1. Ania ti magunggonatayo no agdaydayawtayo iti Dios iti umiso a wagas?

MASEKNAN unay kadatayo ni Jehova a Dios ken kayatna a magunggonaantayo iti naayat a pannarabayna. No agdaydayawtayo kenkuana iti umiso a wagas, naragsaktayo ken maliklikantayo ti adu a parikut iti biag. Kasta met, bendisionan ken tulongannatayo. (Isaias 48:17) Nupay kasta, ginasut a relihion ti agkuna a pudno ti isursuroda maipapan iti Dios. Ngem agsusupadi dagiti sursuroda maipapan iti Dios ken no ania ti iparebbengna kadatayo.

2. Kasano a maammuantayo ti umiso a wagas ti panagdayaw ken ni Jehova, ket ania nga ilustrasion ti tumulong kadatayo a mangtarus iti daytoy?

² Kasano a maammuam ti umiso a wagas ti panagdayaw ken ni Jehova? Saan a kasapulan nga adalen ken pagdidiligem dagiti sursuro ti amin a relihion. Nasken laeng nga ammuem no ania a talaga ti isursuro ti Biblia maipapan iti pudno a panagdayaw. Kas panangyilustrar: Parikut ti adu a pagilian dagiti peke a kuarta. Ania ti aramidem no matudinganka a mangilasin iti kasta a peke a kuarta? Ikabesadom kadi ti amin a peke? Saan. Nasaysayaat no ti pudno a kuarta ti ikabesadom. No ammom ti langa ti pudno a kuarta, mailasinmo ti peke. Umasping iti dayta, no ammotayo nga ilasin ti pudno a relihion, mailasintayo met dagiti palso a relihion.

3. Sigun ken ni Jesus, ania ti masapul nga aramidentayo tapno anamongannatayo ti Dios?

³ Nasken a dayawentayo ni Jehova iti wagas nga anamonganna.  Adu ti mamati a makaay-ayo iti Dios ti amin a relihion, ngem saan a kasta ti isursuro ti Biblia. Saan pay ketdi nga umdas ti basta panangibaga ti maysa a tao nga isu ket Kristiano. Kinuna ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.” Tapno ngarud anamongannatayo ti Dios, masapul nga ammuentayo no ania ti iparebbeng ti Dios ken aramidentayo dayta. “Agar-aramid ti kinakillo” ti awag ni Jesus kadagidiay saan a mangtungtungpal iti pagayatan ti Dios. (Mateo 7:21-23) Kas iti peke a kuarta, awan serserbi ti palso a relihion. Dakdakes pay, makadangran ti kasta a relihion.

4. Ania ti kaipapanan ti sasao ni Jesus maipapan iti dua a dalan, ket pagturongan dagita a dalan?

⁴ Ipapaayan ni Jehova ti amin a tattao ditoy daga iti gundaway a gumun-od iti biag nga agnanayon. Ngem tapno agbiagtayo nga agnanayon iti Paraiso, masapul nga umiso ti wagas ti panagdayawtayo iti Dios ken agbiagtayo iti wagas nga anamonganna. Nakalkaldaang ta adu ti agkedked a mangaramid iti kasta. Dayta ti gapuna a kinuna ni Jesus: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” (Mateo 7:13, 14) Mangiturong iti biag nga agnanayon ti pudno a relihion. Mangiturong iti pannakadadael ti palso a relihion. Saan a kayat ni Jehova a madadael ti siasinoman, isu nga ipapaayanna dagiti tattao iti sadinoman iti gundaway nga agsursuro maipapan kenkuana. (2 Pedro 3:9) No kasta, biag wenno patay ti kaipapanan kadatayo ti wagas ti panagdayawtayo iti Dios.

5. Kasano a mailasintayo dagidiay mangan-annurot iti pudno a relihion?

⁵ Kasano a masarakan ‘ti dalan nga agturong iti biag’? Kinuna ni Jesus a ti pudno a relihion ket mailasin iti wagas ti panagbiag dagidiay mangan-annurot iti dayta. “Babaen kadagiti bungada mailasinyonto ida,” kinunana. “Tunggal naimbag  a kayo mangpataud iti nasayaat a bunga.” (Mateo 7:16, 17) Iti sabali a pannao, mailasinmo dagidiay mangan-annurot iti pudno a relihion babaen kadagiti patpatien ken kababalinda. Nupay saan a perpekto ken agbiddut dagiti pudno a managdaydayaw, kas grupo ikagkagumaanda nga aramiden ti pagayatan ti Dios. Usigentayo ti innem a pakailasinan dagidiay mangan-annurot iti pudno a relihion.

6, 7. Ania ti panangmatmat dagiti adipen ti Dios iti Biblia, ken kasano nga impasdek ni Jesus ti ulidan iti daytoy a banag?

⁶ Naibatay iti Biblia dagiti sursuro dagiti adipen ti Dios. Kuna a mismo ti Biblia: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 3:16, 17) Idi sinuratan ni apostol Pablo dagiti padana a Kristiano, kinunana: “Idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios, nga agtigtignay met kadakayo a manamati.” (1 Tesalonica 2:13) No kasta, dagiti patpatien ken aramid dagidiay mangan-annurot iti pudno a relihion ket saan a naibatay kadagiti natauan a kapanunotan wenno tradision. Naibatay dagita iti naipaltiing a Sao ti Dios, ti Biblia.

⁷ Impasdek ni Jesu-Kristo ti umiso nga ulidan babaen ti panangibatayna kadagiti sursurona iti Sao ti Dios. Idi nagkararag iti nailangitan nga Amana, kinunana: “Ti saom ket kinapudno.” (Juan 17:17) Pinati ni Jesus ti Sao ti Dios, ket maitunos iti Kasuratan ti amin nga insurona. Masansan idi a kuna ni Jesus: “Adda a naisurat.” (Mateo 4:4, 7, 10) Sa agadaw iti kasuratan. Kasta met, saan a dagiti bukodda a kapanunotan ti isursuro dagiti adipen ti Dios ita. Patienda a ti Biblia ket Sao ti Dios, ken sititibker a naibatay iti dayta dagiti sursuroda.

8. Ania ti ramanen ti panagdayaw ken ni Jehova?

⁸ Ni laeng Jehova ti daydayawen dagidiay mangan-annurot iti pudno a relihion ken ipakpakaammoda ti naganna. Kinuna  ni Jesus: “Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.” (Mateo 4:10) No kasta, awan sabali a daydayawen dagiti adipen ti Dios no di laeng ni Jehova. Ramanen daytoy a panagdayaw ti panangipakaammo iti nagan ti pudno a Dios ken dagiti galadna. Kuna ti Salmo 83:18: “Maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” Impasdek ni Jesus ti padron iti panangtulong kadagiti sabsabali a mangammo iti Dios, kas kinunana idi nagkararag: “Imparangarangko ti naganmo kadagiti tattao nga intedmo kaniak manipud iti lubong.” (Juan 17:6) Dagiti pudno nga agdaydayaw ita isursuroda met kadagiti sabsabali ti nagan ti Dios, dagiti panggepna, ken dagiti galadna.

9, 10. Kadagiti ania a pamay-an nga ipakpakita dagiti pudno a Kristiano ti ayat iti maysa ken maysa?

⁹ Ipakpakita dagiti tattao ti Dios ti napudno, di agimbubukodan nga ayat iti maysa ken maysa. Kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:35) Addaan dagiti nagkauna a Kristiano iti kasta nga ayat iti maysa ken maysa. Ti nadiosan nga ayat pagkaykaysaenna dagiti tattao iti nalagda a singgalut ti pudno a panagkakabsat aniaman ti puli, kasasaad iti biag, ken nasion a nagtaudanda. (Colosas 3:14) Dagiti kameng dagiti palso a relihion awananda iti kasta a naayat a panagkakabsat. Kasano ti pannakaammotayo iti dayta? Agpipinnatayda gapu iti panagduduma ti nasion wenno pulida. Dagiti pudno a Kristiano saanda nga agiggem kadagiti igam a pangpapatay kadagiti padada a Kristiano wenno iti siasinoman. Kuna ti Biblia: “Ti annak ti Dios ken ti annak ti Diablo nabatadda babaen itoy a kinapudno: Tunggal maysa a saan nga agar-aramid iti kinalinteg saan a nagtaud iti Dios, uray met ti saan nga agayat iti kabsatna. . . . Rebbeng a maaddaantayo iti ayat iti maysa ken maysa; saan a kas ken Cain, a nagtaud iti daydiay nadangkes ken nangpapatay iti kabsatna.”—1 Juan 3:10-12; 4:20, 21.

¹⁰ Siempre, saan laeng a ti di panangpapatay kadagiti sabsabali  ti kaipapanan ti pudno nga ayat. Dagiti pudno a Kristiano sibubulos nga usarenda ti panawen, pigsa, ken sanikuada a tumulong ken mangparegta iti maysa ken maysa. (Hebreo 10:24, 25) Agtitinnulongda kadagiti panawen ti rigat, ken napudno ti pannakilangenda kadagiti sabsabali. Kinapudnona, agbibiagda a mayannurot iti balakad ti Biblia nga “aramidentayo koma ti naimbag kadagiti amin.”—Galacia 6:10.

11. Apay a nasken nga awatentayo ni Jesu-Kristo kas daydiay inted ti Dios a pakaisalakanantayo?

¹¹ Dagiti pudno a Kristiano awatenda ni Jesu-Kristo kas daydiay inted ti Dios a pakaisalakanantayo. Kuna ti Biblia: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Aramid 4:12) Kas naadaltayo iti Kapitulo 5, inted ni Jesus ti biagna a kas subbot nga agpaay kadagiti natulnog a tattao. (Mateo 20:28) Kanayonanna, ni Jesus ti dinutokan ti Dios nga Ari iti nailangitan a Pagarian a mangituray iti intero a daga. Ket kalikaguman ti Dios nga agtulnogtayo ken ni Jesus ken agbiagtayo a maitunos kadagiti sursurona no kayattayo ti biag nga agnanayon. Dayta ti gapuna a kuna ti Biblia: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag.”—Juan 3:36.

12. Ania ti ramanen ti panagbalin a saan a paset ti lubong?

¹² Dagiti pudno nga agdaydayaw ket saan a paset ti lubong. Idi naisaklang ni Jesus iti Romano nga agturay a ni Pilato, kinunana: “Ti pagariak saan a paset daytoy a lubong.” (Juan 18:36) Aniaman a pagilian ti pagnaedan dagiti pudno a pasurot ni Jesus, iturayan ida ti nailangitan a Pagarianna, isu a saanda a pulos makibiang kadagiti napolitikaan nga aramid ti lubong. Saanda a makiraman kadagiti dangadang. Nupay kasta, saan a makibiang dagiti agdaydayaw ken ni Jehova no ikeddeng dagiti sabsabali ti kumappon iti aniaman a partido politikal, agkandidato, wenno agbutos. Ket nupay neutral dagiti pudno nga agdaydayaw iti Dios no maipapan iti politika, tungtungpalenda dagiti linteg. Apay? Agsipud ta ibilbilin ti Sao ti Dios nga ‘agpasakupda’ kadagiti “nangatngato nga autoridad” ti gobierno. (Roma 13:1) No agsupadi ti ipaannurot  ti Dios ken ti ipaannurot ti aniaman a sistema politikal, dagiti pudno nga agdaydayaw tuladenda dagiti apostol, a nagkuna: “Masapul nga agtulnogkami iti Dios kas agturay imbes a kadagiti tattao.”—Aramid 5:29; Marcos 12:17.

13. Ania ti panangmatmat dagiti pudno a pasurot ni Jesus maipapan iti Pagarian ti Dios, ket ngarud, ania ti ar-aramidenda?

¹³ Ikaskasaba dagiti pudno a pasurot ni Jesus a ti Pagarian ti Dios ti kakaisuna a namnama ti sangatauan. Impadto ni Jesus:  “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Dagiti pudno a pasurot ni Jesu-Kristo iwarwaragawagda ti nailangitan a Pagarian ti Dios kas kakaisuna a namnama ti sangatauan imbes a paregtaenda dagiti tattao nga agpannuray kadagiti agtuturay ditoy lubong a mangrisut kadagiti parikutda. (Salmo 146:3) Insuro ni Jesus nga ikararagtayo dayta a perpekto a gobierno idi kinunana: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Impadto ti Sao ti Dios a daytoy nailangitan a Pagarian “rumekennanto ken pagpatinggaenna amin dagitoy a pagarian [nga adda ita], ket dayta agtalinaedto agingga kadagiti tiempo a di nakedngan.”—Daniel 2:44.

14. Ania a relihion ti patiem a makatungtungpal kadagiti pagrukodan ti pudno a panagdayaw?

¹⁴ Maibatay iti kaus-usigtayo, isaludsodmo iti bagim: ‘Ania a relihion ti naibatay iti Biblia ti amin a sursurona ken mangipakpakaammo iti nagan ni Jehova? Ania a grupo ti mangipakpakita iti nadiosan nga ayat, addaan pammati ken ni Jesus, saan a paset ti lubong, ken mangiwarwaragawag a ti Pagarian ti Dios ti kakaisuna a pudpudno a namnama ti sangatauan? Kadagiti amin a relihion ditoy daga, ania a relihion ti makatungtungpal amin kadagitoy a pagrukodan?’ Nalawag ti pammaneknek a dayta a grupo ket isu dagiti Saksi ni Jehova.—Isaias 43:10-12.

15. Ania pay ti iparebbeng ti Dios malaksid iti basta panamati iti kaaddana?

¹⁵ Saan nga umdas a mangay-ayo iti Dios ti basta panamati kenkuana. Kinapudnona, kuna ti Biblia nga uray dagiti demonio mamatida nga adda Dios. (Santiago 2:19) Ngem nalawag a saanda nga ar-aramiden ti pagayatan ti Dios ken saanna ida nga anamongan. Tapno anamongannatayo ti Dios, saan laeng a basta mamatitayo nga adda Dios no di ket masapul nga aramidentayo met ti pagayatanna. Masapul met a  tallikudantayo ti palso a relihion ken awatentayo ti pudno a panagdayaw.

16. No maipapan iti pannakipaset iti palso a relihion, ania ti nasken nga aramidentayo?

¹⁶ Imbatad ni apostol Pablo a masapul a ditay makipaset iti palso a panagdayaw. Insuratna: “‘Rummuarkayo manipud iti tengngada, ket isinayo ti bagbagiyo,’ kuna ni Jehova, ‘ket isardengyo a sagiden ti di nadalus a banag’; ‘ket awatenkayto.’” (2 Corinto 6:17; Isaias 52:11) Liklikan ngarud dagiti pudno a Kristiano ti aniaman a mainaig iti palso a panagdayaw.

17, 18. Ania ti “Babilonia a Dakkel,” ket apay a darasem ti ‘rummuar kenkuana’?

¹⁷ Ipakita ti Biblia a paset ti “Babilonia a Dakkel” ti amin a kita ti palso a relihion. * (Apocalipsis 17:5) Dayta a nagan ipalagipna kadatayo ti nagkauna a siudad ti Babilonia, a nangrugian ti palso a relihion kalpasan ti Layus idi kaaldawan ni Noe. Namunganay iti nagkauna a Babilonia ti adu a sursuro ken ugali a kadawyan ita iti palso a relihion. Kas pagarigan, nagdaydayaw dagiti taga Babilonia kadagiti trinidad, wenno tinallo a dios. Iti kaaldawantayo, Trinidad ti kangrunaan a doktrina ti adu a relihion. Ngem nalawag nga isursuro ti Biblia a maymaysa ti pudno a Dios, ni Jehova, ket ni Jesu-Kristo ti Anakna. (Juan 17:3) Patien met idi dagiti taga-Babilonia nga addaan dagiti tattao iti imortal a kararua nga agtultuloy nga agbiag no matay ti bagi ken mabalin nga agrigat iti maysa a lugar a pagtutuokan. Iti kaaldawantayo, isursuro ti kaaduan a relihion ti maipapan iti imortal a kararua wenno espiritu a mabalin nga agtuok iti impierno.

¹⁸ Yantangay nagsaknap iti daga ti panagdayaw nga an-annuroten ti nagkauna a Babilonia, maitutop a maipabigbig ti moderno a Babilonia a Dakkel kas sangalubongan nga imperio ti palso a relihion. Ket impakauna ti Dios a kellaat a madadaelto daytoy nga imperio ti palso a relihion. (Apocalipsis 18:8) Maawatam kadi no apay a nasken a panawam ti amin a paset  ti Babilonia a Dakkel? Kayat ni Jehova a darasem ti ‘rummuar kenkuana’ bayat nga adda pay panawen.—Apocalipsis 18:4.

19. Ania ti magunggonam no agserbika ken ni Jehova?

¹⁹ No ikeddengmo a tallikudan ti palso a relihion, mabalin a saandakan a kayat a kalangen dagiti dadduma. Ngem no agserbika ken ni Jehova a kadua dagiti tattaona, ad-adu ti magunggonam ngem ti mapukawmo. Kas kadagiti nagkauna nga adalan ni Jesus a nangpanaw kadagiti dadduma a banag tapno sumurotda kenkuana, maaddaankanto iti adu a kakabsat iti pammati. Agbalinkanto a paset ti dakkel a sangalubongan a pamilia dagiti riniwriw a pudno a Kristiano a talaga a mangay-ayat kenka. Ket maaddaankanto iti nakaskasdaaw a namnama nga agbiag nga agnanayon “iti um-umay a sistema ti bambanag.” (Marcos 10:28-30) Inton agangay, dagidiay nangtallikud kenka gapu kadagiti patpatiem mabalin a maallukoydanto a mangammo iti isursuro ti Biblia ken agdayawdanto met ken ni Jehova.

20. Ania ti agur-uray kadagidiay mangan-annurot iti pudno a relihion?

²⁰ Isursuro ti Biblia a mabiiten a pagpatinggaen ti Dios daytoy dakes a sistema ti bambanag ken sukatannanto dayta iti nalinteg a baro a lubong nga iturayan ti Pagarianna. (2 Pedro 3:9, 13) Anian a makaay-ayonto a lubong dayta! Ket iti dayta nalinteg a baro a sistema, maymaysanto laengen ti relihion, ti pudno a relihion. Saan kadi a nainsiriban a nasken nga agtignaykan ket makitimpuyogka itan kadagiti pudno a managdaydayaw?