Na 2012, Bambangi ya Yehowa basisaka Mukanda ya Bankenda ya Biblia na ndinga ya Pangasinan na insi Philippines. Yo ke sadisa bana ya nzo-nkanda yina ke tubaka ndinga yango. Mukanda yai ke wakana kibeni ti lukanu yina biro ya ke talaka mambu ya kulonga bana na Philippines me bakaka ya kulonga bana ya école primaire na ndinga na bo ya kubutukila.

Bantu ke tubaka bandinga kuluta 100 na Philippines. Mbala mingi na insi yai bo ke sosaka kuzaba nki ndinga bo fwete sadila sambu na kulonga na nzo-nkanda. Na 2012, biro yina ke talaka mambu ya kulonga bana ndimaka nde “kana bo ke longa bana na ndinga yina bo ke tubaka na nzo,” yo ke butaka mbuma ya “kuluta mbote mpi ke salaka nde bana kubakisa mambu nswalu.” Yo yina, bo salaka manaka ya “Kulonga na Bandinga Mingi Yina Bana Ke Tubaka.”

Pangasinan vandaka na kati ya bandinga yina bo ponaka. Kansi kuvandaka ti diambu mosi ya mpasi. Ntwadisi ya école mosi tubaka nde mikanda ya bo me sonikaka na ndinga ya Pangasinan mpi yina bana ya nzo-nkanda lenda sadila kele ve mingi. Mukanda ya Bankenda ya Biblia na ndinga ya Pangasinan basikaka na ntangu ya mbote. Bambangi ya Yehowa basisaka yo na Novembri 2012 na balukutakanu na bo ya distrike yina ke salamaka konso mvula.

Bo niemaka mikanda yai kiteso ya 10 000 sambu na kukabisa yo na balukutakanu yina. Bana ti bibuti na bo vandaka na kiese mutindu bo bakaka mukanda yai na ndinga na bo ya kubutukila. Bakala mosi ti nkento na yandi ke tuba nde: “Bana na beto ke zolaka yo sambu bo ke bakisaka yo mbote-mbote.”

Kaka na nima ya lukutakanu yina, Bambangi ya nkaka nataka mikanda na bo Bankenda ya Biblia na école mosi na mbanza Dagupan. Balongi ya école yina vandaka kumona mpasi sambu na kuzwa mikanda na ndinga ya Pangasinan, yo yina bo sepelaka ti mukanda yai. Bambangi kabulaka mikanda yai kuluta 340. Na mbala mosi, balongi yantikaka kusadila mukanda yai sambu na kulonga bana kutanga na ndinga na bo ya kubutukila.

Bambangi ya Yehowa kele na kiese mutindu mukanda yai ke sadisa bana na kulonguka na nzo-nkanda. Mbangi mosi ya sadisaka na kubalula Mukanda ya Bankenda ya Biblia tubaka nde: “Banda ntama, beto ke zabaka nde kubasisila bantu mukanda na ndinga na bo ya kubutukila ke vandaka mfunu sambu na kusimba ntima na bo. Yo yina Bambangi ya Yehowa ke salaka bikesa sambu na kubalula Biblia mpi mikanda yina ke tendulaka Biblia na bandinga mingi.”