Yezu kele na tempelo, yandi me katuka kutulana ntembe ti bamfumu ya banganga-nzambi mpi bambuta-bantu yina me yula yandi kana yandi ke sala mambu na kiyeka ya nani. Mvutu ya Yezu me kangisa bo munoko. Na nima, yandi me pesa mbandu mosi ya ke monisa kibeni mutindu ya bantu yina bo kele.

Yezu me tuba nde: “Muntu mosi vandaka ti bana zole. Yandi kwendaka na mwana ya ntete mpi tubaka nde, ‘Mwana na mono, kwenda kusala bubu yai na kilanga ya vinu.’ Mwana yai vutulaka nde, ‘Mono ta kwenda ve,’ kansi na nima, yandi waka mawa ebuna yandi kwendaka. Ntangu yandi kwendaka na mwana ya zole, yandi tubaka mutindu mosi. Mwana yai vutulaka nde, ‘Tata, mono ta kwenda,’ kansi yandi kwendaka ve. Nani na kati ya bana yai zole salaka luzolo ya tata na yandi?” (Matayo 21:28-31) Mvutu kele pwelele nde na nsuka, mwana ya ntete muntu salaka luzolo ya tata na yandi.

Yo yina, Yezu me songa bambeni na yandi nde: “Ya kieleka mono ke tubila beno nde bakalaki ya mpaku mpi bankento ya ndumba ke kwenda na ntwala na beno na Kimfumu ya Nzambi.” Bakalaki ya mpaku ti bankento ya ndumba vandaka ntete ve kusadila Nzambi. Kansi na nima, bonso mwana ya ntete, bo balulaka ntima mpi ntangu yai bo ke sadila yandi. Bamfumu ya mabundu kele bonso mwana ya zole sambu bo ke tubaka nde bo ke sadilaka Nzambi, kansi na kutuba masonga bo ke salaka yo ve. Yezu me tuba nde: “Yoane [Mbotiki] kwisaka na beno na nzila ya lunungu, kansi beno kwikilaka yandi ve. Kansi, bakalaki ya mpaku mpi bankento ya ndumba kwikilaka yandi, mpi beno, ata beno monaka mambu yai, beno waka ve mawa na nima sambu na kukwikila yandi.”—Matayo 21:31, 32.

Yezu me pesa mbandu ya zole. Ntangu yai yandi me monisa nde bamfumu ya mabundu me buya kaka ve kusadila Nzambi. Bo kele kibeni bantu ya mbi. Yezu me tuba nde: “Muntu mosi kunaka kilanga ya vinu, yandi salaka lupangu sambu na kuziunga yo, yandi timunaka dibulu sambu na kikamuninu ya vinu mpi yandi tungaka nzo-zulu; ebuna yandi bikaka yo na bantu ya ke salaka bilanga sambu bo futila yo, mpi yandi salaka nzietelo na insi ya nzenza. Ntangu nsungi ya kukatula bambuma lungaka, yandi tindaka mpika mosi na bantu ya ke salaka bilanga sambu yandi kwenda kubaka ndambu ya bambuma ya kilanga ya vinu na bantu yina. Kansi bo simbaka yandi, bo bulaka yandi, mpi bo vutulaka yandi maboko mpamba. Diaka, yandi tindilaka bo mpika ya nkaka, mpi bo bulaka mpika yina na ntu mpi fingaka yandi. Yandi tindaka mpika ya nkaka, mpi bo fwaka yandi, ebuna yandi tindaka bampika ya nkaka mingi, bo bulaka bankaka mpi bo fwaka bankaka.”—Marko 12:1-5.

Keti bantu yina ke widikila Yezu me bakisa mbandu yai? Ziku, bo me yibuka mambu yina Yezaya tubaka nde: “Kilanga ya vinu ya Yehowa ya makesa kele nzo ya Izraele, bantu ya Yuda kele masamba yina yandi vandaka kuzola mingi. Yandi landaka kutula kivuvu nde lunungu ta vanda, kansi, tala! kukonda lunungu vandaka.” (Yezaya 5:7) Mbandu ya Yezu kele kiteso mosi. Yehowa kele munkwa-kilanga mpi dikanda ya Izraele kele kilanga ya vinu, yo kele na kati ya lupangu mpi Nsiku ya Nzambi vandaka kutanina yo. Yehowa tindaka bambikudi sambu bo longa bantu na yandi mpi bo sadisa bo na kubuta bambuma ya mbote.

Kansi, “bantu ya ke salaka bilanga” me niokula “bampika” yina bo tindilaka bo mpi bo me fwa bampika yango. Yezu me tuba nde: “Yandi [Munkwa-kilanga ya vinu] vandaka diaka ti muntu ya nkaka, mwana mosi ya yandi vandaka kuzola mingi. Na nsuka, yandi tindilaka bo yandi mpi tubaka nde, ‘Bo ta zitisa mwana na mono.’ Kansi bantu ya ke salaka bilanga tubaka bo na bo nde, ‘Yandi yai muntu yina ta baka kimvwama. Beno kwisa, beto fwa yandi, mpi kimvwama ta vanda ya beto.’ Yo yina bo simbaka yandi, bo fwaka yandi.”—Marko 12:6-8.

Ntangu yai, Yezu me yula nde: “Munkwa-kilanga ya vinu ta sala inki?” (Marko 12:9) Bamfumu ya mabundu me tuba nde: “Sambu bo kele bantu ya mbi, yandi ta fwa bo mpi yandi ta bika kilanga ya vinu na bantu ya nkaka ya ke salaka bilanga sambu bo futila yo, bayina ta pesa yandi bambuma na nsungi ya me fwana.”—Matayo 21:41.

 Bo mosi me kudisambisa, sambu bo kele na kati ya “bantu ya ke salaka bilanga” na “kilanga ya vinu” ya Yehowa, disongidila dikanda ya Izraele. Kukwikila na Mwana na yandi, yina kele Mesia, kele mbuma mosi na kati ya bambuma yina Yehowa vandaka kuvingila nde bantu yai kubuta. Yezu me tala bamfumu ya mabundu mpi me songa bo nde: “Keti beno me tangaka ntete ve na masonama ya santu nde: ‘Ditadi yina bantu ya ke tungaka losaka me kumaka ditadi ya kinkonko ya ntete-ntete. Ditadi yina katukaka na Yehowa, mpi yo kele kima mosi ya kuyituka na meso na beto’?” (Marko 12:10, 11) Na nima, Yezu me monisa pwelele diambu yina yandi ke zola kutubila. Yandi me tuba nde: “Yo yina mono ke tubila beno nde, bo ta katula Kimfumu ya Nzambi na maboko na beno mpi bo ta pesa yo na dikanda mosi yina ta buta bambuma na yo.”—Matayo 21:43.

Bansekudi ti bamfumu ya banganga-nzambi me bakisa nde Yezu ‘me pesa mbandu yai sambu na bo.’ (Luka 20:19) Yo yina, bo me sosa kufwa Yezu, muntu yina me fwana na ‘kubaka kimvwama.’ Kansi, bo ke wa bimvuka ya bantu boma sambu bimvuka yai ke monaka nde Yezu kele mbikudi; yo yina bo me kuka ve kufwa yandi ntangu yai.