KETI nge me waka dezia mpasi ya ngolo ebuna nge wa diaka ve nzala ya kuzinga? Kana mpidina, nge lenda bakisa mutindu Adriana kudiwaka. Yandi vandaka ti basusi ya ngolo, yandi vandaka mawa-mawa mpi kondaka kivuvu. Munganga monaka nde Adriana vandaka kuniokwama na mabanza.

Beto tadila mpi mbandu ya Kaoru, yina ke zingaka na Japon; yandi vandaka kusansa bibuti na yandi ya minunu yina vandaka kubela. Yandi ke tuba nde: “Na ntangu yina, mu vandaka ti basusi ya ngolo na kisalu. Na nima, nzala ya kudia vandaka ve, mpi mu vandaka kulala diaka ve mbote. Mu yantikaka kuyindula nde bampasi na mu ta mana kana mu fwa.”

Ojebode, yina ke zingaka na Nigeria, ke tuba nde: “Ntangu yonso mu vandaka mawa-mawa mpi yo vandaka kusala nde mu dila, yo yina mu vandaka kusosa mpila ya kudifwa.” Diambu ya mbote kele nde Ojebode, Kaoru, mpi Adriana kudifwaka ve. Kansi, konso mvula bantu mingi ke kudifwaka.

Bantu mingi yina ke kudifwaka kele babakala; mingi na kati na bo ke waka nsoni na kusosa lusadisu. Yezu tubaka nde bantu yina ke bela ke vandaka na mfunu ya minganga. (Luka 5:31) Yo yina, kana nge ke kudiwa mutindu yai, pardo kuwa nsoni ve na kusosa lusadisu. Bantu mingi yina ke niokwamaka na mabanza me monaka nde lusansu ya mbote lenda sadisa bo na kukanga ntima. Ojebode, Kaoru, mpi Adriana zwaka lusansu ya mbote mpi bubu yai bo ke landa kukanga ntima.

Minganga lenda sadila bankisi to kusolula ti muntu yina ke bela to kusadila mayele yai yonso zole sambu na kusansa muntu yina ke niokwama na mabanza. Bantu yina ke niokwama na mabanza ke zolaka nde bantu ya mabuta mpi banduku na bo kubakisa bo, kuvanda ntima-nda mpi kutudila bo dikebi. Yehowa Nzambi kele nduku ya kuluta mbote yina konso muntu lenda vanda ti yandi; yandi ke pesaka lusadisu ya mbote na Ndinga na yandi, Biblia.

Mbala mingi, yo lenda lomba nde bantu yina ke niokwama na mabanza kubaka lusansu ntangu ya nda mpi kusoba mutindu na bo ya kuzinga. Kana nge ke niokwama na mabanza, nge lenda vingila kuvanda ti luzingu ya kiese na bilumbu ke kwisa bonso Ojebode. Yandi ke tuba nde: “Mu ke vingilaka kulungana ya Yezaya 33:24, yina ke tubilaka ntangu yina ata muntu mosi ve na ntoto ta tuba nde ‘mono ke bela.’” Bonso Ojebode, baka kikesa na lusilu ya Nzambi ya “ntoto ya mpa,” yina “mpasi” ta vanda diaka ve. (Kusonga 21:1, 4) Lusilu yango ke tendula nde bantu ta niokwamaka diaka ve na mabanza. Bampasi na nge ta mana kimakulu. Bampasi na nge ta ‘kwisilaka nge ve na mabanza, yo ta kwisilaka nge mpi ve na ntima.’—Yezaya 65:17.