BENO LANDA KUKENGILA!

Bamilio 6 ya Bantu Me Fwa na Maladi ya Coronavirus—Inki Biblia Ke Tuba?

TALA NA

Kimvuka Yina Ke Talaka Mambu ya Sante na Ntoto ya Mvimba (Organisation mondiale de la santé) ke monisa nde, tii na kilumbu ya Kintete 23 mai 2022, bamilio 6.27 ya bantu me fwa dezia sambu na maladi ya Coronavirus. Kansi, na nsangu mosi yina kimvuka yango pesaka na kilumbu ya Kiya 5 mai 2022, bo monisaka nde ntalu ya bantu yina me fwa tii pana lenda vanda mingi diaka. Nsangu yango tubaka nde na 2020 mpi na 2021, “ntalu ya bantu yina fwaka sambu na COVID-19 to sambu na bamaladi ya nkaka . . . vandaka kiteso ya bamilio 14.9.” Inki Biblia ke tubaka sambu na mambu ya mpasi ya mutindu yai?

Biblia tubilaka na ntwala bamaladi ya ngolo ya ta panzana na ntoto ya mvimba

Yezu tubaka na ntwala nde bamaladi yina ke panzanaka nswalu mpi ke fwaka bantu mingi, to bipupa ya ngolo ta basika na nsungi yina Biblia ke binga nde “bilumbu ya nsuka.”—Luka 21:11; 2 Timoteo 3:1.

Mambu yina Yezu tubaka na ntwala ke lungana bubu yai. Sambu na kuzaba mambu mingi, tanga disolo “Inki Kele Kidimbu ya ‘Bilumbu ya Nsuka’ to ‘Ntangu ya Nsuka’?“

Biblia ke pesaka kikesa

“Nzambi yina ke lembikaka bantu yonso . . . ke lembikaka beto na bampasi na beto yonso.”—2 Bakorinto 1:3, 4.

Nsangu ya kele na Biblia me pesaka bantu mingi yina bampangi na bo me fwaka kikesa. Sosa kuzaba mambu mingi na disolo “Kunwana ti Mpasi Yina Lufwa Ke Nataka—Mambu Yina Nge Lenda Sala Bubu Yai” mpi na disolo “Lusadisu ya Kuluta Mbote Sambu na Bantu Yina Kele na Mpasi ya Lufwa.“

Biblia ke tubila luyalu yina ta manisa bampasi

“Kimfumu na nge kukwisa. Luzolo na nge kusalama na ntoto, bonso na zulu.”—Matayo 6:10.

Kubika fioti, “Kimfumu ya Nzambi” ta sala kima mosi sambu ‘ata muntu mosi ve ya ke zingaka na insi kutuba nde: “Mono ke bela.” (Marko 1:14, 15; Yezaya 33:24) Tala video Kimfumu ya Nzambi Kele Nki? sambu na kuzaba mambu ya me tala luyalu yina ya kele na zulu mpi mambu yina yo ta sala.

Beto ke lomba nge na kusosa kuzaba mambu mingi yina Biblia ke tubaka sambu nge ti dibuta na nge kubaka mambote ya bandongisila ya mbote ya kele na Biblia mpi ya balusilu ya kitoko yina kele na kati.