WAAĨW’A wĩ na thĩna mwingĩ nginya ũkenda kũkw’a? Ethĩwa nĩweewie ũu, no ũelewe ũndũ Adriana weew’aa. Adriana aĩ na mawĩmakĩo maingĩ, kyeva, na ndaĩ na wĩkwatyo. Na nũndũ wa ũu, nĩweethĩiwe na ũwau mũthũku wa kwĩkalaa akw’ĩte ngoo kĩla ĩvinda.

O na ĩngĩ, kwasũanĩa ĩũlũ wa mũndũũme wĩtawa Kaoru kuma Japan ũla wasũvĩaa asyai make akũũ na mataĩ meyĩka ũndũ. Kaoru aĩtye-ĩ: “Ĩvindanĩ yĩu, neew’aa nĩ mũvinyĩĩe mũno nĩ wĩa. O na ĩtina wa ĩvinda, nĩnambĩĩie kũemwa nĩ kũya na kwaĩwa vyũ nĩ too. Nambĩĩie kũsũanĩa kana ngakw’a no nĩthyũmũe kuma mathĩnanĩ asu.”

Mũndũũme wĩtawa Ojebode kuma Nigeria aĩtye, “Kĩla ĩvinda, neew’aa nĩ na kyeva kingĩ nginya ngambĩĩa kũĩa, na kwoou nĩnamanthaa ũndũ ndonya kũkw’a.” Ũndũ wa kwendeesya nĩ kana Ojebode, Kaoru, na Adriana mayaaĩyũaa. Ĩndĩ kĩla mwaka andũ ngili maana maingĩ nĩmeyũaaa.

Andũ aingĩ ala meyũaaa nĩ aũme, na aingĩ moo methĩawa mayĩw’a nthoni sya kũkũlya matetheew’e. Yesũ aisye kana andũ ala awau nĩmo mendaa ndakĩtalĩ. (Luka 5:31) Kwoou, ethĩwa nũkwĩw’a ũkw’ĩte ngoo nginya ũkethĩa wĩenda kwĩyũaa, ndũkew’e nthoni sya kũkũlya ũtetheew’e. Yĩla andũ aingĩ me na ũwau wa kũkw’a ngoo mathi sivitalĩ, nĩmatetheeaw’a makew’a nesa na mayĩendeea kũmĩĩsya. Ojebode, Kaoru, na Adriana nĩmaendie sivitalĩ na matetheew’a, na yu maendeee nesa.

Ndakĩtalĩ no itũmĩe ndawa kana ikaneena na mũwau kĩeleelo kĩ kũmũtetheesya avĩndũe mosũanĩo make. O na no itũmĩe nzĩa isu syelĩ kũiita mũwau ũsu ũkw’ĩte ngoo. Ala awau nĩmendaa kwĩw’ĩwa tei na kũtetheew’a o kavola kwa kavola nĩ andũ ma mũsyĩ na anyanya. Mũnyanya ũla mũseo vyũ nĩ Yeova Ngai, nake atetheeasya andũ kwa nzĩa ĩla nzeo vyũ. Atũmĩaa Ndeto yake Mbivilia.

Mavinda maingĩ andũ ala methĩawa na ũwau wa kũkw’a ngoo nĩmendaa kũiitwa kwa ĩvinda yĩasa. Nĩmaĩle kwĩmanyĩsya ũndũ matonya kũmĩĩsya thĩna kwa kwĩka moalyũku ala maĩle. Ĩndĩ ethĩwa wĩ na ũwau wa kũkw’a ngoo, no wĩthĩwe na wĩkwatyo wa ĩvinda yũkĩte ĩseo o tondũ Ojebode wĩthĩawa na wĩkwatyo. Aĩtye atĩĩ: “Nĩnĩthĩawa neteele kwona ĩandĩko ya Isaia 33:24 yĩyĩanĩa. Ĩandĩko yĩu yathanĩte ĩũlũ wa ĩvinda yĩla vate mũndũ ũkasya, ‘Nyie nĩ mũwau.’” O ta Ojebode, osa vinya kumana na watho wa Ngai wa “nthĩ nzaũ,” vala “woo” ũtakethĩwa vo ĩngĩ. (Ũvuan’yo 21:1, 4) Wathani ũsu weanĩa, vaiĩ mũndũ ũkasyoka kwĩthĩwa na mathĩna ma kĩlĩko kana woo ngoonĩ. Mathĩna asu makathela vyũ. Mawĩmakĩo onthe ala wĩ namo “matikalilikanwa, o na matikalika kĩlilikanonĩ” ĩngĩ.—Isaia 65:17.