DISOLO YINA KELE NA LUTITI YA ZULU | KANA MUNTU ME FWA
Keti Kivuvu Kele Sambu na Bafwa?
Keti bafwa lenda zinga diaka?
MVUTU YA BIBLIA: ‘Ngunga ke kwisa ntangu bantu yonso ya kele na maziamu ya mbambukilu ta wa ndinga ya [Yezu] mpi ta basika.’
Yezu tubaka na ntwala nde na bilumbu ya ke kwisa ntangu yandi ta yala na Kimfumu na yandi, yandi ta futumuna bafwa. Fernando, muntu ya beto me tubila na disolo ya luyantiku ke tuba nde: “Mono yitukaka mingi ntangu mono tangaka Yoane 5:28, 29 na mbala ya ntete. Yo pesaka mono kivuvu ya kieleka mpi mono kumaka kutadila bilumbu ya ke kwisa na mutindu mosi ya mbote.”
Na ntangu ya ntama, Yobi muntu ya kwikama vandaka ti kivuvu nde na nima ya lufwa na yandi, Nzambi ta vutula yandi na luzingu. Yandi yulaka nde: “Kana muntu kufwa, keti yandi ta telama diaka?” Yandi pesaka mvutu ti kivuvu yonso nde: “Na bilumbu yonso ya kisalu na mono ya ngolo [na Maziamu], mono ta vingila tii kuna kimpwanza na mono ta kwisa. Nge ta binga, mpi mono ta ndima.” —Yobi 14:14, 15,NW.
Lufutumuku ya Lazare ke pesa beto kivuvu sambu na bilumbu ya ke kwisa
Lufutumuku vandaka ve kima ya mpa sambu na Marta, mpangi ya Lazare ya nkento. Ntangu Lazare fwaka, Yezu songaka yandi nde: “Mpangi na nge ta futumuka.” Marta vutulaka nde: “Mono me zaba nde yandi ta futumuka na lufutumuku na kilumbu ya nsuka.” Yo yina, Yezu tubilaka yandi nde: “Mono kele lufutumuku mpi luzingu. Muntu yina ke monisa lukwikilu na mono, ata kana yandi fwa, yandi ta vutuka na luzingu.” (Yoane 11:23-25) Na nima, Yezu futumunaka Lazare kukonda kusukinina! Disolo yai ya kitoko ke monisa mambu ya nene yina ta salama na bilumbu ya ke kwisa. Yindula mutindu bantu ta futumuka na ntoto ya mvimba!
Keti bantu ya nkaka ta futumuka sambu na kukwenda na zulu?
MVUTU YA BIBLIA: Ndinga ya Nzambi ke monisa nde lufutumuku ya Yezu me swaswana ti balufutumuku nana yina Biblia ke tubilaka. Bantu nana yina futumukaka zingaka diaka awa na ntoto. Kansi sambu na lufutumuku ya Yezu, Biblia ke tuba nde: “Yezu Kristu . . . kele na diboko ya kitata ya Nzambi, sambu yandi kwendaka na zulu.” (1 Piere 3:21, 22) Keti Yezu kele muntu mosi kaka yina futumukaka sambu na kukwenda na zulu? Yezu zabisaka balongoki na yandi na ntwala nde: “Kana mono kwenda mpi kuyidikila beno kisika, mono ta kwisa diaka mpi ta yamba beno kisika mono kele, sambu kisika yina mono kele, beno mpi beno vanda.”
Kristu kwendaka na zulu sambu na kuyidikila balongoki na yandi ya nkaka kisika. Bantu yina ta futumuka sambu na kukwenda na zulu ta vanda 144 000. (Kusonga 14:1, 3) Kansi, nki mambu balongoki ya Yezu yai ta sala kuna na zulu?
Bo ta vanda ti mambu mingi ya kusala! Biblia ke zabisa beto nde: “Konso muntu yina ke baka lufutumuku ya ntete kele na kiese mpi kele santu; lufwa ya zole ta vanda ve ti kiyeka na zulu na bo, kansi bo ta vanda banganga-nzambi ya Nzambi mpi ya Kristu, mpi bo ta yala bonso bantotila ti yandi bamvula 1 000.” (Kusonga 20:6) Bantu yina ta futumuka sambu na kukwenda na zulu ta kuma bantotila mpi banganga-Nzambi, mpi bo ta sala ti Kristu sambu na kuyala bantu awa na ntoto.
Banani diaka ta futumuka na nima?
MVUTU YA BIBLIA: Disolo ya ntumwa Polo ya kele na Masonuku ya kupemama ke tuba nde: “Mono kele ti kivuvu na Nzambi, kivuvu yina bantu yai mpi kele na yo, nde bantu ya lunungu ti bantu ya kukonda lunungu ta futumuka.”
Ndinga ya Nzambi ke sila beto nde bamiliare ya bantu yina me fwaka ta zinga diaka
Banani ta vanda na kati ya kimvuka ya bantu yina Polo bingaka nde “bantu ya lunungu”? Beto tadila diambu yai. Na ntwala nde Daniele kufwa, Nzambi zabisaka yandi nde: “Nge ta fwa kansi na kilumbu ya nsuka nge ta telama na kubaka matabisi na nge.” (Daniele 12:13) Daniele ta futumuka na wapi? Biblia ke tuba nde: ‘Bantu ya mbote ta zinga na ngemba na ntoto yina Mfumu Nzambi tubaka na kupesa bo; yo ta vanda ya bo tii kuna.’ (Nkunga 37:29) Diaka, Yezu tubaka na ntwala nde: “Kiese na bantu ya mawete, sambu bo ta baka ntoto.” (Matayo 5:5) Daniele mpi babakala ti bankento ya nkaka ya kwikama ta futumuka sambu na kuzinga diaka na ntoto kimakulu.
Banani ta vanda na kati ya kimvuka ya bantu yina Polo bingaka nde “bantu ya kukonda lunungu”? Yo kele bamiliare ya bantu yina zingaka mpi fwaka, mpi mingi na kati na bo zwaka ve dibaku ya kubakisa kieleka ya Biblia mpi ya kusadila yo. Na nima ya lufutumuku na bo, bo ta zwa dibaku ya kuzaba mpi kuzitisa Yehowa * mpi Yezu. (Yoane 17:3) Bantu yonso yina ke pona na kusadila Nzambi ta vanda ti kivuvu ya kuzinga kimakulu bonso Yehowa yandi mosi.
Bantu yonso yina ke pona na kusadila Nzambi ta vanda ti kivuvu ya kuzinga kimakulu na mavimpi ya mbote mpi na kiese
Luzingu ta vanda nki mutindu awa na ntoto?
MVUTU YA BIBLIA: Nzambi “ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.” (Kusonga 21:4) “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo.”
Yindula mutindu nge ta zinga na kiese ti bantu ya nge vandaka kuzola yina ta futumuka! Kansi ngiufula mosi yo yai: Inki ke ndimisa nge nde lufutumuku ta vanda?
^ par. 15 Yehowa kele zina ya Nzambi mutindu Biblia ke monisa yo.
