Ebanghelio ni Juan 4:1-54
4 Idi naammuan ti Apo a nadamag dagiti Fariseo nga ad-adu ti agbalbalin nga adalan ken babautisaran+ ni Jesus ngem ni Juan—
2 nupay saan a nangbautisar ni Jesus no di ket dagiti adalanna—
3 pimmanaw iti Judea ket napan manen idiay Galilea.
4 Ngem masapul a dumalan idiay Samaria.
5 Nakadanon ni Jesus iti maysa a siudad ti Samaria a maawagan Sicar, iti asideg ti daga nga inted ni Jacob ken ni Jose nga anakna.+
6 Adda sadiay ti bubon ni Jacob.+ Gapu ta nabannog ni Jesus a nagdaliasat, nagtugaw iti abay ti bubon.* Agarup alas dose ti aldaw* idi.
7 Immay ti maysa a Samaritana tapno agsakdo iti danum. Kinuna ni Jesus: “Ikkannak man iti inumek.”
8 (Ta napan dagiti adalanna iti siudad tapno gumatang iti taraon.)
9 Ngem kinuna ti babai: “Maysaka a Judio. Apay a dumawatka kaniak iti danum ket maysaak a Samaritana?” (Ta saan idi a makilanglangen dagiti Judio kadagiti Samaritano.)+
10 Insungbat ni Jesus: “No ammom koma ti awan bayadna a sagut ti Dios+ ken no asino ti mangibagbaga kenka, ‘Ikkannak man iti inumek,’ dumawatka kenkuana, ket ikkannaka iti danum a makaited iti biag.”+
11 Kinuna ti Samaritana: “Apo, awan ti pagsakdom ken nauneg ti bubon. Pangalaam koma ngarud iti danum a makaited iti biag?
12 Natantan-okka aya ngem iti amami a ni Jacob, a nangited kadakami iti bubon nga imminumanna ken dagiti annakna ken dagiti tarakenna?”
13 Insungbat ni Jesus: “Asinoman nga uminum iti daytoy a danum mawawto manen.
14 Ngem ti uminum iti danum nga itedko saanton a mawaw,+ ta ti danum nga itedko ket agbalin a kas ubbog ti danum iti unegna a mangted kenkuana iti biag nga agnanayon.”+
15 Kinuna ti babai: “Apo, ikkannak iti kasta a danum tapno saanakton a mawaw wenno agsubli ditoy a sumakdo.”
16 Kinuna ni Jesus: “Ayabam ti asawam ket umaykayo ditoy.”
17 Insungbat ti babai: “Awan asawak.” Kinuna ni Jesus: “Umiso ti imbagam nga awan asawam.
18 Naminliman a nakiasawaka, ket saanmo nga asawa ti lalaki a kabbalaymo ita. Isu a pudno ti imbagam.”
19 Kinuna ti babai: “Apo, ammok a maysaka a propeta.+
20 Nagdaydayaw dagidi ammami iti daytoy a bantay, ngem ibagbagayo nga idiay Jerusalem ti rumbeng a pagdaydayawan dagiti tattao.”+
21 Kinuna ni Jesus: “Patiem ti ibagak a dumtengto ti tiempo a saanen nga iti daytoy a bantay wenno idiay Jerusalem ti pagdaydayawanyo iti Ama.
22 Agdaydayawkayo iti saanyo nga am-ammo;+ ngem agdaydayawkami iti am-ammomi, ta ti pannakaisalakan ket mangrugi kadagiti Judio.+
23 Dumteng ti tiempo, ket dimtengen dayta, a dagiti pudno nga agdaydayaw dayawenda ti Ama maitunos iti espiritu ken kinapudno, ta sapsapulen ti Ama dagiti kasta nga agdaydayaw kenkuana.+
24 Ti Dios ket maysa nga Espiritu,+ ken dagidiay agdaydayaw kenkuana masapul nga agdayawda maitunos iti espiritu ken kinapudno.”+
25 Kinuna ti babai: “Ammok nga umay ti Mesias, a maawagan iti Kristo. Inton dumteng, ibagananto ti amin a banag kadakami.”
26 Insungbat ni Jesus: “Siak daydiay, ti makisarsarita kenka.”+
27 Idi simmangpet dagiti adalanna, nasdaawda a nakakita a makisarsarita iti maysa a babai. Ngem awan ti nagkuna: “Ania ti masapulmo kenkuana?” wenno, “Apay a kasarsaritam?”
28 Imbati ngarud ti babai ti karambana sa napan iti siudad ket imbagana kadagiti tattao:
29 “Umayyo kitaen ti lalaki a nangibaga iti amin nga inaramidko. Saan ngata nga isu ti Kristo?”
30 Rimmuarda iti siudad ket napanda ken Jesus.
31 Kabayatanna, imbaga dagiti adalan ken Jesus: “Rabbi,+ mangankan.”
32 Ngem kinunana: “Adda taraonko a diyo ammo.”
33 Gapuna, insaludsod dagiti adalan iti maysa ken maysa: “Asino ngata ti nangted iti kanenna?”
34 Kinuna ni Jesus: “Ti taraonko ket ti panangaramid iti pagayatan daydiay nangibaon kaniak+ ken ti panangileppasko iti trabaho nga intedna.+
35 Kunayo nga adda pay uppat a bulan sakbay ti panagani. Ngem ibagak kadakayo: Kitaenyo dagiti talon, natangkenanen dagiti dawa ket mabalinen nga anien.+
36 Aw-awatenen ti agan-ani ti tangdanna ken agap-apit iti bunga para iti biag nga agnanayon, isu nga agpada nga agragsak ti agmulmula ken ti agan-ani.+
37 Gapuna, umiso daytoy a pagsasao: Sabali ti agmula ken sabali ti agani.
38 Imbaonkayo nga agani iti saanyo nga immula. Sabali dagiti nagtrabaho ngem nagunggonaankayo iti nagbannoganda.”
39 Adu a Samaritano iti dayta a siudad ti namati ken Jesus gapu ta pinaneknekan ti babai: “Imbagana kaniak ti amin nga inaramidko.”+
40 Gapuna, idi napan kenkuana dagiti Samaritano, kiniddawda a makipagyan kadakuada, ket nakipagyan iti dua nga aldaw.
41 Iti kasta, ad-adu pay ti namati iti insuro ni Jesus,
42 ket imbagada iti babai: “Mamatikami itan, saan laeng a gapu iti imbagam, no di ket nangngegmi a mismo ken ammomi a daytoy a tao ti mangisalakan iti lubong.”+
43 Kalpasan ti dua nga aldaw, napanen idiay Galilea.
44 Ngem imbaga a mismo ni Jesus a saan a mapadayawan ti maysa a propeta iti mismo a lugarna.+
45 Isu nga idi nakadanon idiay Galilea, inawat dagiti tattao ta nakitada ti amin nga inaramidna bayat ti piesta idiay Jerusalem,+ ta napanda met idi nakipiesta.+
46 Napan manen idiay Cana iti Galilea, a sadiay a pinagbalinna nga arak ti danum.+ Adda idi maysa nga opisial ti palasio a masakit ti anakna a lalaki idiay Capernaum.
47 Idi nadamagna a simmangpet ni Jesus iti Galilea manipud Judea, simmabat ket kiniddawna a kumuyog kenkuana tapno paimbagenna ti anakna a matmatayen.
48 Ngem kinuna ni Jesus: “No awan ti makitayo a pagilasinan ken nakaskasdaaw a banag, pulos a saankayo a mamati.”+
49 Imbaga ti opisial ti palasio: “Apo, kumuyogka koma kaniak sakbay a matay ti anakko.”
50 Kinuna ni Jesus: “Agawidkan; sibibiag ti anakmo.”+ Namati ti lalaki iti imbaga ni Jesus ket nagawiden.
51 Adda pay laeng iti dalan idi sinabat dagiti adipenna tapno ibagada a sibibiag* ti anakna.
52 Dinamagna no ania nga oras nga immimbag ti anakna, ket insungbatda: “Immimbag ti gurigorna idi kalman, iti agarup ala una ti malem.”*
53 Nabigbig ti ama a dayta ti oras a panangibaga ni Jesus: “Sibibiag ti anakmo.”+ Iti kasta, namati agraman ti intero a sangakabbalayanna.
54 Daytoy ti maikadua a milagro+ nga inaramid ni Jesus idi napan idiay Galilea manipud Judea.
Footnotes
^ Wenno “ubbog.”
^ Lit., “agarup maikanem nga oras.”
^ Wenno “nga umim-imbagen.”
^ Lit., “maikapito nga oras.”
