1, 2. (a) Kọwaa ilu Jizọs tụrụ banyere otu nwoke nwere ubi vaịn. (b) Olee otú akụkọ ahụ si gosi otú e si emesapụ aka na otú e si egosi ndị ọzọ obiọma na-erughịrị ha?

OTU nwoke pụrụ n’isi ụtụtụ ịga goo ndị ga-arụrụ ya ọrụ n’ubi vaịn ya. Ya na ndị ọrụ ọ hụrụ kwekọrịtara ego ole ọ ga-akwụ ha, ha arụwa ọrụ. Ma, ọ chọpụtara na ọ chọkwuru ndị ọrụ, ya agaghachị n’otu ebe ahụ ugboro anọ ọzọ gokwuo ndị ọrụ. Ma, ọ gwara ha na ọ ga-akwụ ha ihe kwesịrị ekwesị n’agbanyeghị na ha niile amaliteghị ọrụ otu oge. Mgbe ha rụchara ọrụ ná mgbede, ọ kpọkọtara ha niile kwụọ ha otu ihe ahụ, ma ndị rụrụ ọrụ ọtụtụ awa ma ndị rụrụ naanị otu awa. Mgbe ndị nke bu ụzọ malite ọrụ hụrụ ego ole ọ kwụrụ ha, ha were iwe. Ma nwoke ahụ sịrị ha: ‘Ọ́ bụghị ihe anyị kwekọrịtara ka m kwụrụ unu? Ọ̀ bụ na enweghị m ikike ịkwụ ndị ọrụ m niile ego ole m chọrọ ịkwụ ha? Ka ùnu na-emere m anyaụfụ maka na m bụ ezi mmadụ?’—Mat. 20:1-15.

² Ilu a Jizọs tụrụ na-akụziri anyị otu ihe dị́ mkpa banyere “obiọma na-erughịrị mmadụ” Jehova na-egosi anyị. (Gụọ 2 Ndị Kọrịnt 6:1.) Ụfọdụ nwere ike iche na e kwesịghị ịkwụ ndị ahụ rụrụ ọrụ naanị otu awa ihe a kwụrụ ndị rụrụ  ọtụtụ awa. Ma nwoke ahụ gosiri ha obiọma pụrụ iche. Otu ọkà mmụta kwuru banyere “obiọma na-erughịrị mmadu,” nke a sụgharịrị “amara” n’ọtụtụ nsụgharị Baịbụl. Ọ sịrị: “Ihe okwu ahụ pụtara bụ onyinye e nyere mmadụ n’efu na nke na-erughịrị mmadụ, ihe e nyere mmadụ nke na-abụghị ihe ọ rụtara na ihe e kwesịrị ịkwụ ya.”

3, 4. Gịnị mere Jehova ji gosi ụmụ mmadụ obiọma ya na-erughịrị ha, oleekwa otú o si gosi ha ya?

³ Baịbụl kwuru na obiọma na-erughịrị mmadụ Chineke na-egosi anyị bụ onyinye o “nyere n’efu.” (Efe. 3:7) Gịnị mere Jehova ji nye anyị onyinye a, oleekwa otú o si nye anyị ya? A sị na anyị na-emeta ihe niile dị́ Jehova mma n’emejọghị ihe, ọ gaara abụ na anyị rụtara obiọma ya n’ọrụ. Ma, anyị anaghị eme otú ahụ. Ọ bụ ihe mere Eze Sọlọmọn ji dee, sị: “E nweghị onye ezi omume n’ụwa nke na-eme naanị ezi ihe, nke na-adịghịkwa emehie.” (Ekli. 7:20) Pọl onyeozi kwukwara, sị: “Mmadụ niile emehiewo, ha adịghịkwa eru ebube Chineke” nakwa na ‘ụgwọ ọrụ mmehie na-akwụ bụ ọnwụ.’ (Rom 3:23; 6:23a) Ọ bụ ihe anyị kwesịrị inweta.

⁴ Ma, Jehova gosiri na ọ hụrụ anyị n’anya. O gosiri anyị obiọma ya na-enweghị atụ, nke na-erughịrị mmadụ. O zitere “Ọkpara ọ mụrụ naanị ya” ka ọ bịa nwụọ maka anyị. Ọ bụ ya bụ onyinye kachanụ o nyere anyị. (Jọn 3:16) N’ihi ya, Pọl kwuru na ‘e kpuwere Jizọs ebube na nsọpụrụ dị ka okpueze n’ihi na ọ nwụwo anwụ, ka o wee site n’obiọma Chineke nke na-erughịrị mmadụ detụ ọnwụ ire maka mmadụ niile.’ (Hib. 2:9) N’eziokwu, “onyinye nke Chineke na-enye bụ ndụ ebighị ebi site n’aka Kraịst Jizọs Onyenwe anyị.”—Rom 6:23b.

5, 6. Olee ihe ga-eme ma (a) mmehie na-achị anyị? (b) obiọma na-erughịrị mmadụ na-achị anyị?

⁵ Gịnị mere anyị ji emehie, na-anwụkwa anwụ? Baịbụl kwuru banyere Adam, sị: “Ọnwụ si n’aka otu onye ahụ chịa” ụmụ Adam niile dị́ ka eze. (Rom 5:12, 14, 17) Ma, obi dị anyị ụtọ na anyị nwere ike ikpebi na mmehie agaghịzi na-achị anyị. Ọ bụrụ na anyị enwee okwukwe n’àjà ahụ Jizọs chụrụ, ọ pụtara na anyị chọrọ ka Jehova jiri obiọma ya na-erughịrị mmadụ na-achị anyị. N’ihi gịnị? Baịbụl kwuru, sị: “N’ebe mmehie dị ọtụtụ, obiọma na-erughịrị mmadụ dị ọtụtụ ọbụna karị. Ka gịnị wee mee? Ka obiọma na-erughịrị mmadụ wee chịa dị ka eze site n’ezi omume nke na-eduga ná ndụ ebighị ebi site na Jizọs Kraịst Onyenwe anyị, dị nnọọ ka mmehie na ọnwụ chịrị dị ka eze.”—Rom 5:20, 21.

⁶ N’agbanyeghị na anyị ka bụ ndị mmehie, anyị ekwesịghị ikwe ka mmehie na-achị anyị. Anyị mee mmehie, anyị na-arịọ Jehova ka ọ gbaghara anyị. Pọl dọrọ Ndị Kraịst aka ná ntị, sị: “Mmehie agaghị abụ nna unu ukwu, ebe unu maara na unu anọghị n’okpuru iwu kama n’okpuru obiọma na-erughịrị mmadụ.” (Rom 6:14) N’ihi ya, ọ bụ obiọma na-erughịrị mmadụ na-achị anyị. Olee uru ọ baara anyị? Pọl kwuru, sị: “Obiọma Chineke nke na-erughịrị mmadụ . . . na-akụziri anyị ka anyị jụ asọpụrụghị Chineke na ọchịchọ nke ụwa, ka anyị na-ebikwa ndụ n’uche zuru okè na ezi omume na nsọpụrụ Chineke n’ime usoro ihe dị ugbu a.”—Taị. 2:11, 12.

7, 8. Mgbe Baịbụl kwuru na Jehova na-esi “n’ụzọ dị́ iche iche” egosi obiọma ya na-erughịrị mmadụ, gịnị ka ọ pụtara? (Lee ihe e sere ná mmalite isiokwu a.)

⁷ Pita onyeozi dere, sị: “Dị ka onye ọ bụla natara onyinye, jirinụ ya na-ejere  ibe unu ozi dị ka ezi ndị nlekọta ụlọ n’ihe banyere obiọma Chineke nke na-erughịrị mmadụ, nke a na-egosi n’ụzọ dị iche iche.” (1 Pita 4:10) Gịnị ka ihe a o kwuru pụtara? Ọ pụtara na n’agbanyeghị ụdị ọnwụnwa bịaara anyị, Jehova ga-enyere anyị aka idi ya. (1 Pita 1:6) Ọ ga-egosi anyị ụdị obiọma ya nke ga-eme ka anyị die ọnwụnwa ọ bụla bịaara anyị.

⁸ N’eziokwu, Jehova na-esi n’ụzọ dị́ iche iche egosi anyị obiọma ya na-erughịrị mmadụ. Jọn onyeozi dere, sị: “Anyị niile nwetara ihe n’ihe o nwejuru enweju, ya bụ, obiọma na-erughịrị mmadụ n’elu obiọma na-erughịrị mmadụ.” (Jọn 1:16) Anyị na-erite ọtụtụ uru n’ụzọ dị́ iche iche Jehova si egosi anyị obiọma. Olee ụfọdụ n’ime ha?

9. Gịnị ka Jehova na-emere anyị n’ihi obiọma ya na-erughịrị mmadụ, oleekwa otú anyị ga-esi gosi na obi dị anyị ụtọ maka ya?

⁹ Ọ na-agbaghara mmehie anyị. N’ihi obiọma Jehova na-erughịrị mmadụ, ọ na-agbaghara anyị mmehie anyị ma ọ bụrụhaala na anyị echegharịa, na-agbasikwa mbọ ike ka anyị ghara ime ihe ọjọọ. (Gụọ 1 Jọn 1:8, 9.) Obiọma Chineke kwesịrị ime ka anyị na-ekele ya ma na-eto ya. Pọl degaara Ndị Kraịst ibe ya e tere mmanụ akwụkwọ ozi, sị: “[Jehova] napụtara anyị n’ikike nke ọchịchịrị ma wega anyị n’alaeze nke Ọkpara nke ịhụnanya ya, onye e si n’aka ya jiri ihe mgbapụta tọhapụ anyị, ya bụ, mgbaghara nke mmehie anyị.” (Kọl. 1:13, 14) Anyị na-eritekwa ọtụtụ uru ndị ọzọ magburu onwe ha n’ihi na Jehova na-agbaghara anyị mmehie anyị.

10. Olee uru obiọma Chineke na-erughịrị mmadụ na-abara anyị?

¹⁰ Anyị na Chineke nwere ike ịdị ná mma. Anyị niile ezughị okè. N’ihi ya, anyị bụbu ndị iro Chineke malite mgbe a mụrụ anyị. Ma, Pọl kwuru, sị: “Mgbe anyị bụ ndị iro, e mere ka anyị na Chineke dị ná mma site n’ọnwụ Ọkpara ya.” (Rom 5:10) N’ihi ọnwụ Jizọs, anyị na Jehova nweziri ike ịdị ná mma. Pọl kọwara ihe a na otú o si gbasa obiọma Jehova na-erughịrị mmadụ mgbe ọ gwara ụmụnna ya e tere mmanụ, sị: “Ebe a kpọworo anyị ndị ezi omume n’ihi okwukwe, ka anyị na Chineke dịrị n’udo site n’aka Onyenwe anyị Jizọs Kraịst, onye anyị sikwa n’aka ya bata n’obiọma a na-erughịrị mmadụ, nke anyị guzo na ya ugbu a site n’okwukwe.” (Rom 5:1, 2) Ọ bụ ihe ọma Jehova meere anyị.

11. Olee otú ndị e tere mmanụ si eme ka ndị só ‘n’atụrụ ọzọ’ bụrụ ndị ezi omume?

¹¹ Anyị nwere ike ịbụ ndị ezi omume n’anya Chineke. Anyị niile bụ ndị ajọ omume malite mgbe a mụrụ anyị. Ma, Daniel onye amụma kwuru na n’oge ikpeazụ, “ndị nwere nghọta,” bụ́ ndị e tere mmanụ, ga “na-eme ka ọtụtụ ndị mmadụ bụrụ ndị ezi omume.” (Gụọ Daniel 12:3.) Ha ji ozi ọma ha na-ekwusa na eziokwu ha na-akụzi eme ka ọtụtụ nde ndị só ‘n’atụrụ ọzọ’ bụrụ ndị ezi omume n’anya Jehova. (Jọn 10:16) Ma, ọ bụ naanị obiọma na-erughịrị mmadụ Jehova na-egosi anyị mere o ji kwe omume. Pọl kwuru, sị: “A na-akpọkwa ha ndị ezi omume, nke bụ́ onyinye e nyere n’efu, site n’obiọma [Chineke] na-erughịrị mmadụ site ná ntọhapụ nke si n’ihe mgbapụta ahụ Kraịst Jizọs kwụrụ.”—Rom 3:23, 24.

12. Olee otú ekpere si gbasa obiọma Chineke na-erughịrị mmadụ?

¹² Anyị na-ekpe ekpere gwa Chineke obi anyị. Ọ bụ obiọma Jehova na-erughịrị mmadụ mere ka anyị nwee ike ịna-ekpe ekpere. Pọl kpọrọ ocheeze Jehova “ocheeze nke obiọma na-erughịrị mmadụ,” gwakwa anyị “ka anyị jiri nkwuwa okwu” bịaruo ya nso. (Hib. 4:16a) Ọ bụ ezigbo ihe ùgwù na anyị na-esi n’aka Jizọs ekpe  ekpere mgbe ọ bụla. Anyị ‘si n’aka ya nwee nkwuwa okwu a ma jiri obi ike na-abịaru Chineke nso site n’okwukwe anyị nwere n’ebe ọ nọ.’ (Efe. 3:12) Ikpere ekpere mgbe ọ bụla bụ ihe magburu onwe ya na-egosi obiọma Jehova na-erughịrị mmadụ.

13. Olee otú obiọma na-erughịrị mmadụ nwere ike isi mee ka anyị ‘nweta enyemaka n’oge kwesịrị ekwesị’?

¹³ Anyị na-enweta enyemaka n’oge kwesịrị ekwesị. Pọl gwara anyị ka anyị kpeere Jehova ekpere mgbe ọ bụla anyị chọrọ, ‘ka e wee meere anyị ebere, anyị enwetakwa obiọma na-erughịrị mmadụ n’oge kwesịrị ekwesị mgbe enyemaka dị anyị mkpa.’ (Hib. 4:16b) Mgbe ọ bụla nsogbu ma ọ bụ ọnwụnwa bịaara anyị, anyị nwere ike ịrịọ Jehova ka o nyere anyị aka. Ọ na-aza ekpere anyị n’agbanyeghị na iwu ejighị ya ime otú ahụ, “ka anyị nwee obi ike wee sị: ‘Jehova bụ onye na-enyere m aka; agaghị m atụ egwu. Gịnị ka mmadụ pụrụ ime m?’”—Hib. 13:6.

14. Olee uru ọzọ obiọma Jehova na-erughịrị mmadụ na-abara anyị?

¹⁴ Jehova na-akasi anyị obi. Otu n’ime ezigbo uru anyị na-erite bụ na, e nwee ihe na-enye anyị nsogbu n’obi, Jehova na-akasi anyị obi n’ihi obiọma ya na-erughịrị mmadụ. (Ọma 51:17) Mgbe a na-akpagbu Ndị Kraịst nọ́ na Tesalonaịka, Pọl degaara ha akwụkwọ ozi, sị: “Ka Onyenwe anyị Jizọs Kraịst na Chineke bụ́ Nna anyị, onye hụrụ anyị n’anya ma nye nkasi obi ebighị ebi na ezi olileanya site n’obiọma na-erughịrị mmadụ, kasiekwa unu obi ma mee ka unu guzosie ike.” (2 Tesa. 2:16, 17) Obi na-eru anyị ala n’ihi na anyị ma na Jehova hụrụ anyị n’anya ma na-elekọta anyị.

15. Olee olileanya anyị nwere n’ihi obiọma Chineke na-erughịrị mmadụ?

¹⁵ Anyị nwere olileanya ịdị ndụ ebighị ebi. Ebe anyị bụ ndị mmehie, anyị agaraghị enwe olileanya. (Gụọ Abụ Ọma 49:7, 8.) Ma, Jehova mere ka anyị  nwee olileanya magburu onwe ya. Jizọs kwere ndị na-eso ụzọ ya nkwa, sị: “Nke a bụ uche Nna m, na onye ọ bụla nke na-ahụ Ọkpara ahụ ma nwee okwukwe na ya ga-enwe ndụ ebighị ebi, m ga-akpọlitekwa ya n’ọnwụ n’ụbọchị ikpeazụ.” (Jọn 6:40) N’eziokwu, olileanya ịdị ndụ ebighị ebi bụ onyinye Chineke nyere anyị, bụrụkwa otú o si gosi anyị obiọma ya na-erughịrị mmadụ. Obi dị Pọl ụtọ maka ya. Ọ bụ ya mere o ji kwuo, sị: “E mewo ka obiọma Chineke nke na-erughịrị mmadụ, nke na-enye ụdị mmadụ niile nzọpụta, pụta ìhè.”—Taị. 2:11.

16. Olee otú ụfọdụ Ndị Kraịst n’oge ndịozi Jizọs si jiri obiọma Chineke na-erughịrị mmadụ gwuo egwu?

¹⁶ Ọ bụ eziokwu na obiọma Jehova na-erughịrị mmadụ na-abara anyị ọtụtụ uru, ma anyị ekwesịghị iche na ihe ọ bụla mmadụ mere ga-adị Jehova mma. Ụfọdụ Ndị Kraịst n’oge ndịozi Jizọs chere na ha nwere ike ịna-eme omume rụrụ arụ n’ihi “obiọma Chineke . . . nke na-erughịrị mmadụ.” (Jud 4) Ọ ga-abụ na Ndị Kraịst ndị ahụ na-ekwesịghị ntụkwasị obi chere na ha nwere ike ịna-eme mmehie, Jehova ana-agbaghara ha. Nke kadị njọ bụ na ha nọ na-agbalị ịrata ụmụnna ndị ọzọ ka ha soro ha mewe ihe ọjọọ ha na-eme. Onye na-eme otú ahụ n’oge anyị a ‘elelịala mmụọ nke obiọma na-erughịrị mmadụ.’—Hib. 10:29.

17. Olee ndụmọdụ gbara ọkpụrụkpụ Pita nyere Ndị Kraịst?

¹⁷ N’oge anyị a, Setan eduhiela ụfọdụ Ndị Kraịst ha echewe na ha nwere ike ịna-eme mmehie, Chineke ana-agbaghara ha n’eleghị anya n’azụ. Ọ bụ eziokwu na Jehova na-agbaghara ndị mmehie ma ha chegharịa, ọ chọrọ ka anyị na-alụso ọchịchọ mmehie anyị ọgụ. O nyere Pita ike mmụọ nsọ, ya edee, sị: “Ya mere, ndị m hụrụ n’anya, ebe unu bu ụzọ mara ihe ndị a, kpacharanụ anya ka a ghara idufu unu na ha site ná njehie nke ndị na-eleda iwu anya, unu ewee kwụsị iguzosi ike. Ee e, kama na-etonụ eto n’obiọma na-erughịrị mmadụ nakwa n’ihe ọmụma banyere Onyenwe anyị na Onye Nzọpụta anyị bụ́ Jizọs Kraịst.”—2 Pita 3:17, 18.

18. Gịnị ka anyị kwesịrị ịna-eme n’ihi obiọma na-erughịrị mmadụ Jehova gosiri anyị?

¹⁸ Obi dị anyị ụtọ na Jehova na-egosi anyị obiọma ya na-erughịrị mmadụ. N’ihi ya, anyị kwesịrị iji onyinye ndị o nyere anyị na-asọpụrụ ya, na-emekwa ihe ga-abara ndị mmadụ ibe anyị uru. Olee otú anyị ga-esi eme ya? Pọl gwara anyị, sị: “Ya mere, ebe anyị nwere onyinye dị iche iche dị ka obiọma na-erughịrị mmadụ nke e nyere anyị si dị, . . . ọ bụrụ ozi ka anyị na-eje, ka anyị nọgide n’ije ozi a; ọ bụrụ onye na-ezi ihe, ya nọgide n’izi ihe ya; ọ bụrụ onye na-enye ndụmọdụ, ya nọgide na ndụmọdụ ọ na-enye; . . . onye na-eme ebere, ya jiri mgbasapụ ihu na-eme ya.” (Rom 12:6-8) Obiọma na-erughịrị mmadụ Jehova gosiri anyị kwesịrị ime ka anyị na-agachi ozi ọma anya, na-akụziri ndị mmadụ Baịbụl, na-agba ụmụnna anyị ume, na-agbagharakwa ha ma ha mee ihe were anyị iwe.

19. Olee ọrụ Chineke nyere anyị a ga-akọwa n’isiokwu na-esonụ?

¹⁹ Ebe ọ bụ na obi dị anyị ụtọ maka ihụnanya Chineke gosiri anyị, anyị kwesịrị ime ihe niile anyị nwere ike ime iji ‘gbasie àmà ike banyere ozi ọma nke obiọma Chineke nke na-erughịrị mmadụ.’ (Ọrụ 20:24) N’isiokwu na-esonụ, anyị ga-akọwa ọrụ ahụ nke ọma.