Mkul yiwen amek i gḥemmel ad yels neɣ ad yemceḍ. Neţţaf deg Wedlis Iqedsen kra n imenzayen ara ɣ-iɛiwnen a neţlusu neɣ a nmecceḍ akken i nḥemmel, yerna a s-neɛǧeb i Yahwa. A nwali kra seg imenzayen-agi.

1. Acu-ten imenzayen ara ɣ-iɛiwnen a neţţextiṛi amek ara neţlusu d wamek ara d-neţban?

Ilaq a neţţextiṛi “llebsa iwulmen”, i d-yeţbegginen ‘annuz akk-d leɛqel’, ilaq daɣen a nili daymen zeddigit akken a d-neţbeggin belli ‘neṭṭef di Ṛebbi’ (1 Timutawus 2:9, 10, Traduction du monde nouveau, TMN). A nwali imenzayen yellan deg yefyar-agi: 1) Ilaq a neţlusu llebsa “iwulmen”. Am wakken i twalaḍ deg inejmuɛen-nneɣ, yal yiwen seg Inagan n Yahwa amek i gḥemmel ad yels neɣ ad yemceḍ. Meɛna neţbeggin-ed s llebsa-nneɣ d wemcaḍ-nneɣ belli neţɛuzzu Ṛebbi. 2) “Annuz” yeţţaṭṭaf-aɣ iwakken ur neţlusu ara llebsa ur nessiṛ ara neɣ i d-ijebbden tamuɣli ɣur-neɣ. 3) “Leɛqel” yeţɛawan-aɣ akken ur neţţuɣal ara d aklan n llebsa i d-iţeffɣen ţ-ţajdiṭ. 4) S llebsa-nneɣ d wemcaḍ-nneɣ ilaq a d-neţbeggin daymen belli “neṭṭef di Ṛebbi”, yeɛni neţţeɛbad Ṛebbi n ṣṣeḥ (1 Ikurintiyen 10:31).

2. Ayɣer i glaq a neţxemmim ɣer watmaten ţ-ţyessetmatin-nneɣ m’ara neţţextiṛi d acu ara nels?

Nezmer a nextiṛ a nels ayen i ɣ-iɛeǧben, meɛna ilaq a nḥader iwakken llebsa-nneɣ ur teţţili ara d ugur i wiyaḍ. Nxeddem kullec iwakken “mkul yiwen deg-nneɣ ad iraḍi lɣir-is di nnfeɛ-is i unerni”, yeɛni, mkul yiwen deg-neɣ ad yexdem ayen ara inefɛen wiyaḍ (ɣer-ed Iṛumaniyen 15:1, 2).

3. Amek i tezmer llebsa-nneɣ aţ-ţɛiwen lɣaci ad bɣun ad qedcen ɣef Yahwa?

Neţḥadar ɣef wamek i neţlusu di mkul liḥala, meɛna neţḥadar akteṛ m’ara nḥeddeṛ i inejmuɛen neɣ m’ara neţberriḥ. Ur nebɣi ara a d-rren lɣaci ddehn-nsen ɣer llebsa-nneɣ, meɛna ɣer lexbaṛ ara sen-nessiweḍ. Nebɣa a d-tejbed llebsa-nneɣ lɣaci ɣer tideţ yerna ‘aţ-ţcebbeḥ di kullec aselmed n Ṛebbi’ (Titus 2:10).

 A NNADI A NEFHEM AKTEṚ

4. Neţţarra lɛezz i Yahwa s wamek i d-neţban

Acu-ţ lḥaǧa tamezwarut i glaqen a ɣ-tdemmer a neţţarra ddehn-nneɣ ɣer wamek i d-neţban? Ɣret-ed Ahellil 47:3, mbeɛd hedṛet ɣef yesteqsiyen-agi:

• Nekni d iqeddacen n Yahwa. Amek i glaq a d-iban wayagi di llebsa-nneɣ?

• Ɛlaḥsab-ik, acuɣer i glaq a neţţarra ddehn-nneɣ ɣer wamek i d-neţban m’ara neţṛuḥu ɣer inejmuɛen neɣ m’ara neţberriḥ? Ayɣer i d-tenniḍ akka?

 5. Imenzayen ara ɣ-iɛiwnen a neţţextiṛi akken ilaq d acu ara neţlusu d wamek ara d-neţban

Walit BIDYU-YAGI.

Akken tebɣu tili ssuma n llebsa-nneɣ, ama ṛxiset ama ɣlayet, awi-d kan aţ-ţili zeddiget yerna twulem i leqdic i nxeddem. Ɣret-ed 1 Ikurintiyen 10:24 akk-d 1 Timutawus 2:9, 10. Mbeɛd, hedṛet ɣef ssebbat ara ɣ-yawin a nexḍu i llebsa...

• ur nzeddig ara neɣ ur neqɛid ara.

• izeyyṛen (iḥezzqen) neɣ yeɛran.

Ccariɛa n Musa ur teɛni ara imasiḥiyen, meɛna tesskanay-aɣ-d amek i geţwali Yahwa timsal. Ɣret-ed Asmekti 22:5, mbeɛd hedṛet ɣef westeqsi-yagi:

• Ayɣer i glaq a nexḍu i llebsa neɣ i wemcaḍ ara d-ibeggnen belli argaz yeţcabi ɣer tmeṭṭut, neɣ tameṭṭut teţcabi ɣer wergaz?

Ɣret-ed 1 Ikurintiyen 10:32, 33 akk-d 1 Yuḥenna 2:15, 16, mbeɛd hedṛet ɣef yesteqsiyen-agi:

• Ayɣer i glaq a neţḥadar ɣef wamek i neţlusu d wamek i d-neţban iwakken ur nessewham ara wid i ɣ-d-yezzin neɣ atmaten ţ-ţyessetmatin n tejmaɛt-nneɣ?

• D acu-ţ llebsa d lḥeṭṭa i gcaɛen deg wemḍiq anda i teţɛiciḍ?

• Ɛlaḥsab-ik, yella deg-sent wayen ur nwulem ara i umasiḥi? Acuɣer?

 AYEN I D-NELMED

M’ara neţţaṭṭaf leqrarat yelhan deg wayen yeɛnan llebsa-nneɣ d wamek i d-neţban, a neţɛuzzu Yahwa yerna a neţqadar wiyaḍ.

A d-nesmekti

• Acuɣer i geţţak Yahwa lqima i wamek i neţlusu d wamek i d-neţban?

• Bder-ed kra n imenzayen i glaqen a ɣ-wellhen m’ara neţţextiṛi ayen ara neţlusu d wamek ara d-neţban.

• Amek ara ḥesben wiyaḍ leɛbada n ṣṣeḥ m’ara d-ţmuqulen ɣer wamek i neţlusu d wamek i d-neţban?