Bala jejaga bediri ba atas dinding kuta, lalu ari endur nya, sida ulih meda semua utai ti ngelingi nengeri nya. Bala jejaga ke bukai bediri ba pintu penama ngagai kuta. Sida patut terus bejaga siang malam, lalu enti sida meda munsuh datai, sida patut megau orang ba nengeri nya. (Isa. 62:6) Sida nemu, endang beguna mengkang bejaga sereta beratika utai ke benung nyadi. Enti sida enda, mayuh orang deka mati.—Esk. 33:6.

⁸ Josephus, ke nulis pasal sejarah orang Judah, madahka chara orang Rome ulih tama ngagai nengeri orang Jerusalem ba taun 70 pengudah Kristus ada. Bala jegaga ke nyaga sekeda ari nengeri nya udah tinduk. Ketegal nya, soldadu Rome ulih tama ngagai nengeri nya. Sida ngagai Rumah Sembiang, nunu iya, lalu ngerusak semua utai ba nengeri Jerusalem. Nya meh penusah ti pemadu besai ke kala ditapi bansa Judah.

9. Nama utai ke enda ditemu orang kemaya hari tu?

⁹ Mayuh perintah kemaya hari tu nyaga adan entara menua ngena bala soldadu sereta ngena teknologi ke pemadu baru dalam sistem pengelikun. Bala perintah ngemataka sapa-sapa tauka sebarang utai ke ulih ngachau pengelikun menua sida. Tang sida enda sedar, bisi siti perintah ke bekuasa agi ba serega ke diperintah Jesus Kristus. Enda lama da agi, perintah nya deka beperang ngelaban semua perintah ba dunya tu. (Isa. 9:6, 7; 56:10; Dan. 2:44) Kitai enda sabar nganti hari nya datai, lalu deka sedia ke penatai hari nya. Nya alai, kitai patut beratika utai ti dipadah Bup Kudus pasal jemah ila, lalu terus nyembah Jehovah enggau tetap ati.—Mas. 130:6.

10, 11. (a) Kitai enda tau enda bejimat enggau utai nama, lalu nama kebuah? (b) Nama ngasuh nuan pechaya Sitan nya ke ngasuh orang enda bedulika utai ti dipadah Bup Kudus pasal jemah ila?

¹⁰ Uji gambarka seiku jejaga ke enda tinduk sepemanjai malam. Berapa jam sebedau timpuh iya bejaga abis, iya tusah agi deka mengkang bejaga laban iya kelalu lelak. Pia mega, kitai benung idup ba hari ti penudi ba dunya tu. Lalu semak agi kitai enggau pengujung, tusah agi kitai deka mengkang bejaga. Endang rugi enti kitai enda terus bejaga! Aram kitai berandauka tiga iti pekara ke ulih ngasuh kitai enda mengkang bejaga.

¹¹ Sitan nipu orang. Iya “pemerintah dunya tu.” Enda lama sebedau Jesus mati, iya tiga kali ngelalau bala murid pasal utai tu. (Jhn. 12:31; 14:30; 16:11) Sitan udah ngena  pengarap pelesu nesatka orang. Nya kebuah mayuh orang kemaya hari tu, enda bedulika utai ti dipadah Bup Kudus ke nunjukka pengujung nyau majak semak. (Sep. 1:14) Endang amat, Sitan udah “mampul runding orang ke enda arap.” (2 Kor. 4:3-6) Nya alai, lebuh kitai nguji madah ngagai orang pasal pengujung ke nyau semak, lalu diatu Kristus benung merintah, mayuh ari sida enggai ninga utai ti dipadah kitai. Sida suah nyebut, “Aku enda beminat.”

12. Nama kebuah kitai enda tau ngelakka Sitan nipu kitai?

¹² Taja pan mayuh orang enda beminat enggau utai ti dipadah Bup Kudus pasal jemah ila, kitai enda tau ngelakka ulah sida ngelemika semengat kitai. Kitai nemu kebuah terus bejaga nya beguna. Ku Paul madah ngagai bala menyadi Kristian iya: “Kita empu nemu, Hari Tuhan deka datai.” Iya nambahka: “Baka penchuri ke datai lebuh malam hari.” (Bacha 1 Tesalonika 5:1-6.) Jesus nangkan kitai: “Kita pen enda tau enda mega besedia, laban Anak Mensia deka datai ba maya ti enda disangka kita.” (Luk. 12:39, 40) Enda lama da agi, Sitan deka nipu orang enggau ngasuh sida pechaya dunya tu deka bisi “pemaik sereta likun.” Udah nya, Hari Jehovah deka datai ngenyit, lalu sida deka tekenyit. Baka ni enggau kitai? Enti kitai deka sedia enggau penatai hari nya, lalu enda ditipu baka orang bukai, kitai enda tau enda “seruran dani sereta sedia belama.” Nya kebuah kitai patut macha Jaku Petara ninting hari, lalu belematika utai ti dipadah Jehovah ngagai kitai.

13. Baka ni roh dunya tu ngachau mensia, lalu baka ni kitai ulih nyeliahka iya?

¹³ Roh dunya ngachau chara orang berunding. Mayuh orang kemaya hari tu ngasaika sida tau enda ibuh ngelala Petara. (Mat. 5:3) Tang, sida ngena mayuh jam enggau pengering sida ngulihka mayuh utai ke bisi ba dunya tu. (1 Jhn. 2:16) Pia mega, lebih ari ke udah, bisi mayuh macham pemerindang ke narit ati orang sereta meransang sida ngelantangka diri sereta ngemuaska pengingin sida. (2 Tim. 3:4) Utai tu ngelimpangka orang ari utai ti beguna agi, lalu sida enda berunding pasal kaul sida enggau Petara. Nya kebuah Paul ngelalau orang Kristian, sida “enda tau enda dani” iya nya enda berundingka jalai ngemuaska pengingin sida.—Rom. 13:11-14.

14. Nama tangkan ke bisi ba Luke 21:34, 35?

¹⁴ Kitai deka roh kudus Jehovah, ukai roh dunya ke ngiring chara kitai berunding. Nengah roh kudus Iya, Jehovah udah nulung kitai meretika enggau terang pasal utai ke deka nyadi. (1 Kor. 2:12) ^[1] (Peda nota penutup.) Tang kitai patut bejimat. Indah utai ke biasa ba pengidup ulih ngelimpangka kitai ari nyembah Jehovah. (Bacha Luke 21:34, 35.) Orang bukai engka madahka, kitai beli laban pechaya kitai benung idup ba hari ti penudi ba dunya tu. (2 Pet. 3:3-7) Tang kitai enda tau ngelakka sida ngelemika kitai. Kitai bisi bukti ti nyengala ke nunjukka pengujung nyau deka datai. Enti kitai deka roh kudus Petara ngiring kitai, kitai enda tau enda seruran datai begempuru enggau bala menyadi Kristian kitai.

15. Nama nyadi ngagai Peter, James enggau John, lalu baka ni utai nya mega ulih nyadi ba kitai?

 ¹⁵ Pengelemi diri ngasuh kitai tusah agi deka mengkang bejaga. Jesus nemu, mensia enda sempurna sereta bisi pengelemi. Pikirka pasal utai ti nyadi maya malam sebedau iya mati. Taja pan Jesus sempurna, iya nemu ngambika mengkang tetap ati, iya patut besampi ngagai Apai iya ngambika nulung iya. Jesus ngasuh rasul Peter, James, enggau John mengkang bejaga lebuh iya besampi. Tang sida enda nemu kebuah mengkang bejaga nya beguna ba sida. Sida lelak, lalu tinduk. Jesus pan lelak, tang iya mengkang bejaga sereta besampi ngagai Apai iya. Sida rasul nya mega patut besampi maya nya.—Mrk. 14:32-41.

16. Nitihka Luke 21:36, baka ni Jesus ngasuh kitai terus “bejaga”?

¹⁶ Nama deka nulung kitai terus “bejaga,” lalu besedia enggau penatai Hari Jehovah? Kitai begunaka pengeran kena terus ngereja utai ti ngena. Tang nya enda chukup. Beberapa hari sebedau Jesus mati, iya ngasuh bala murid iya enda ngetu besampi minta tulung ari Jehovah. (Bacha Luke 21:36.) Ngambika mengkang bejaga ba pengujung dunya tu, kitai mega enda tau enda seruran besampi ngagai Jehovah.—1 Pet. 4:7.

17. Baka ni kitai ulih nentuka kitai sedia enggau utai ke deka datai dudi hari?

¹⁷ Jesus madahka, pengujung deka datai “ba jam ti enda disangka kita.” (Mat. 24:44) Nya alai, kitai enda tau enda seruran sedia ba sebarang maya. Diatu ukai maya deka ngembuan gaya pengidup, ke dikumbai dunya Sitan deka mai pengelantang. Nya semina mimpi ngapa. Tang, nengah Bup Kudus, Jehovah enggau Jesus udah madahka chara kitai ulih terus bejaga. Nya alai, aram meh kitai beratika utai ti dipadah Bup Kudus pasal jemah ila sereta baka ni utai nya benung dikeamatka. Lalu arapka kitai terus majak semak agi ngagai Jehovah sereta ngenuluka Perintah Iya ba pengidup kitai. Udah nya, kitai ulih sedia lebuh pengujung datai. (Pem. 22:20) Pengidup kitai bepanggai ba utai tu!