SI UN algen ki bu ta ama móre, talvês dja bu xinti alguns kuza, sima tristéza, xinti bo sô i sen ningen pa djuda-u. Talvês tanbê dja bu xinti raiba, kulpadu i ku medu. I pode ser ki ti dja bu pergunta si bale péna kontinua ta vive.

Ten sertéza ma tristéza é ka sinal di frakéza. Kel-li ta mostra ma bu ta ama kel algen txeu. Má, é posível atxa konsolu pa bu dór.

Nbóra pode parse ma bu dór ka ta kaba, kes sujiston li pode konsola-u:

DEXA TÉNPU PASA

É ka tudu algen ki ta mostra tristéza di mésmu manera ô ki ta kontinua tristi duránti mésmu ténpu. Má simé, txora pode djuda-u xinti aliviadu. Vanesa, ki dja nu papiaba di el antis, fla: “N ta txoraba tudu óra. N meste traba nha dór pa fóra.” Sufia, ki se irman móre dirapenti, fla: “Ta dueba mi txeu pensa na kuzê ki kontise. Éra sima abri i linpa un pankada ki staba infetadu. Kel dór éra txeu dimás, má N dexa kel pankada sara.”

 PÂPIA DI KUZÊ KI BU TA PENSA I KI BU TA XINTI

Alvês é normal bu krê fika bo sô. Má dór é un karga pizadu pa bu karega bo sô. Jair di 17 anu, ki se pai móre, fla: “N pâpia di kuzê ki N staba ta xinti ku otus algen. N ka sabe si es ntende kuzê ki N krê flaba, má pâpia ku otus di kuzê ki N staba ta xinti djuda-m txeu.” Janise, ki nu pâpia di el na primeru artigu di kel revista li, fla un otu vantaji di pâpia ku otus algen: “Pâpia ku otus algen konsola-m txeu. N xinti ma es staba ta ntende-m i ma N ka meste pasaba pa kel-li mi sô.”

SETA AJUDA

Un dotora fla: “Óras ki un algen ki sta tristi ta dexa amigus i família djuda-l lógu dipôs ki un algen ki el ta ama móre, txeu bês é más fásil pa el aguenta kel dór i lida ku el.” Dexa bus amigu sabe kuzê ki es pode faze pa djuda-u. Es ta krê djuda-u má es pode ka sabe modi. — Provérbios 17:17.

BIRA BU AMIZADI KU DEUS MÁS FÓRTI

Tina fla: “Kantu nha maridu móre dirapenti di kánser, N perde nha kunpanheru ki N ta kontaba tudu kuza. Nton N bira ta konta Deus tudu kuza! Tudu dia sédu palmanhan N ta pidiba el pa el djudaba mi aguenta más un dia. Deus djuda-m di un monti manera ki nen N ka ta konsigi konta.” Tánia, ki tinha 22 anu kantu se mai móre, fla: “Lé Bíblia tudu dia konsola-m. Sénpri N tinha algun kuza pa N pensaba na el ki ta daba mi koraji.”

IMAJINA MODI KI RESUREISON TA BEN SER

Tina fla: “Na komésu, speransa di resureison ka konsola-m pamodi N mesteba nha maridu i nhas fidju mesteba ses pai djuntu ku es. Má, gósi ki dja pasa kuatu anu, N ta pega riju na kel speransa li. I é el ki ta djuda-m kontinua. N ta imajina modi ki ta ben ser odja-l otu bês, i kel-li ta da-m pas i N ta fika kontenti!”

Talvês bu dór ka ta pasa di un óra pa kel otu. Má, kuzê ki Vanesa pasa pa el pode djuda-u. El fla: “Bu ta atxa ma bu dór nunka ka ta pasa, má bu ta midjora poku-poku.”

Lenbra ma nbóra bu ka ta para di xinti falta di kel algen, bale péna kontinua ta vive. Ku ajuda ki Deus ta da-u ku amor, bu pode kontinua ta ten bons amigu i ta ten obijetivu na vida. I ka ta dura, Deus ta ben resusita kes mortu. El krê pa bu brasa kes algen ki bu ta ama ki móre. Nton kel dór ki bu sta xinti na korason ta ben kaba pa tudu ténpu!