Sambu na bantu ya nkaka, yo ke lombaka nde ntangu kuluta mingi sambu bo zaba nde mambu yina bo vandaka kusala vandaka mbi. Mono vandaka muntu ya mutindu yina. Mono butukaka mpi yelaka na Barcelone, mbanza ya zole ya nene na Espagne. Dibuta na beto ke zingaka na Somorrostro. Kartie yina kele ti ba plage mingi ya ke kotaka tii na mbanza. Bo ke fwaka bantu mingi na Somorrostro mpi bo ke salaka mumbongo bima yina ke lawusaka.

 Beto vandaka bana 9 na dibuta. Mono kele mwana ya ntete. Beto vandaka kibeni bansukami. Yo yina papa tindaka mono na kukwenda kusala kisalu ya kulokutilaka bantu yina ke bulaka tennis babalon na kimvuka mosi ya tennis. Mono vandaka ti bamvula 10 mpi mono vandaka kusala kisalu yina bangunga 10 konso kilumbu. Yo yina, yo vandaka mpasi nde mono kwenda na nzo-nkanda bonso bana ya nkaka ya bamvula na mono. Ntangu mono lungisaka bamvula 14, mono yantikaka kusala na atelier mosi ya bibende.

 Na 1975, bo bingaka mono na kukuma soda sambu yo vandaka nsiku ya leta na Espagne. Mono vandaka kuzola luzingu ya bansaka. Yo yina, mono kwendaka kukota na kimvuka mosi ya banzenza ya nsi Espagne yina vandaka na Melilla, kitini mosi ya Espagne na Nordi ya Afrika. Yo kele na ntangu yina ya mono yantikaka kunwa malafu mingi mpi bima ya ke lawusaka.

 Ntangu mono katukaka na Kimvuka yina, mono vutukaka na Barcelone mpi mono salaka kimvuka mosi ya babandi. Beto vandaka kuyiba konso kima yina vandaka kukangama na maboko na beto. Na nima, beto vandaka kuteka bima yina beto vandaka kuyiba sambu na kuzwa mbongo ya kusumba bima yina ke kumisaka bantu bampika. Mono yantikaka kunwa makaya ngolo ya bo ke bingaka LSD mpi amphétamines, mpi mono kudikotisaka na luzingu ya kuvukisa nitu, ya kunwa malafu ya ngolo mpi ya kubula bansaka ya mbongo. Luzingu yina ya mbi salaka nde mono landa kukuma muntu ya nku kuluta. Mono vandaka kutambula ti mbele ya fioti, disoka to mbele ya nene, mpi mono vandaka kubanga ve kusadila yo kana yo lomba nde mono sadila yo.

 Kilumbu mosi, mono ti bantu yina vandaka na kimvuka ya babandi ya mono salaka, beto yibaka kaminio mosi mpi bapolisi vandaka kulanda beto. Yo vandaka bonso filme mosi mpidina. Beto kotaka na kaminio yango mpi beto kwendaka na kiteso ya bakilometre 30. Ebuna bapolisi yantikaka kubula beto masasi. Nsuka-nsuka, shofere na beto sadisaka kaminio aksida mpi beto yonso tinaka. Ntangu papa zabaka mambu yina mono salaka, yandi kulaka mono na nzo.

 Na bamvula tanu yina landaka, bala-bala kumaka nzo na mono. Mono kumaka kulala na ntwala ya baporte, na bakaminio, na baban ya baparke mpi na bamaziamu. Nkutu, mono me zingaka mwa fioti na dibulu mosi ya ditadi. Luzingu na mono vandaka ve mfunu mpi mono kumaka kumona nde lufwa ti luzingu kele kaka kiteso mosi. Mono ke yibuka diaka mutindu mono vandaka kudilwadisa na maboko na nsi kwiti ya bima ya ke lawusaka. Mono kele ti bidimbu ya bamputa yango tii bubu yai.

 Ntangu mono lungisaka bamvula 28, mama kwisaka kusosa mono sambu mono vutuka na nzo. Mono ndimaka kuvutuka na nzo mpi mono songaka yandi nde, mono ta yidika luzingu na mono. Kansi yo lombaka mwa ntangu sambu mono sala mambu yina mono songaka yandi.

 Kilumbu mosi na nima ya midi, Bambangi Yehowa zole kokulaka na porte na beto. Ntangu mono vandaka kuwa mambu ya bo vandaka kutuba, papa tubaka na ndinga ya ngolo katuka na nzo nde, mono fwete kangila bo porte. Mono vandaka ve kuzola nde muntu kupesa mono bansiku. Yo yina, mono salaka bonso nde mono me wa ve mambu yina yandi songaka mono. Bo pesaka mono mikanda tatu ya fioti-fioti. Mono bakaka yo na kiese yonso. Mono yulaka bo kana kisika yina bo ke sambilaka kele na wapi. Ebuna mwa bilumbu na nima, mono kwendaka na Nzo ya Kimfumu.

 Kima ya ntete ya mono monaka ntangu mono kumaka kuna kele nde bantu yonso lwataka mbote. Mono, mono vandaka ti nsuki ya nda, mandefo ya kukonda kuzenga mpi bilele ya mbote ve. Yo vandaka pwelele nde kisika na mono vandaka ve pana. Yo yina mono vandaka na nganda. Kansi mono yitukaka mingi sambu mono monaka nduku na mono mosi ya ntama. Yandi vandaka mpi na kimvuka mosi ya babandi. Zina yandi Juan. Yandi vandaka me lwata kostime. Na nima, mono zabaka nde yandi kumaka Mbangi ya Yehowa mvula mosi na ntwala. Kumona yandi pesaka mono kikesa yina mono vandaka ti yo mfunu sambu na kukota na Nzo ya Kimfumu mpi kulanda lukutakanu. Po pana ya mambu yonso yantikaka kusoba sambu na mono.

 Mono ndimaka kulonguka Biblia mpi mono sukininaka ve na kubakisa nde kana mono ke zola nde Nzambi kundima mono, mono fwete yambula kikalulu na mono ya nku mpi luzingu ya pite. Kansi kusala bansoba yina vandaka ve pete. Mono bakisaka nde sambu na kusepedisa Yehowa, mono fwete ‘soba kimuntu na mono mpi kukumisa mabanza na mono ya mpa.’ (Baroma 12:2) Mawa yina Nzambi kele ti yo simbaka kibeni ntima na mono. Ata mono salaka bifu mingi, mono monaka nde yandi ke sadisa mono na kusoba kibeni kimuntu na mono. Mambu yina mono vandaka kulonguka sambu na Yehowa Nzambi vandaka kibeni kukota na ntima na mono. Mono bakisaka nde yo kele ti Muntu mosi ya Salaka Beto ya ke tudilaka mono dikebi.—1 Piere 5:6, 7.

 Yo pusaka mono na kuyantika kusala bansoba. Mu mbandu, ntangu beto tubilaka mambu ya me tala makaya na kulonguka na mono na Biblia, mono kuditubilaka nde: ‘Kana Yehowa ke zola nde mono vanda bunkete mpi kukonda mvindu na mambu yonso, makaya yai fwete vila.’ (2 Bakorinto 7:1) Yo yina mono losaka yo na poubelle.

 Yo vandaka mpi kulomba nde mono bika kunwa bima yina ke lawusaka mpi kuyambula kuteka yo. Kansi kusala yo lombaka mono ntangu mwa mingi mpi bikesa. Sambu na kulungisa lukanu yina, mono vandaka kuzaba nde mono fwete zenga kinduku ti banduku na mono ya ntama. Kinduku na bo vandaka kusadisa mono ve na kuyela na kimpeve. Na nima, mono kudibikaka diaka mingi na maboko ya Nzambi mpi mono tulaka ntima mingi na lusadisu ya banduku na mono ya mpa na dibundu. Zola na bo sambu na mono mpi dikebi yina bo vandaka kutudila mono vandaka mambu yina mono me bikaka ntete ve kumona. Na nima ya bangonda mingi, mono kukaka kuyambula bima yina ke lawusaka mpi ‘kulwata kimuntu ya mpa,’ yina sadisaka mono sambu Nzambi kundima mono. (Baefezo 4:24) Na Août 1985, mono bakaka mbotika mpi mono kumaka Mbangi ya Yehowa.

 Biblia me sadisaka mono na kuyantika luzingu ya mpa. Yo me sadisaka mono na kuyambula bikalulu yina vandaka kubebisa nitu na mono mpi lukumu na mono. Ya kieleka, banduku mono ya ntama kuluta 30 me fwaka ntangu bo vandaka ntete batoko sambu na SIDA to sambu na maladi ya nkaka yina bima ya ke lawusaka ke nataka. Mono kele kibeni na kiese mutindu mono ke sadilaka minsiku ya Biblia na luzingu na mono mpi yo me salaka nde mono kutana ve ti mambu ya mpasi kibeni.

 Bambele mpi masoka yina mono vandaka ntangu yonso kutambula ti yo me kumaka mambu ya ntama. Mono me bikaka ve kuyindula nde kilumbu kele, mono ta nataka Biblia na kisika ya bima yina mpi nde mono ta sadilaka yo sambu na kusadisa bantu. Bubu yai mono ti nkento na mono, beto ke longaka ntangu yonso beto zole nsangu mbote.

 Bibuti na mono me kumaka ve Bambangi ya Yehowa. Kansi bo vandaka kuwa kiese sambu na mambote yina kulonguka Biblia me natilaka mono. Nkutu papa na mono me kotilaka dezia Bambangi ya Yehowa na ntwala ya banduku na yandi yonso. Sambu na yandi, yo vandaka pwelele nde lukwikilu na mono ya mpa kumisaka luzingu na mono mbote kibeni. Mama na mono ke tubaka mbala na mbala nde, yo lombaka nde mono longuka Biblia na ntwala kibeni. Mono ke ndima kibeni mambu yina yandi tubaka.

 Mambu yina mono me kutanaka ti yo me monisaka mono nde, yo kele kibeni buzoba kana muntu ke sadila bima ya ke lawusaka mpi ke sala mambu ya nkaka ya mbi sambu na kuwa kiese. Sesepi kiese ya kieleka ya mono ke waka, ke katukaka na mutindu mono ke sadisaka bantu ya nkaka na kuzaba malongi yina kele na Ndinga ya Nzambi disongidila, malongi yina gulusaka luzingu na mono.