Nzambi Kele Nani?
Bantu mingi ke tubaka nde bo ke kwikilaka na Nzambi. Kansi kana nge yula bo nde Nzambi kele nani, bo ke pesaka bamvutu ya kuswaswana. Bantu ya nkaka ke tubaka nde Nzambi kele zuzi ya nku yina ke zolaka kaka kupesa bantu ndola kana bo me sala mambu ya mbi. Bankaka ke tubaka nde Nzambi ke zolaka mpi ke lolulaka bantu ntangu yonso ata bo me sala mambu ya nki mutindu. Kansi bankaka diaka ke tubaka nde Nzambi kele ntama mpi yandi ke tudilaka beto ve dikebi. Bangindu ya kuswaswana ya mutindu yai ke pusaka bantu mingi na kuyindula nde bo lenda zaba ve Nzambi.
Keti yo kele mfunu na kuzaba Nzambi? Ee. Kuzaba Nzambi mbote lenda sala nde nge vanda ti lukanu na luzingu mpi luzingu ya mbote. (Bisalu 17:26-28) Kana nge kwenda pene-pene na Nzambi, yandi ta zola nge mpi ta sadisa nge mingi. (Yakobo 4:8) Nsuka-nsuka, kuzaba Nzambi mbote lenda sadisa nge na kubaka luzingu ya mvula na mvula.—Yoane 17:3.
Inki mutindu nge lenda zaba Nzambi? Yindula muntu mosi yina nge ke zabaka mbote, mu mbandu nduku na nge ya ngolo. Inki mutindu kinduku yina kumaka ngolo? Ntembe kele ve nde nge sosaka kuzaba zina na yandi, kimuntu na yandi, mambu yina yandi ke zolaka mpi yina yandi ke zolaka ve, mambu yina yandi me salaka mpi yina yandi ke kana kusala, mpi mambu mingi ya nkaka. Mambu yai salaka nde beno kuma banduku, sambu nge longukaka mambu mingi ya me tala yandi.
Mutindu mosi, kutadila bamvutu na bangiufula yai ta sadisa beto na kuzaba Nzambi:
Zulunalu yai ta pesa bamvutu ya Biblia na bangiufula yai. Masolo na yo ta sadisa nge na kuzaba Nzambi mpi mambote yina nge ta baka kana nge kuma nduku na yandi.
Nge Lenda Sepela Mpi Ti
NZOZULU YA NKENGI
Zina ya Nzambi Kele Nani?
Keti nge zabaka nde Nzambi kele ti zina mosi mpamba yina ke sadisaka bantu na kuzaba yandi?
NZOZULU YA NKENGI
Keti Beto Lenda Zaba Nzambi?
Na kutuba ya mbote, mambu ya Nzambi yina beto lenda bakisa ve lenda sadisa beto na kukwenda pene-pene na yandi.
