Mukanda ya Ruti ke binga muntu yina buyaka kulungisa mukumba na yandi na kuwakana ti Nsiku ya Moize nde Kingandi. (Ruti 4:1-12) Keti beto fwete tuba nde bantu yonso yina Biblia ke tanga ve bazina na bo vandaka bantu ya mbi to ya kukonda mfunu?

Ve. Beto tadila mbandu ya nkaka. Sambu na kuyidika madia ya Paki ya nsuka, Yezu zabisaka balongoki na yandi na ‘kukwenda na mbanza na nzo ya Kingandi [“mutu mosi buna,” The New English Bible]’ mpi kuyidika mambu na nzo ya muntu yango. (Matayo 26:18) Keti beto fwete tuba nde muntu yina verse yai ke binga “Kingandi,” vandaka muntu ya mbi to vandaka ve mfunu na mpila nde yo fwanaka ve na kutanga zina na yandi? Ve; “Kingandi” yina bo me tubila na verse yai vandaka longoki ya Yezu. Bo tangaka ve zina na yandi sambu yo vandaka ve mfunu na disolo yai.

Diaka, Biblia me tanga bazina ya bantu mingi ya mbi; yo kele mpi ti bambandu ya bantu mingi ya kwikama yina yo me tanga ve bazina na bo. Mu mbandu, zina ya Eva nkento ya ntete me zabana mbote. Kansi, bwimi mpi kukonda bulemfu na yandi pusaka Adami na kusala disumu yina me natilaka beto bampasi mingi. (Baroma 5:12) Biblia me tanga ve zina ya nkento ya Noa, ata mpidina beto ke sepelaka na kikalulu na yandi ya kuditambika, mpi ya bulemfu na mutindu yandi sadisaka bakala na yandi na kisalu na yandi ya mfunu. Yo ke pwelele nde, kukonda kutanga zina na yandi ke monisa ve nde yandi vandaka ve mfunu to Nzambi ndimaka yandi ve.

Kele mpi ti bantu ya nkaka yina Biblia me tanga ve bazina ya kusalaka mambu ya mfunu, ata nkutu ya mpasi kibeni sambu na kulungisa lukanu ya Yehowa. Beto yindula leke ya nkento ya Izraele yina vandaka mpika na nzo ya Namani, mfumu ya basoda ya Siria. Ti kikesa, yandi zabisaka nkento ya Namani mambu ya me tala profete ya Yehowa yina vandaka na Izraele. Yo salaka nde kimangu mosi ya nene kusalama. (2 Bantotila 5:1-14) Mwana-nkento ya Yefte, zuzi ya Izraele, bikaka mpi mbandu ya mbote ya lukwikilu. Yandi ndimaka kubuya kukwela mpi kubuta sambu na kulungisa lusilu ya Tata na yandi. (Bazuzi 11:30-40) Mutindu mosi, Biblia me tanga ve bazina ya bansoniki ya bankunga kuluta 40; yo me tanga mpi ve bazina ya baprofete ya nkaka yina lungisaka mikumba ya nene na kwikama yonso.​—1 Bantotila 20:37-43.

Ziku, mbandu ya ke benda dikebi kele ya bawanzio ya kwikama. Ata yo kele ti bankama ya bamilio ya bawanzio, Biblia me tanga kaka bazina ya bawanzio zole​—Gabriele mpi Mishele. (Daniele 7:10; Luka 1:19; Yude 9) Bawanzio yonso yina me bikala, Biblia me tanga ve bazina na bo. Mu mbandu Manoa tata ya Samsoni yulaka wanzio mosi nde: “Songa beto zina na nge, mpidina beto ta kumisa nge kana mambu ya nge me tuba yo bwa mpidina.” Inki mvutu wanzio pesaka? Yandi tubaka nde: ‘Sambu na nki nge ke zola kuzaba zina na mono?’ Na kudikulumusa yonso, wanzio buyaka kundima lukumu yina fwanaka kaka na Nzambi.​—Bazuzi 13:17, 18.

Biblia ke pesa ve kikuma yina yo me tanga bazina ya bantu mosi buna kansi ya bankaka ve. Kansi beto lenda baka malongi mingi na masolo ya bantu ya kwikama yina sadilaka Nzambi kukonda kusosa kuzabana.