Vanda Bulemfu mpi Kikesa Bonso Kristu

“Beno vanda na kikesa! Mono me bedisaka . . . nsi-ntoto yai.”​—YOA. 16:33.

1. Yezu kulemfukaka na Nzambi tii na nki kiteso?

 YEZU KRISTU vandaka kusala ntangu yonso luzolo ya Nzambi. Ata mbala mosi ve yandi vandaka nkutu ti dibanza ya kukolama na Tata na yandi ya zulu. (Yoa. 4:34; Baeb. 7:26) Kansi, mambu ya yandi kutanaka ti yo awa na ntoto kusalaka ve nde yo vanda pete sambu yandi lemfuka. Banda na luyantiku ya kisalu na yandi ya kusamuna, bambeni ya Yezu, yika mpi Satana yandi mosi, kumekaka na kundimisa, kupusa, to kukusa yandi na kuyambula luzingu na yandi ya kwikama. (Mat. 4:1-11; Luka 20:20-25) Bambeni yai kupesaka Yezu mpasi mingi na mabanza, na mawi, mpi na nitu. Nsuka-nsuka, bo nungaka na kufwa yandi na nti ya mpasi. (Mat. 26:37, 38; Luka 22:44; Yoa. 19:1, 17, 18) Ntangu yandi kutanaka ti mambu yai yonso, mpi ata yandi monaka mpasi mingi, Yezu “lemfukaka na Nzambi tii kuna ya yandi fwaka.”​—Tanga Filipi 2:8.

2, 3. Inki beto lenda longuka na Yezu na yina metala kuvanda bulemfu ata na ntangu yandi kutanaka ti bampasi?

² Luzingu ya Yezu ya kimuntu na ntoto kulongaka yandi mitindu ya mpa ya kulemfuka. (Baeb. 5:8) Yo lenda monana nde yo vandaka ve ata ti kima mosi yankaka yina Yezu lendaka kulonguka na yina metala kusadila Yehowa. Nkutu, yandi vandaka ti bangwisana ya ngolo ti Tata na yandi na nsungi ya bamvula mingi kibeni mpi yandi vandaka “kapita ya kisalu” ya Nzambi na lugangu.  (Bing. 8:30) Ata mpidina, kwikama na yandi ya kukuka kumonanaka ntangu yandi kangaka ntima na lukwikilu ata yandi kutanaka ti bampasi awa na ntoto. Yezu, Mwana ya Nzambi, kuyelaka na kimpeve. Inki beto lenda longuka na mambu yina yandi kutanaka ti yo?

³ Ata yandi vandaka muntu ya kukuka, Yezu kusosaka ve kubikala bulemfu na mutindu ya kukuka na ngolo to na mayele na yandi mosi. Yandi lombaka lusadisu ya Nzambi na kisambu sambu na kubikala bulemfu. (Tanga Baebreo 5:7.) Sambu beto bikala bulemfu, beto mpi fwete kudikulumusa mpi kuvanda ti kikalulu ya kusamba. Sambu na kikuma yai, ntumwa Polo kulongisilaka Bakristu nde: “Beno vanda na mabanza yina Yesu Kristo vandaka ti yo,” sambu “yandi kudikulumusaka mpenza, yandi mpi lemfukaka na Nzambi tii kuna ya yandi fwaka.” (Filp. 2:5-8) Luzingu ya Yezu kumonisaka nde bantu lenda vanda bulemfu ata bo kezinga na ngidika mosi ya mbi. Ya kyeleka, Yezu vandaka muntu ya kukuka, kansi nki beto lenda tuba sambu na beto bantu ya kukonda kukuka?

Beto Lenda Lemfuka Ata Beto Mebutukaka ti Masumu

4. Mutindu Nzambi megangaka beto ti kimpwanza ya kupona ketendula nki sambu na beto?

⁴ Nzambi kugangaka Adami ti Eva bonso bigangwa ya mayele ya vandaka ti kimpwanza ya kupona. Beto bana na bo, beto kele mpi ti kimpwanza ya kupona. Yo ketendula inki? Yo ketendula nde beto lenda pona na kusala mambu ya mbote to ya mbi. Na kutuba yankaka, Nzambi mepesaka beto kimpwanza ya kupona na kulemfuka to na kukolama na yandi. Kimpwanza ya nene ya mutindu yai kenatilaka beto mukumba. Ya kyeleka, badesizio na beto ketendulaka luzingu to lufwa sambu na beto. Yo kevandaka mpi ti bupusi na bantu yina kevandaka penepene na beto.

5. Inki mvita beto yonso kenwanaka, mpi nki mutindu beto lenda nunga?

⁵ Sambu beto mebutukaka ti masumu, yo kevandaka ve pete na kulemfuka. Yo kevandaka ve ntangu yonso pete na kulemfuka na bansiku ya Nzambi. Polo vandaka kunwana sambu na kulemfuka. Yandi sonikaka nde: “Na nitu na mono, mono ke wa nzala ya kusala mambu ya nkaka; nzala yina ke nwana ti bansiku yina ya mono me ndimaka na mabanza na mono. Nzala yina ke pesaka nzila na masumu na kusimba nitu na mono.” (Roma 7:23) Ya kyeleka, kana yo kelomba ve kusala ata kibansa mosi, kumona mpasi, to kana yo keyangisa beto ve, yo kevandaka pete na kulemfuka. Kansi, inki beto kesalaka kana mpusa na beto ya kulemfuka kewakana ve ti “mpusa ya nsuni mpi mpusa ya meso”? Bampusa yai ya mbi kekatukaka na kukonda kukuka na beto mpi na “mpeve” ya nsi-ntoto yai ya mezyunga beto, mpi yo kevandaka ngolo mpenza. (1 Yoa. 2:16, NW; 1 Kor. 2:12) Sambu na kunwana ti yo, beto fwete yidika “ntima” na beto na ntwala nde beto kutana ti dyambu mosi ya mpasi to mumekamu mpi kubaka lukanu nde beto talemfuka na Yehowa, ata beto kutana ti konso dyambu yina. (Nk. 78:8) Beto kele ti bambandu mingi na Biblia ya bantu yina kunungaka sambu bo yidikaka ntima na bo.​—Esd. 7:10; Dan. 1:8.

6, 7. Pesa mbandu ya kemonisa mutindu kulonguka na beto mosi lenda sadisa beto na kubaka badesizio ya mayele.

⁶ Mutindu mosi ya kuyidika ntima na beto kele na kulongukaka na kikesa yonso Masonuku mpi mikanda yina ketendulaka Biblia. Yindula nde nge mekutana ti dyambu yai ya melanda. Yo kele nkokila yina nge kesalaka kulonguka na nge mosi. Nge mekatuka kusamba Yehowa sambu yandi pesa nge mpeve na yandi sambu yo sadisa nge na kusadila mambu ya nge kelonguka na Ndinga na yandi. Nge mekana kutala filme mosi buna na televizio na nkokila yina kelanda. Nge waka bantu mingi ketuba mambu ya mbote sambu na yo; kansi nge mezaba mpi nde yo kele ti mwa mambu ya mansoni mpi ya nku.

⁷ Nge keyindula ndongisila yai ya Polo ya kele na Efezo 5:3: “Beno kele bantu ya Nzambi; yo yina, yo kele mbote ve beno na kutuba sambu na pite, sambu na mambu ya nsoni to sambu na nzala ya kuvanda na konso kima yina.” Nge keyibuka mpi ndongisila ya Polo ya kele na Filipi 4:8. (Tanga.) Ntangu nge keyindulula bandongisila yai ya kupemama, nge kekudiyula nde, ‘Kana mu bika na luzolo yonso nde ntima mpi mabanza na mono kulanda filme ya mutindu yai, keti mu kelanda mbandu ya bulemfu ya kukuka ya Yezu na Nzambi?’ Nge tasala inki? Keti nge tatala kaka filme yango?

8. Sambu na nki beto fwete tanina minsiku ya kuzanguka ya bikalulu ya mbote mpi ya kimpeve?

 ⁸ Yo tavanda kukonda mayele na kubebisa minsiku na beto ya bikalulu ya mbote mpi ya kimpeve, ziku na kuyindulaka nde beto kele mpenza ngolo sambu na kununga bupusi ya banduku ya mbi, yika mpi ntangu bupusi yango lenda katuka na bansaka ya nku, mpi ya mansoni. Kansi, beto fwete kuditanina mpi kutanina bana na beto na bupusi ya mbi ya mpeve ya Satana. Bantu ya kesadilaka baordinatere kesalaka ngolo sambu na kutanina bamashini na bo na bavirisi ya mbi yina lenda fwa baprograme (données), kusala nde ordinatere kusala ve mbote, mpi nkutu kusadila yo sambu na kubebisa baordinatere yankaka. Keti beto fwete tula dikebi ya fyoti na yina metala kuditanina beto mosi na “mayele” ya mbi ya Satana?​—Ef. 6:11.

9. Sambu na nki beto fwete vanda ti lukanu ya kulemfukila Yehowa konso kilumbu?

⁹ Konso kilumbu, na mutindu mosi buna yo kelombaka nde beto pona kana beto tasala mambu na mutindu yina Yehowa kezolaka to ve. Sambu na kubaka luguluku, beto fwete lemfukila Nzambi mpi kuzitisa minsiku na yandi ya lunungu. Kana beto kelanda mbandu ya bulemfu ya Kristu nkutu ‘tii na lufwa,’ beto tamonisa nde lukwikilu na beto kele ya kyeleka. Yehowa tasakumuna luzingu na beto ya kwikama. Yezu kusilaka nde: “Muntu yina ta kanga ntima tii na nsuka, yandi ta guluka.” (Mat. 24:13) Yo ke pwelele nde, kusala dyambu yai kelombaka kuyedisa kikesa ya masonga bonso yina Yezu kumonisaka.​—Nk. 31:25.

Yezu​—Mbandu ya Kuluta Nene ya Kikesa

10. Beto lenda kutana ti bupusi ya nki mitindu, mpi beto fwete sala inki?

¹⁰ Beto kele na mfunu ya kikesa sambu nkadilu mpi bikalulu ya bantu ya nsi-ntoto yai ya mezyunga beto kusambukila beto ve. Bakristu kekutanaka ti bupusi na mambu ya metala bikalulu, luzingu, mbongo, mpi lusambu yina lenda pusa bo na kuyambula banzila ya lunungu ya Yehowa. Bamingi kekutanaka ti kimbeni na dibuta. Na bansi yankaka, banzo-nkanda kesyamisa ngolo dilongi ya ketubaka nde bima kudibasikilaka, mpi bantu mingi mekumaka kundima nde Nzambi kele ve. Na ntwala ya bupusi ya mutindu yai, beto fwete kanga ve maboko mpi kusala ve ata kima mosi. Beto fwete sala ngolo sambu na kunwana, mpi na mutindu yina kuditanina beto mosi. Mbandu ya Yezu kemonisa beto mutindu beto lenda nunga.

11. Inki mutindu kuyindulula mbandu ya Yezu lenda pesa beto kikesa mingi?

¹¹ Yezu kuzabisaka balongoki na yandi nde: “Beno ta mona mpasi mingi awa na nsi-ntoto. Kansi beno vanda na kikesa! Mono me bedisaka . . . nsi-ntoto yai.” (Yoa. 16:33) Yandi kubwaka ve ata fyoti na bupusi ya nsi-ntoto. Yandi bikaka ve ata fyoti nde nsi-ntoto kukanga yandi nzila ya kulungisa kisalu na yandi ya kusamuna to kupusa yandi na kumona mpamba minsiku na yandi ya lusambu ya kyeleka mpi ya bikalulu ya mbote; beto mpi fwete sala mutindu mosi. Na kisambu mosi, Yezu kutubaka mutindu yai sambu na balongoki na yandi: “Bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve.” (Yoa. 17:16) Kulonguka mbandu ya kikesa ya Kristu mpi kuyindulula yo lenda pesa beto ngolo yina beto kele na yo mfunu sambu beto kota ve na mambu ya nsi-ntoto.

 Longuka Kikesa na Mbandu ya Yezu

12-14. Pesa bambandu ya kesonga mutindu Yezu kumonisaka kikesa.

¹² Yezu kumonisaka kikesa ya mingi ntangu yandi vandaka kusala kisalu na yandi ya kusamuna. Na kusadilaka kiyeka na yandi bonso Mwana ya Nzambi, na kikesa yonso yandi “kwendaka kukota na Nzo-Nzambi ya Bayuda, ebuna yandi kulaka bantu yina yonso vandaka kuteka bima ti bantu yina vandaka kusumba bima muna. Yandi losa-losaka bamesa ya bantu yina vandaka kushanze mbongo, ti bakiti ya bayina vandaka kuteka bapizio.” (Mat. 21:12) Ntangu basoda kwisaka kukanga Yezu na mpimpa ya nsuka ya yandi lutisaka na ntoto, yandi salaka mambu na kikesa yonso sambu na kutanina balongoki na yandi. Yandi tubaka nde: “Kana beno ke sosa mono, beno bikisa bantu yai ya nkaka, bo kwenda.” (Yoa. 18:8) Mwa bantangu na nima, yandi zabisaka Piere na kuvutula mbele na yandi; dyambu yai kumonisaka nde Yezu vandaka kutula ntima na Yehowa kansi ve na minduki ya nsi-ntoto.​—Yoa. 18:11.

¹³ Na kikesa yonso, Yezu kutungululaka balongi ya luvunu ya kukonda zola ya bilumbu na yandi mpi malongi na bo ya luvunu. Yezu kuzabisaka bo nde: “Mawa na beno, balongi ya bansiku ti Bafarize! Beno kele bantu ya luvunu! Sambu beno ke kangaka bantu nzila na kukota na Kimfumu ya Nzambi.” Yandi yikaka nde: “Beno ke landaka ve bansiku ya kuluta mfunu: beno ke zolaka kusala bantu mambu ya mbote ve, beno ke wilaka bantu ya nkaka mawa ve, beno kele bantu ya kieleka ve. . . . Beno ke sukulaka makopa ti malonga na beno na nganda, kansi na kati beno me fulusaka yo na bima ya beno ke bakaka na kingolo-ngolo ti na nzala na beno ya kubaka bima sambu na beno mosi kukonda kuyindula bantu ya nkaka.” (Mat. 23:13, 23, 25) Balongoki ya Yezu zolaka kuvanda ti mfunu ya kikesa ya mutindu mosi sambu bantwadisi ya luvunu ya mabundu zolaka kumonisa bo mpasi mpi kufwa bankaka na kati na bo.​—Mat. 23:34; 24:9.

¹⁴ Yezu kunganinaka nkutu bampeve ya mbi na kikesa yonso. Kilumbu mosi, yandi kutanaka ti muntu mosi ya vandaka na mpeve ya mbi mpi ya vandaka ngolo mpenza na mpila nde ata muntu mosi ve lendaka kukangisa yandi bansinga, ata na miniololo. Kukonda boma, Yezu kubasisaka bampeve mingi ya mbi yina vandaka kuyala muntu yango. (Mar. 5:1-13) Bubu yai, Nzambi mepesaka ve Bakristu ngolo ya kusala bimangu ya mutindu yai. Kansi, na kisalu na beto ya kusamuna mpi ya kulonga, beto mpi fwete nwana mvita ya kimpeve ti Satana, muntu yina “me fwaka mayele” ya bantu yina kekwikilaka ve. (2 Kor. 4:4) Bonso na mbandu ya Yezu, “beto ke nwanaka ve na babunduki ya nsi-ntoto, kansi beto ke nwanaka na babunduki ya ngolo ya Nzambi yina lenda” bwisa “bima yina mekangamaka ngolo” (NW)​—malongi ya mabundu yina mebasisaka bansimbulu, kansi yo kele ya luvunu. (2 Kor. 10:4) Ntangu beto kesadila binwaninu yai ya kimpeve, beto kelonguka mambu mingi na mbandu ya Yezu.

15. Lukwikilu ya Yezu vandaka kukatuka na inki?

¹⁵ Kikesa ya Yezu vandaka kukatuka na lukwikilu na yandi. Kikesa na beto mpi fwete katuka na lukwikilu. (Mar. 4:40) Inki mutindu beto lenda baka lukwikilu ya kyeleka? Dyaka, mbandu ya Yezu kesadisa beto. Yandi monisaka nzayilu ya mudindu ya Masonuku mpi vandaka kutudila yo ntima ya mvimba. Kinwaninu ya Yezu vandaka kusadila kuvandaka ve mbele ya kyeleka, kansi mbele ya kimpeve, disongidila Ndinga ya Nzambi. Mbala mingi yandi vandaka kusadila Masonuku sambu na kundimisa malongi na yandi. Mbala na mbala yandi vandaka kuyantika bansa na yandi ti bangogo yai: “Bo sonikaka na Mukanda ya Nzambi nde,” disongidila na Ndinga ya Nzambi. a

16. Inki mutindu beto lenda kuma ti lukwikilu ya ngolo?

¹⁶ Sambu na kuvanda ti lukwikilu yina lenda sadisa beto na kununga mimekamu yina  kekwisilaka beto na kisalu ya kukumisa bantu balongoki, beto fwete tanga mpi kulonguka Biblia konso kilumbu, kukwenda na balukutakanu ya Bukristu, mpi kukotisa na mabanza na beto bakyeleka yina kele fondasio ya lukwikilu. (Roma 10:17) Beto fwete yindulula mpi na mudindu mambu ya beto kelonguka, mpi kubika nde yo kota na ntima na beto. Kima lenda pusa beto na kusala mambu ti kikesa kele kaka lukwikilu yina kele ya moyo. (Yak. 2:17) Mpi beto fwete samba sambu na kulomba mpeve santu sambu lukwikilu kele kitini ya mbuma ya mpeve.​—Gal. 5:22, NW.

17, 18. Inki mutindu leke mosi ya nkento kumonisaka kikesa na nzo-nkanda?

¹⁷ Leke mosi ya nkento na zina ya Kitty kumonaka mutindu lukwikilu ya kyeleka kepesaka kikesa. Banda na bumwana, yandi zabaka nde yandi fwete ‘mona nsoni ve na kuzabisa nsangu ya mbote’ na nzo-nkanda, mpi yandi vandaka mpenza ti mpusa ya kuta kimbangi na bana ya nzo-nkanda na bo. (Roma 1:16) Konso mvula, yandi vandaka ti lukanu ya kuzabisa bankaka nsangu ya mbote, kansi yandi vandaka ti badute sambu yandi kondaka kikesa. Ntangu yandi kumaka toko, yandi sobaka nzo-nkanda. Yandi tubaka nde: “Mbala yai, mu talutisa ve ata dibaku mosi.” Kitty kulombaka Nzambi na kupesa yandi kikesa ti mayele yina Kristu vandaka na yo mpi dibaku ya mbote.

¹⁸ Na kilumbu ya ntete, longi lombaka konso mwana ya nzo-nkanda na kuzabisa bankaka zina na yandi ti mambu ya metala yandi. Bamingi kutubilaka mabundu na bo, mpi kuyikaka nde bo kevukanaka ve mbala na mbala na mambu ya mabundu na bo. Kitty kubakisaka nde yo vandaka dibaku yina yandi lombaka na kisambu. Lere ntangu na yandi kulungaka, yandi tubaka ti kuditudila ntima yonso nde: “Mu kele Mbangi ya Yehowa, mpi kima ketwadisaka mono na mambu ya kimpeve mpi ya bikalulu ya mbote kele Biblia.” Ntangu yandi vandaka kulanda na kutuba, bana yankaka ya nzo-nkanda kutalaka yandi na kikenene. Kansi bankaka kutulaka dikebi mpi na nima bo yulaka yandi bangyufula. Nkutu longi kutubaka nde Kitty kele mbandu ya mbote na yina metala kukotila balukwikilu. Kitty kuvandaka na kyese mingi na kulonguka na mbandu ya kikesa ya Yezu.

Monisa Lukwikilu mpi Kikesa Bonso ya Kristu

19. (a) Kuvanda ti lukwikilu ya kyeleka kelombaka inki? (b) Inki mutindu beto lenda sepedisa Yehowa?

¹⁹ Bantumwa mpi kubakisaka nde kikesa na bo fwete simbama na lukwikilu. Bo bondilaka Yezu nde: “Yika beto lukwikilu.” (Tanga Luka 17:5, 6.) Kuvanda ti lukwikilu ya kyeleka kelombaka mambu mingi kuluta kundima kaka nde Nzambi kele. Yo kelombaka kuyedisa bangwisana ya mudindu mpi ya ngolo ti Yehowa, bonso bangwisana yina mwana ya fyoti kevandaka na yo ti tata ya mbote mpi ya zola. Na ngolo ya mpeve santu, Salomo kusonikaka nde: “Mwana na mono, kana nge kuma mayele, kana mono wa nde nge ke tuba mambu ya mayele, ntima na mono ta vanda kiese, mono ta sepela.” (Bing. 23:15, 16) Mutindu mosi, kana beto kenwanina minsiku ya lunungu na kikesa yonso, yo tasepedisa Yehowa, mpi kuzaba dyambu yai tasala nde beto kuma kikesa mingi. Yo yina, bika beto landa ntangu yonso mbandu ya Yezu, na kunwaninaka minsiku ya lunungu na kikesa yonso!

[Noti na nsi ya lutiti]

Keti Nge Lenda Tendula?

• Inki tasadisa beto na kulanda kuvanda bulemfu ata beto kele bantu ya masumu?

• Lukwikilu ya kyeleka kesimbamaka na inki, mpi nki mutindu yo lenda sadisa beto na kuvanda kikesa?

• Inki tasalama kana beto kele bulemfu mpi kemonisa kikesa bonso Kristu?

[Bangyufula ya disolo ya kulonguka]

[Kifwanisu ya kele na lutiti 16]

Keti nge keyidika “ntima” na nge sambu na kunwana ti bampukumuna?

[Kifwanisu ya kele na lutiti 18]

Bonso Yezu, beto lenda monisa kikesa ya mesimbama na lukwikilu