BENO LANDA KUKENGILA!
Munganga Mosi ya Ke Tadilaka Mambu ya Sante Me Tubila Bigonsa ya Basite Internet ya Kusolula ti Bantu Sambu na Bana—Inki Biblia Ke Tuba?
Na Kizole 23 mai 2023, munganga mosi ya ke landilaka mambu ya sante na États-Unis bendaka dikebi ya bantu na malanda ya mbi yina basite Internet ya kusolula ti bantu (réseaux sociaux) kele ti yo sambu na bana.
“Ata basite Internet ya kusolula ti bantu lenda natila bana mpi batoko mambote mingi, yo kele ti mambu ya ke monisa nde basite yango lenda bebisa mabanza ya bana mpi ya batoko. Nkutu yo lenda bebisa mpi nitu na bo.”—Réseaux sociaux et santé mentale des jeunes: Chef des services de santé des États-Unis, 2023.
Munganga yango tubilaka bansosa yina salamaka mpi ya ke monisa nde bigonsa kele.
Bana ya bamvula 12 tii na 15 “yina ke lutisaka bangunga kuluta 3 konso kilumbu na ntwala ya basite Internet ya kusolula ti bantu, mabanza na bo vandaka kubeba kibeni mpi bo yantikaka kudiyangisa to kuniokwama na mabanza.”
Bana ya bamvula 14 “yina vandaka kusadila basite Internet ya kusolula ti bantu vandaka kukutana ti mambu mingi ya mpasi, bamingi vandaka diaka ve kulala mbote, banduku na bo vandaka kusosila bo, bo vandaka ve kusepela ti mutindu bo kele, bo vandaka kudiwa bantu ya kukonda mfunu mpi kudiyangisa na mabanza.”
Inki mutindu bibuti lenda tanina bana bo na bigonsa yai? Biblia ke pesa bandongisila yina lenda sadisa kibeni bibuti.
Inki bibuti lenda sala?
Beno kudikotisa na mambu yango. Mutindu beno kele bibuti, beno tadila bigonsa yina basite yango lenda vanda ti yo sambu na bana mpi beno baka lukanu kana yo ke lomba nde bana na beno kusadila basite yango to ve.
Munsiku ya Biblia: “Longa mwana na nzila yina yandi fwete kwenda.”—Bingana 22:6, noti ya nsi ya lutiti.
Sambu na kuzaba mambu mingi, tanga disolo “Keti Mwana na Mono Fwete Sadila Basite Internet ya Kusolula ti Bantu?”
Kana beno me pesa bana na beno nzila ya kusadila basite Internet ya kusolula ti bantu, beno sosa kuzaba bigonsa yina lenda basika mpi beno kudikotisa na mambu yina bo ke sala na basite yango. Inki mutindu beno lenda sala yo?
Beno tanina bana na beno na mambu ya mbi ya kele na kati. Beno longa bana mutindu bo lenda zaba mambu ya mbi mpi kutina yo.
Munsiku ya Biblia: “Bika bo tubila nkutu ve pite mpi mitindu yonso ya mambu ya mvindu to lukasi na kati na beno, . . . to bikalulu ya nsoni, to kutuba mambu ya buzoba, to kutuba mambu ya nsoni sambu na kusekisa.”—Baefezo 5:3, 4.
Sambu na kuzwa bandongisila ya lenda sadisa beno kibeni, beno tanga disolo “Longa Mwana Mutindu ya Kusadila Mbote Basite Internet ya Kusolula ti Bantu.”
Beno tudila bana bandilu. Mu mbandu, beno tudila bo bansiku na yina me tala inki ntangu bo lenda sadila basite Internet ya kusolula ti bantu mpi bangunga ikwa bo fwete sadila yo.
Munsiku ya Biblia: “Beno keba mbote-mbote nde mutindu beno ke tambula kuvanda . . . bonso bantu ya mayele, beno sadila ntangu na beno mbote kibeni.”—Baefezo 5:15, 16.
Beno sadila video Vanda Mayele Ntangu Nge Ke Solula ti Bantu na Nzila ya Internet sambu na kusadisa bana na beno na kuzaba mfunu ya kutula bandilu na yina me tala kusadila basite Internet ya kusolula ti bantu.