Nzambi songaka Adami nde: “Kilumbu yina nge ta dia [nti yina], nge ta fwa kibeni.” (Kuyantika 2:17) Kana Nzambi gangaka Adami sambu yandi nuna mpi yandi fwa, Nzambi zolaka ve kupesa yandi nsiku yina. Adami zabaka nde kana yandi diaka ve mbuma ya nti yina, yandi zolaka ve kufwa.

Yo lombaka kaka ve nde Adami ti Eva kudia mbuma ya nti yina sambu bo landa kuzinga, sambu banti mingi yina ke butaka mbuma vandaka na kilanga ya Edeni. (Kuyantika 2:9) Kana bankwelani ya ntete diaka ve mbuma ya nti yina, bo zolaka kumonisa nde bo ke lemfukila muntu yina pesaka bo luzingu. Bo zolaka kumonisa mpi nde bo vandaka kubika nde Nzambi kutwadisa bo.

Sambu na kubakisa kikuma yina Adami ti Eva fwaka, beto fwete tadila ntete mambu yina salamaka mpi ya me natilaka beto yonso bampasi. Satana Diabulu sadilaka nioka sambu na kukusa Eva. Biblia ke tuba nde: “Nioka vandaka mayele kuluta bambisi yonso ya mfinda yina Yehowa Nzambi salaka. Yo yina nioka yulaka nkento nde: ‘Keti Nzambi tubaka kibeni nde beno fwete dia ve mbuma ya konso nti yina kele na kilanga?’”—Kuyantika 3:1.

Eva tubaka nde: “Beto lenda dia bambuma ya banti yina kele na kilanga. Kansi sambu na mbuma ya nti yina kele na kati-kati ya kilanga, Nzambi tubaka nde: ‘Beno fwete dia yo ve, ve, beno fwete simba yo ve; kana ve beno ta fwa.’” Kansi, nioka tubilaka yandi nde: “Beno ta fwa ve ata fioti. Sambu Nzambi me zaba nde kaka kilumbu yina beno ta dia yo meso na beno ta kanguka mpi beno ta kuma bonso Nzambi, beno ta zaba mambu ya mbote ti ya mbi.” Satana monisaka nde Yehowa vandaka muntu ya luvunu mpi yandi me bumbilaka Adami ti Eva kima mosi ya mbote.—Kuyantika 3:2-5.

Eva ndimaka mambu yina. Yandi talaka nti yango. Yandi monaka nde yo vandaka kitoko kibeni! Yo yina, yandi bukaka mbuma na yo mpi yantikaka kudia yo. Biblia ke tuba diaka nde: “Na nima, yandi pesaka mpi ndambu na bakala na yandi ntangu yandi kwisaka, mpi bakala diaka yo.”—Kuyantika 3:6.

Ya kieleka, Yehowa waka kibeni mpasi ntangu yandi monaka nde bana yina yandi ke zolaka mingi me buya kulemfukila yandi na luzolo yonso. Inki yandi salaka? Yehowa songaka Adami nde: “Nge ta vutuka na ntoto, sambu bo bakaka nge na ntoto. Nge kele mfututu mpi nge ta vutuka na mfututu.”  (Kuyantika 3:17-19) Yo yina, “bilumbu yonso ya luzingu ya Adami vandaka bamvula 930, mpi na nima yandi fwaka.” (Kuyantika 5:5) Adami kwendaka ve na zulu to kisika ya nkaka ntangu yandi fwaka. Yandi vandaka ve kuzinga kisika ya nkaka na ntwala nde Yehowa kuganga yandi. Yo yina ntangu yandi fwaka, yandi kumaka diaka mfututu. Yandi vandaka diaka ve na luzingu. Yo kele kibeni diambu ya mpasi.

Sambu Adami ti Eva lemfukilaka ve Nzambi na luzolo yonso, bo vandaka diaka ve bantu ya kukuka mpi bo vidisaka dibaku ya kuzinga mvula na mvula. Luzingu na bo sobaka; bo kumaka bantu ya kukonda kukuka mpi bantu ya masumu. Kansi kukonda bulemfu na bo me natilaka beto yonso bampasi. Bana na bo yonso ke butukaka bantu ya kukonda kukuka. Baroma 5:12 ke tuba nde: “Mutindu disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso sambu bo yonso salaka disumu.”

Biblia ke tubaka nde disumu mpi lufwa kele bonso “lele ya bo ke fikaka bamvumbi yina ke fika bantu yonso mpi lele ya kufika yina bo me tunga na zulu ya makanda yonso.” (Yezaya 25:7) Lele yango ke fikaka bantu bonso lubungi yina kele ti ndikila yina ata muntu mosi ve lenda tina. Ya kieleka, “na nzila ya Adami bantu yonso ke fwaka.” (1 Bakorinto 15:22) Ntumwa Polo yulaka ngiufula yina beto lenda yula mpi bubu yai nde: “Nani ta gulusa mono na nitu yai ya ke nata mono na lufwa yai?” Nani lendaka kusala yo?—Baroma 7:24.