Panangsaranget Kadagiti Karit iti Naisangsangayan a Teritoria

SUMAGMAMANO a dekadan a mangaskasaba dagiti Saksi iti lugar a nairanta kadagiti Navajo, nga adda kadagiti paset ti Arizona, New Mexico, ken Utah, E.U.A. Iti pagsasao a Navajo, maawagan dayta iti Diné Bikéyah (pagilian ti Navajo). Ti nasurok a 220,000 a Katutubo nga Americano a maawagan iti Diné (dagiti tattao) iti bukodda a lenguahe, ti mangbukel iti kaaduan ti populasion ti tribu dagiti Indian iti Amianan nga America.

Adda nadumaduma a kongregasion dagiti Saksi ni Jehova a nabuangay bayat dagidi a tawen kadagiti lallaki ken babbai a Navajo nga interesado iti Biblia. Ita, addan uppat a kongregasion iti lugar a nairanta kadagiti Navajo idiay Tuba City, ken kadagiti ili ti Kayenta, Keams Canyon, ken Chinle. (Kitaem ti mapa iti baba.) Nabiit pay a naaddaan ti tunggal maysa iti bukodda a Kingdom Hall malaksid ti kongregasion ti Chinle, a masapul nga aggigimongda idi kadagiti maabangan a kuarto ti eskuelaan. Ngem nagbalbaliwen ti kasasaad.

Kingdom Hall Para iti Naisangsangayan a Teritoria

Idi Sabado, Hunio 7, 2003, naaramid ti dedikasion ti Kingdom Hall ti Chinle. Ni Gerrit Lösch, a miembro ti Bagi a Manarawidwid dagiti Saksi ni Jehova ti nangted iti palawag ti dedikasion. Iti palawagna, dineskribirna ti umad-adu a bilang dagiti Kingdom Hall iti intero a lubong, ngem inlawlawagna a rinibu pay ti kasapulan tapno maserbian ti nasurok a 94,600 a kongregasion. Inlawlawagna met kadagiti 165 a dimngeg, ti 15 a rason no apay nga apresiarenda koma ti baro a Kingdom Hall-da ken dagiti pagimbagan ti regular nga itatabuno kadagiti Nakristianuan a gimong. Sinerraanna ti gimong babaen iti kararag ti dedikasion. Kiniddawna ti pamendision ni Jehova iti daytoy nagsayaat a paggigimongan.

Daytoy a kongregasion ket dati a naitimpuyog iti Keams Canyon Congregation, nga agarup 100 a kilometro iti laud. Ita, dagitoy a Saksi addan naituding a pangikasabaanda iti naimbag a damag ti Pagarian ti Dios iti teritoria nga adda iti nadumaduma a paset ti lugar a 11,000 kilometro kuadrado! Adu a Navajo ti agnanaed kadagiti pagtaengan a mayakar-akar wenno kadagiti hogan wenno pagtaengan  a naaramid iti troso a mabalin nga innem wenno walo ti sikiganda. Tapno madanon ti adu a naiputputong a lugar, nasken nga adda de dual a lugan. Agpayso daytoy kadagiti pagtaengan iti nadumaduma a paset ti Canyon de Chelly (mabalikas a d’Shay), maysa a nakaay-ayat a paset ti teritoria ti kongregasion.

Canyon de Chelly​—Sagrado Kadagiti Navajo

Kasla awan inggana ti buya dagiti nangato a patag a kabambantayan iti Arizona. Addaan dagitoy kadagiti haywey a nakawatwatiwat ta kasla din makita ti pagpatinggaanda. Dua laeng a kilometro ti kaadayo ti Canyon de Chelly manipud iti Kingdom Hall. Agsikkosikko ti ginget iti 40 a kilometro a rangkis a nalabaga a bato a 9 a metro iti kangatona iti pangrugian agingga a makagteng iti kangato a 300 a metro. Kada tawen rinibu ti agpasiar iti daytoy a lugar, a maibilang a maysa a monumento ti nasion. Kadagiti Navajo, sagrado daytoy a ginget, agraman ti Canyon del Muerto. Agnanaed ditoy ti dadduma a pamilia, a naiputong kadagiti hogan-da a naaramid iti troso ken daga. Ngem aminda ket madandanon dagiti Saksi ni Jehova a mangip-ipan kadagiti literatura ti Biblia a naisurat iti bukodda a lenguahe.

Tapno makastrek ti maysa a tao iti ginget, masapul a kuyogen ti autorisado a giya a Navajo. Magna ti dadduma nga agpasiar, ket agkabalio ti dadduma; ngem kaaduan ti aglugan iti de dual. Nasken daytoy a kita ti lugan ta masansan  a lumasat iti Chinle Wash. Ammo met dagiti giya no kasano a liklikan dagiti gayonggayong a mabalin a mangipalned iti kabalio wenno lugan a pickup. Ngem ania ti makapainteres unay iti Canyon de Chelly?

Naisurat iti rangkis ti pakasaritaan ti ginget babaen iti petroglyph wenno lamina iti bato. Patien dagiti arkeologo a dagiti nalatak a pagtaengan iti rangkis, a naaramid kadagiti dadakkel a nakalukat a kueba iti sango ti rangkis, ket naaramid idi baet ti 350 K.P. ken 1300 K.P. Nalabit ti White House Ruin ti kalatakan. Naawagan iti kasta gapu ta puraw ti diding ti maysa kadagiti pasdek. Dayta ti pinanawan dagiti Anasazi (nagan ti “nagkauna a kabusor” iti pagsasao a Navajo) idi agarup 1300 K.P. Mapapati nga awan idi ti Navajo iti daytoy a lugar agingga idi maika-18 a siglo.

No agpasiarka iti Canyon de Chelly, agbiaheka iti Navajo Route 7, ket iti pagsikkuan ti kalsada nga asideg laeng iti Nasional a Monumento, siputam ti karatula a “Jiihōvah Yádahalne’í bi Kingdom Hall” ken “Kingdom Hall of Jehovah’s Witnesses.” Dika bumdeng a sumardeng ken bumisita.

[Dagiti Mapa iti panid 22]

(Para iti aktual a pannakaurnosna, kitaem ti publikasion)

COLORADO

NASION A NAVAJO

ARIZONA

CANYON DE CHELLY NATIONAL MONUMENT

Chinle

Kayenta

Tuba City

NASION A HOPI

Keams Canyon

NEW MEXICO

UTAH

[Ladawan iti panid 23]

Kuna dagiti arkeologo a nalabit sangadosena a pamilia nga Anasazi ti nagnaed iti daytoy a balay iti rangkis

[Ladawan iti panid 24]

Hogan

[Ladawan iti panid 24]

Canyon del Muerto

[Ladawan iti panid 24]

Spider Rock iti Canyon de Chelly