No Kasano a Makatulong ti Dadduma

NALABIT adda am-ammom nga agsagsagaba iti depression wenno bipolar disorder. No kasta, kasano a makatulongka? Kastoy ti nagsayaat a balakad ni Dr. J. Jaffe iti National Alliance for the Mentally Ill: “Dimo pagpadaen ti tao ken ti sakit; imbes ketdi, kaguram ti sakit ngem ayatem ti tao.”

Maysa a babai nga agnagan iti Susanna ti siaanus a nangipakita iti ayatna. Adda gayyemna nga addaan iti bipolar disorder. “Addada tiempo idi a dina maanduran ti makikadua kaniak,” kuna ni Susanna. Imbes a baybay-anna ti gayyemna, nagsukisok ni Susanna tapno adda ammona maipapan iti bipolar disorder. “Ita,” kunana, “mabigbigko a nagdakkel ti epekto ti sakit ti gayyemko iti kababalinna.” Ammo ni Susanna a nagsayaat ti resulta dagiti panangikagumaanna a mangtarus iti agsagsagaba. “Matulongannaka a mangayat ken mangapresiar iti dayta a tao gapu kadagiti nagsayaat a kababalinna nupay masakit,” kunana.

No miembro ti pamilia ti masakit, napateg ti naimpusuan a pammaregta. Idi pay la damo, nasursuron ni Mario daytoy a leksion ta adda bipolar disorder ni Lucia a baketna, a nadakamat iti daytoy a serye dagiti artikulo. Kunana: “Idi damo, natulonganak idi kinuyogko ni baketko nga agpadoktor. Nagbasaak ken inadalko daytoy karkarna a sakit tapno naan-anay a maammuak no ania ti sarsarangtenmi. Kanayon met nga agsaritakami ken ni Lucia ket intultuloymi a tinaming ti aniaman a rimsua a kasasaad iti panaglabas dagiti aldaw.”

Panangsaranay ti Kongregasion Kristiano

Balakadan ti Biblia ti amin a Kristiano nga ‘agsaoda iti makaliwliwa kadagiti malmaldaangan a kararua’ ken “maaddaanda iti mabayag a panagitured iti isuamin.” (1 Tesalonica 5:14) Kasano a maaramidmo daytoy? Umuna, napateg a maawatam ti nagdumaan ti mental ken naespirituan a sakit. Kas pagarigan, impamatmat ti mannurat iti Biblia a ni Santiago a ti kararag paimbagenna ti addaan sagubanit iti naespirituan. (Santiago 5:14, 15) Nupay kasta, binigbig ni Jesus a dagidiay masakit iti pisikal masapulda ti mangngagas. (Mateo 9:12) Siempre, umiso ken makatulong ti panagkararag ken Jehova maipapan iti aniaman a pakadanagan,  agraman ti salun-attayo. (Salmo 55:22; Filipos 4:6, 7) Ngem di ibaga ti Biblia a ti ad-adu a naespirituan nga aramid ti mangpaimbag kadagiti agdama nga an-annayen.

No kasta, dagiti mannakaawat a Kristiano liklikanda nga iparipirip iti malmaldaang a tao a basolna ti panagsagabana. Kas kadagidiay palso a manangliwliwa ni Job, saan a makatulong ti kasta a sasao. (Job 8:1-6) Ti agpayso ket kaaduanna, saan a maimbagan ti depression malaksid no maipadoktor. Agpayso daytoy nangruna no nakaro ti depression ti maysa a tao, ken nalabit gandatna payen ti agpakamatay. Kadagita a kaso, nasken ti agpadoktor.

Kaskasdi, adu a pammaregta ti maaramid dagiti pada a Kristiano. Siempre, masapul ti anus. Kas pagarigan, mabalin a makapaupay ti sumagmamano nga aspeto ti Nakristianuan a trabaho kadagiti addaan iti mood disorder. Kuna ti addaan iti bipolar disorder nga agnagan iti Diane: “Marigatanak a makipaset iti ministerio. Marigatanak a mangiranud iti naimbag ken naragsak a damag manipud iti Biblia kadagiti sabsabali no madi ti rikriknak.”

Tapno matulongam ida, ikagumaam ti makipagrikna. (1 Corinto 10:24; Filipos 2:4) Matmatam koma ti bambanag sigun iti panangmatmat ti agsagsagaba imbes a sigun iti panangmatmatmo. Dimo padagsenan kadagiti di nainkalintegan nga inanamaen. “No awatendak sigun iti kinataok,” kuna ni Carl, a mangib-ibtur iti depression, “mariknak nga in-inut manen nga agbalinak a nasinged. Babaen iti naasi a tulong ti sumagmamano a nabayagen a gagayyem, nagbalin a nasingsinged ti relasionko iti Dios ket maragsakanak a tumulong iti sabsabali nga agbalin met a nasinged kenkuana.”

Babaen iti pammaregta, mabalin a dagiti agsagsagaba mabang-aranda iti rigatda. Usigem ti maysa a babai nga agnagan iti Brenda, nga addaan iti bipolar disorder. “Nagsayaat ti pammaregta ken pannakaawat dagiti gagayyemko iti kongregasion no malmaldaangak. Pulos a dida matmatan a nakapuyak iti naespirituan,” kunana. “Adda idi dagiti tiempo a palubosandak a makikuyog iti ministerio ket bay-andak nga agimdeng laeng wenno mangilasinda iti tugawko idiay Kingdom Hall tapno makatugawak no amin ket nakatugawen.”

Dakkel met ti tulong dagiti naayat ken mannakipagrikna a panglakayen iti kongregasion ken ni Cherie, nga agsagsagaba iti depression. Kunana: “Mabang-aranak no ipasigurado kaniak dagiti panglakayen ti ayat ni Jehova, ibasaandak kadagiti bersikulo manipud iti Sao ti Dios a ti Biblia, ken ibagada dagiti panggep ni Jehova a natalna ken nanam-ay a paraiso sa ikararagandak uray pay iti telepono. Ammok a dinak baybay-an ni Jehova ket dayta ti mangpabpabileg kaniak.”

Awan duadua a babaen iti napateg a pammaregta, adu ti maaramidan dagiti miembro ti pamilia ken gagayyem tapno sumayaat ti rikna ti agsagsagaba. “Nasaysayaat itan ti panangkontrolko iti biagko,” kuna ni Lucia. “Inkagumaanmi nga agassawa nga anduran daytoy, ket napipia itan ti kasasaadmi.”

Pagaammo ti adu nga agib-ibtur iti nadumaduma a kita ti sakit iti isip a napaut ti panangandur kadagitoy a sakit. Ngem ikari ti Biblia nga iti baro a lubong ti Dios, “awanto ti agtataeng nga agkuna: ‘Masakitak.’” (Isaias 33:24) Awanton dagiti makapadanag a sakit ken an-annayen a mangparparigat iti nagadu a tattao itatta. Talaga a makaparagsak a panunoten ti kari ti Dios a baro a lubong a sadiay mapukawton nga agnanayon dagiti amin a sakit agraman dagiti mood disorder. Iti dayta a tiempo, kuna ti Biblia, awanen ti “panagsangit wenno ut-ot.”​—Apocalipsis 21:4.

[Blurb iti panid 12]

Binigbig ni Jesus a dagidiay masakit masapulda ti mangngagas.​—MATEO 9:12

[Blurb iti panid 13]

Ikari ti Biblia nga iti baro a lubong ti Dios, “awanto ti agtataeng nga agkuna: ‘Masakitak.’”​—ISAIAS 33:24