Ebanghelio ni Juan 1:1-51
1 Idi un-unana, adda ti Sao,+ ket ti Sao kadua ti Dios,+ ket ti Sao maysa a dios.*+
2 Kaduana ti Dios sipud idi un-unana.
3 Napaadda ti amin a banag babaen kenkuana,+ ket awan ti aniaman a naaramid no saan a gapu kenkuana.
Napaadda
4 babaen kenkuana ti biag, ket ti biagna ti lawag dagiti tattao.+
5 Agsilsilnag ti silaw iti sipnget,+ ket saan a kabaelan a ringbawan ti sipnget.
6 Adda lalaki nga imbaon ti Dios kas pannakabagina; ti naganna ket Juan.+
7 Immay daytoy a lalaki kas saksi, tapno saksianna ti maipapan iti silaw+ ket mamati ti amin a kita ti tattao babaen kenkuana.
8 Saan nga isu ti silaw,+ no di ket naibaon a mangsaksi iti silaw.
9 Ti pudno a silaw a manglawag iti tunggal kita ti tao ket asidegen nga umay iti lubong.+
10 Isu ket adda idin iti lubong,+ ken napaadda ti lubong babaen kenkuana,+ ngem saan nga am-ammo ti lubong.
11 Napan iti lugarna, ngem saan nga inawat dagiti kalugaranna.
12 Ngem amin nga immawat kenkuana ket naikkan iti gundaway nga agbalin nga annak ti Dios,+ gapu ta mangipakpakitada iti pammati kenkuana.+
13 Nayanakda saan a babaen ti dara wenno pagayatan ti lasag wenno pagayatan ti tao, no di ket babaen ti Dios.+
14 Nagbalin a tao*+ ti Sao ken nakipagnaed kadatayo. Nakitatayo ti dayagna nga ited laeng ti ama iti bugbugtong nga anakna;+ ken napno iti pabor ti Dios* ken iti kinapudno.
15 (Sinaksian ni Juan ti maipapan kenkuana ken impukkawna: “Daytoy ti tuktukoyek idi imbagak, ‘Daydiay adda iti likudak ket addan iti sanguanak, ta immun-una a naadda ngem siak.’”)+
16 Agtultuloy nga umawattayo iti nagpaiduma a kinaimbag ta napno iti nagpaiduma a kinaimbag.
17 Gapu ta naited ti Linteg babaen ken Moises,+ naited met ti nagpaiduma a kinaimbag+ ken kinapudno babaen ken Jesu-Kristo.+
18 Awan ti tao a nakakita iti Dios uray kaano;+ ti bugbugtong a dios+ nga adda iti abay ti Ama*+ ti nangilawlawag iti maipapan kenkuana.+
19 Daytoy ti panangsaksi nga inted ni Juan idi nangibaon dagiti Judio kadagiti papadi ken Levita manipud Jerusalem a mangisaludsod kenkuana: “Asinoka?”+
20 Direkta a simmungbat ket kinunana: “Saan a siak ti Kristo.”
21 Insaludsodda manen: “Asinoka ngarud? Sika kadi ni Elias?”+ Insungbatna: “Saan a siak.” “Sika kadi ti Propeta?”+ Kinunana: “Saan!”
22 Gapuna, imbagada: “Asinoka? Ibagam tapno adda maisungbatmi kadagiti nangibaon kadakami. Asinoka a talaga?”
23 Kinunana: “Siak daydiay mangipukpukkaw idiay let-ang, ‘Aramidenyo a nalinteg ti dalan ni Jehova,’*+ kas kinuna ni propeta Isaias.”+
24 Dagitoy a tattao ket imbaon dagiti Fariseo.
25 Isu nga insaludsodda kenkuana: “Apay ngarud a mangbabautisarka no saan a sika ti Kristo wenno ni Elias wenno ti Propeta?”
26 Simmungbat ni Juan: “Mangbabautisarak iti danum. Adda agtaktakder iti tengngayo a saanyo nga am-ammo,
27 daydiay sumaruno kaniak, ket saanak a maikari a mangwarwar iti galut dagiti sandaliasna.”+
28 Napasamak dagitoy idiay Betania iti ballasiw ti Jordan, a pangbabautisaran ni Juan.+
29 Iti simmaruno nga aldaw, nakita ni Juan nga umas-asideg ni Jesus ket kinunana: “Kitaenyo, ti Kordero+ ti Dios a mangikkat iti basol+ ti lubong!+
30 Isu ti tuktukoyek idi imbagak: ‘Ti lalaki nga adda iti likudak ket addan iti sanguanak, ta immun-una a naadda ngem siak.’+
31 Saanko pay idi nga am-ammo, ngem mangbabautisarak iti danum tapno isu ket maipakaammo iti Israel.”+
32 Inlawlawag pay ni Juan: “Nakitak ti espiritu manipud langit a bumabbaba a kasla kalapati, ket nagtalinaed kenkuana.+
33 Saanko pay idi nga am-ammo, ngem kinuna Daydiay nangibaon kaniak a mangbautisar iti danum: ‘Ti makitam a bumabaan ken pagtalinaedan ti espiritu+ isu daydiay mangbautisar iti nasantuan nga espiritu.’+
34 Nakitak dayta ken saksiak nga isu ti Anak ti Dios.”+
35 Iti simmaganad nga aldaw, bayat a nakatakder ni Juan ken ti dua kadagiti adalanna
36 ken kitkitaenna ni Jesus a magmagna, kinunana: “Kitaenyo, ti Kordero+ ti Dios!”
37 Idi nangngeg dayta ti dua nga adalan, simmurotda ken Jesus.
38 Timmaliaw ni Jesus ket nakitana a sumursurotda kenkuana isu nga insaludsodna: “Ania ti masapulyo?” Insungbatda: “Rabbi, (a no maipatarus, “Mannursuro”), sadino ti pagnanaedam?”
39 Kinunana kadakuada: “Umaykayo tapno makitayo.” Simmurotda ket nakitada ti pagnanaedanna ken nakikaduada kenkuana iti dayta nga aldaw; agarup alas kuatro idi ti malem.*
40 Ni Andres,+ a kabsat ni Simon Pedro, ti maysa kadagiti dua a nakangngeg iti imbaga ni Juan ken simmurot ken Jesus.
41 Immuna a binirokna ti kabsatna a ni Simon, ket kinunana: “Nakitamin ti Mesias”+ (a no maipatarus, “Kristo”),
42 sa nagkuyogda a napan ken Jesus. Idi kimmita ni Jesus kenkuana, kinunana: “Sika ni Simon,+ nga anak ni Juan; maawagankanto iti Cefas” (a no maipatarus, “Pedro”).+
43 Iti simmaruno nga aldaw, kayat ni Jesus ti mapan idiay Galilea. Nakitana ni Felipe+ ket kinunana: “Agbalinka a pasurotko.”
44 Taga-Betsaida ni Felipe, iti siudad da Andres ken Pedro.
45 Nakita ni Felipe ni Natanael+ ket kinunana: “Nakitamin daydiay matuktukoy kadagiti insurat ni Moises, iti Linteg, ken kadagiti insurat dagiti Propeta, isu ni Jesus nga anak ni Jose+ a taga-Nazaret.”
46 Ngem insaludsod ni Natanael: “Adda kadi asinoman a naimbag nga agtaud iti Nazaret?” Insungbat ni Felipe: “Umayka tapno makitam.”
47 Idi nakita ni Jesus nga umas-asideg ni Natanael, kinunana: “Kitaenyo, ti pudno nga Israelita nga awanan panangallilaw.”+
48 Kinuna ni Natanael: “Kasano nga am-ammonak?” Insungbat ni Jesus: “Sakbay nga inayabannaka ni Felipe, nakitaka iti sirok ti kayo a higos.”
49 Kinuna ni Natanael: “Rabbi, sika ti Anak ti Dios, sika ti Ari ti Israel.”+
50 Imbaga ni Jesus: “Mamatika kadi gapu ta imbagak a nakitaka iti sirok ti kayo a higos? Makakitakanto pay kadagiti banag nga ad-adda a nakaskasdaaw ngem kadagitoy.”
51 Kinuna pay ni Jesus: “Pudno unay kunak kadakayo, makitayonto nga aglukat ti langit kasta met dagiti anghel ti Dios nga umuli ken umulog iti ayan ti Anak ti tao.”+
Footnotes
^ Wenno “nadiosan.”
^ Lit., “lasag.”
^ Wenno “nagpaiduma a kinaimbag.”
^ Wenno “adda iti barukong ti Ama.” Tumukoy iti maysa a naisangsangayan a saad.
^ Lit., “agarup maika-10 nga oras.”
