Sambu na kusadisa nge na kuzaba nde bantu yai kele na dibundu ya kieleka mpi bayai kele na dibundu ya luvunu, Biblia ke sadila mbandu mosi. Yo ke tuba nde: “Beno ta zaba bo na bambuma na bo. Bantu ke katulaka ve ata fioti bambuma ya vinu to ya bafige na nti ya bansende, mpidina ve?” (Matayo 7:16) Nge lenda zaba nde yai kele nti ya bambuma ya vinu mpi yai kele nti ya bansende na mbuma yina yo ke buta. Kiteso mosi nge lenda zaba nde yai kele dibundu ya kieleka kansi yai ya nkaka kele dibundu ya luvunu na nsadisa ya mambu yina ke salamaka kuna, to ya mambu yai ke landa.

1.   Dibundu ya kieleka ke longaka mambu ya kieleka yina ke katukaka na Biblia, kansi na bangindu ya bantu ve. (Yoane 4:24; 17:17) Na kati ya mambu yango ya kieleka, beto lenda tanga kieleka na yina me tala moyo mpi kivuvu ya luzingu ya mvula na mvula na paladisu awa na ntoto. (Nkunga 37:29; Yezaya 35:5, 6; Ezekiele 18:4) Dibundu ya kieleka ke bangaka mpi ve kumonisa na pwelele yonso mabundu ya luvunu.—Matayo 15:9; 23:27, 28.

2.   Dibundu ya kieleka ke sadisaka bantu na kuzaba Nzambi, mu mbandu yo ke longaka bo zina na yandi, Yehowa. (Nkunga 83:18; Yezaya 42:8; Yoane 17:3, 6) Yo ke longaka ve bantu nde bo lenda zaba ve Nzambi to nde yandi kele ntama ti bantu; kansi yo ke longaka nde yandi ke zolaka nde beto kuma banduku na yandi.—Yakobo 4:8.

3.   Dibundu ya kieleka ke longaka nde Nzambi ta gulusa beto na nzila ya Yezu Kristu. (Bisalu 4:10, 12) Bantu yina kele na dibundu ya kieleka ke zitisaka nsiku ya Yezu mpi ke salaka bikesa sambu na kulanda mbandu na yandi.—Yoane 13:15; 15:14.

4.   Dibundu ya kieleka ke monisaka nde kaka Kimfumu ya Nzambi mpamba ta katula bantu na mpasi. Bantu yina kele na dibundu ya kieleka ke longaka mambu ya Kimfumu yango na kikesa.—Matayo 10:7; 24:14.

5.   Dibundu ya kieleka ke pusaka bantu na yo na kuzolana na ntima ya mvimba. (Yoane 13:35) Yo ke longaka bantu na yo na kuzitisa bantu ya makanda yonso mpi yo ke ndimaka bantu ya mpusu yonso ya nitu, ya minoko yonso, ya mutindu yonso mpi ya bisika yonso. (Bisalu 10:34, 35) Bantu ya dibundu ya kieleka ke kotaka ve na bitumba sambu bo ke zolaka bantu ya nkaka.—Mika 4:3; 1 Yoane 3:11, 12.

6.   Dibundu ya kieleka ke vandaka ve ti bamfumu ya bo ke futaka mbongo, mpi yo ke pesaka ve bandimi na yo batitre ya dibunbu to batitre ya lukumu.—Matayo 23:8-12; 1 Piere 5:2, 3.

7.   Dibundu ya kieleka ke kotaka ve ata fioti na mambu ya politiki. (Yoane 17:16; 18:36) Kansi bandimi na yo ke zitisaka mpi ke lemfukilaka baluyalu ya bansi yina bo ke zingaka, na kuwakana ti nsiku yai ya Biblia: “Beno pesa bima ya Kaisali na Kaisali [disongidila bamfumu ya leta], kansi bima ya Nzambi na Nzambi.”—Marko 12:17; Baroma 13:1, 2.

8.   Dibundu ya kieleka kele luzingu yonso ya muntu, kansi ve kaka kulanda bankinsi to kukwenda na nzo-nzambi. Bantu yina kele na dibundu ya kieleka ke zitisaka minsiku ya bikalulu ya mbote ya kele na Biblia na luzingu na bo ya mvimba. (Baefezo 5:3-5; 1 Yoane 3:18) Ata mpidina, bo ke vandaka ve bantu ya mawa-mawa kansi bantu ya kiese sambu bo ke sambilaka “Nzambi ya kiese.”—1 Timoteo 1:11.

9.   Bantu ya dibundu ya kieleka ta vanda ve mingi. (Matayo 7:13, 14) Mbala mingi, bo ke vwezaka bantu yina kele na dibundu ya kieleka, bo ke sekaka bo mpi bo ke niokulaka bo sambu bo ke salaka luzolo ya Nzambi.—Matayo 5:10-12.

Dibundu ya kieleka kele kaka ve ‘dibundu yina ke sepedisa nge’

 Kana beto me pona kukuma muntu ya dibundu mosi buna kaka sambu yo me sepedisa beto, beto kele na kigonsa. Biblia tubaka na ntwala nde yo ta vanda ti ntangu mosi yina bantu “ta baka balongi [ya mabundu] sambu bo zabisa bo mambu yina bo ke zola kuwa.” (2 Timoteo 4:3) Kansi, Biblia ke siamisa beto na kulanda dibundu yina ‘kele bunkete mpi ya kukonda mvindu na meso ya Nzambi mpi Tata na beto,’ ata bantu mingi ke sepelaka ve ti yo.—Yakobo 1:27; Yoane 15:18, 19.