“Chyum Laika hpe ngai shakut na hti yu ai. Raitim, n ngut hkraw ai ngu hkamsha ai.”​—Briyana, 15 ning.

Nang mung dai hku hkamsha ai kun? Ndai sumhpa gaw nang hpe karum ya na re!

•  Hpa majaw Chyum Laika hti ai kun?

•  Chyum Laika hpe gara hku hti ra na kun?

•  Ramma shada tsun ai lam

Chyum Laika hti u ngu tsun yang, lagawn na zawn wa ngu ai myit rawng ai kun? Dai hpe chye na ya lu ai. Laika buk gaw htat, laika si ni gaw kaji, hpa sumla mung n lawm ai. T.V ni, video ni zawn myit lawm na zawn mung n re ngu myit hkrup na re.

Raitim, ndai hku myit yu u: Moi na ja sutgan sutdek langai hpe mu ai ngu saga. Kata hta hpa wa mi nga na kun? ngu na chye mayu ai n re i?

Chyum Laika gaw, dai ja sutgan sutdek hte bung ai. Ja sutgan zawn manu dan ai hpaji rawng ai ga ni grai law hkra lawm ai. Dai hpaji rawng ai ga ni gaw

• Kaja ai daw dan lam ni jahkrat lu hkra

• Kanu kawa ni hte htuk hkra

• Kaja ai manang ni lu hkra

• Myitru myit tsang lam ni hpe hparan lu hkra karum ya ai.

Moi na laika gaw yu du hkra gara hku na tatut akyu naw nga taw ai kun? Chyum Laika shagu hpe ‘Karai Kasang shung ya ai’ hku ka da ai majaw re. (2 Timohti 3:​17) Chyum Laika hta lawm ai hpaji jaw ga ni gaw, kaja htum hpaji jaw ai madu kaw na sa ai ngu ai lachyum re.

Galaw mai ai lam langai gaw, Chyum Laika hpe shawng nnan kaw na ngut ai du hkra hti u. Rai yang, Chyum Laika a mdung shi ga hpe chye na mat na re. Chyum Laika hti ai ladat amyu myu nga ai kaw na ladat lahkawng hpe yu yu ga:

•  Chyum Laika buk ting hpe Ningpawt Ninghpang kaw na Shingran du hkra langai hpang langai hti mai ai.

•  Chyum Laika mabyin ni byin wa ai shaning hku hkan nna hti mai ai.

Hpaji jaw ai lam: Mungkan Nnan Ga Gale Chyum Laika (BU) a Bungjat Daw A7 hta, Yesu a ginding aga asak aprat a madung mabyin ni hpe madun da ai.

Galaw mai ai lam lahkawng gaw, hkrum nga ai mayak mahkak ni hte seng ang ai Chyum Laika labau ni hpe hti u. Ga shadawn:

• Kam mai ai manang ni lu mayu ai kun? Yonahtan hte Dawi a lam hpe hti u. (1 Samuela, daw kaba 18-20) Dai hpang, “Kaja Ai Manang Ni Hpe Tam Mu Mai Ai Lam” laika pa hpe akyu jashawn nna tatut re ai lam ni hpe sharin la u.

• Gunglau hkrum ai shaloi, bai ninghkap lu ai asam ningja ni law law nga hkra galaw mayu ai kun? Gunglau hkrum ai shaloi, Yosep gara hku ninghkap wa ai lam hti u. (Ningpawt Ninghpang, daw kaba 39) Dai hpang, “Gunglau Hkrum Ai Shaloi Ninghkap Lu Ai Lam . . . Yosep​—Daw 1” (BU) hte “N Teng N Man Mara Shagun Hkrum . . . Yosep​—Daw 2” (BU) ngu ai laika pa hpe akyu jashawn nna tatut re ai lam ni hpe sharin la u.

• Akyu hpyi ai gaw gara hku karum ya lu ai lam chye mayu ai kun? Nehemia a mahkrum madup hpe hti yu u. (Nehemia, daw kaba 2) Dai hpang, “Shi A Akyu Hpyi Ga Ni Hpe Karai Kasang Madat Ya Wa” (BU) ngu ai laika pa hpe akyu jashawn nna tatut re ai lam ni hpe sharin la u.

Hpaji jaw ai lam: Chyum Laika hpe simsa ai shara hta hti u. Rai yang she myit maju jung lu na re.

Galaw mai ai lam masum gaw, Chyum Laika labau langai (sh) Shakawn Kungdawn laika hpe hti u. Dai gaw tinang hte gara hku seng ai hpe myit u. Hti nna, tinang hkum tinang ndai hku san u:

•  Yehowa gaw Chyum Laika hta ndai lam hpe hpa majaw ka shalawm shangun ai kun?

•  Ndai gaw Yehowa a atsam ningja ni, galaw ai lam ni hte seng nna hpa hpe madun nga ai kun?

•  Ndai lam hpe gara hku tatut hkan sa mai na kun?

Hpaji jaw ai lam: Bandung jahkrat u. Chyum Laika hti hpang na matu lajang da ai shani hpe ka matsing da u.