Biblia ke tubilaka mbala mosi mpamba mambu ya me tala kubula bakashe to kusala banzoloko (tatouage) na nitu. Yo ke tubilaka mambu yai na Levi 19:28. Yo ke tuba nde: “Beno fwete zenga-zenga ve nsuni na beno.” Nzambi pesaka bantu ya Izraele nsiku yai sambu bo vanda ve bonso bantu ya makanda ya nkaka yina vandaka kubula bakashe ya bazina ya banzambi na bo to ya bifwanisu ya banzambi yango na nitu. (Kulonga 14:2) Ata Bakristu ke landaka diaka ve Nsiku ya Moize, yo me fwana nde bo tadila na dikebi yonso mambu yina nsiku yai ke zola mpenza kutuba na yina me tala kubula bakashe na nitu.

Keti Mukristu lenda budisa kashe na nitu?

 Baverse yai ya Biblia lenda sadisa nge na kutadila mbote-mbote diambu yai:

•   “Bankento fwete kuditomisa . . . kukonda kulutisa ndilu.” (1 Timoteo 2:9) Mambu verse yai ke tuba ke tala bankento ti bakala. Mutindu na beto ya kulwata mpi ya kuyidika nitu fwete monisa nde beto ke zitisa bantu ya nkaka mpi beto fwete sosa ve nde yo benda dikebi ya bantu ya nkaka na kimuntu na beto.

•   Bantu ya nkaka ke bulaka bakashe na nitu sambu bantu kuzaba kana bo kele banani to nde bo kele bantu ya kimvuka mosi buna, kansi bankaka ke bulaka yo sambu na kumonisa nde bo kele ti nswa ya kusala konso kima ya bo me zola na nitu na bo. Kansi Biblia ke songaka Bakristu nde: ‘Beno pesa nitu na beno bonso kimenga ya moyo, ya santu, ya Nzambi ke ndimaka, na mutindu yina beno ta sala kisalu ya santu ti mayele na beno ya kuyindula.’ (Baroma 12:1) Sadila ‘mayele na nge ya kuyindula’ mpi sosa kuzaba sambu na nki nge ke zola kubudisa kashe na nitu. Kana nge ke zola kusala yo kaka sambu na kusonga bantu nde nge ke vandaka na kimvuka mosi buna, kuvila ve nde yo kele ti kilumbu yina nge ta baka lukanu ya kusoba, kansi kashe yina ta katuka diaka ve na nitu. Kana nge tadila mambu yina ke pusa nge na kusala yo, nge ta baka lukanu ya mbote.—Bingana 4:7.

•   “Balukanu ya muntu yina ke salaka ngolo ke nataka kibeni na kununga, kansi bantu yonso yina ke salaka mambu ntinu-ntinu ta suka kibeni na kinsukami.” (Bingana 21:5) Mbala mingi bantu ya ke bakaka lukanu ya kubudisa kashe na nitu ke salaka mambu ntinu-ntinu. Bo ke bakaka ve ntangu ya kutadila mutindu bantu ya nkaka lenda kukuma kutadila bo mpi nde yo lenda kumina bo mpasi na kuzwa kisalu. Mbala mingi kubudisa bakashe na nitu ke lombaka mbongo mingi mpi kana bo ke katula nge yo, nge ta wa mpasi mingi na nitu. Bantu ya mayele mpi bakompani yina ke katulaka bantu bakashe na nitu ke monisa nde bantu mingi ya ke budisaka bakashe na nitu ke kudiyangisaka na nima mutindu bo bakaka lukanu ya kubudisa kashe na nitu.