“Kumisa tata na nge ti mama na nge, sambu nge zinga mingi na insi yina Yehowa Nzambi na nge ke pesa nge.”—Kubasika 20:12, Mbalula ya Nsi-Ntoto ya Mpa.

 “Zitisa tata na nge ti mama na nge; mpidina nge ta zinga bilumbu mingi na ntoto ya mono MFUMU NZAMBI, Nzambi na nge, ke pesa nge.”—Kubasika 20:12, Bible en Kituba.

 Nzambi songaka bantu ya Izraele ya ntama na kupesa bibuti na bo lukumu. Mutindu yandi yikaka lusilu na nsiku yina, yandi pesaka bo kikuma ya nkaka ya kuzitisa yo. Ata Nsiku yina Nzambi pesaka bantu ya Izraele, yina bo vandaka kubinga Nsiku ya Moize, kele diaka ve na ngala, bansiku na yandi me sobaka ve. Bansiku ya Nzambi katukaka na bakieleka ya mfunu yina kele kaka na ngala tii bubu, yo yina yo kele mfunu sambu na Bakristu.—Bakolosai 3:20.

 Bana—baleke mpi bambuta—ke pesaka bibuti na bo lukumu ntangu bo ke zitisaka mpi ke lemfukilaka bo. (Levi 19:3; Bingana 1:8) Ata kana bana me kuma bambuta mpi na nima bo me sala mabuta na bo mosi, bo ke landaka kuzola mpi kusadisa bibuti na bo. Mu mbandu, bo ke zikisaka nde bo ke keba bibuti na bo kana bibuti na bo me kuma minunu; bo ke pesaka bo nkutu ata mbongo kana bo kele na mfunu na yo.—Matayo 15:4-6; 1 Timoteo 5:4, 8.

 Beno zaba nde yo vandaka kulomba nde bantu ya Izraele kupesa lukumu na tata na bo mpi na mama na bo; na mutindu yina bo vandaka kundima mukumba ya mfunu ya mama na kati ya dibuta. (Bingana 6:20; 19:26) Bubu yai bana fwete sala mpi mutindu mosi.

 Nsiku ya kupesa lukumu na bibuti ke vandaka ntangu yonso ti bandilu. Yo vandaka kulomba ve nde bantu ya Izraele kuzitisa bibuti na bo, to konso muntu ya nkaka, kana kusala yo ke tendula kukolama na Nzambi. (Kulonga 13:6-8) Mutindu mosi bubu yai, Bakristu ke ‘lemfukilaka Nzambi bonso mfumu na kisika ya kulemfukila bantu.’—Bisalu 5:29.

 Na Nsiku yina Nzambi pesaka dikanda ya Izraele, yandi silaka nde bana yina ke pesa bibuti na bo lukumu ta ‘zinga mingi mpi ta toma’ na insi yina Nzambi pesaka bo. (Kulonga 5:16) Bo zolaka ve kubaka ndola mutindu bo pesaka ndola na bana yina kumaka bambuta mpi zitisaka ve nsiku ya Nzambi, mpi bo kolamaka na bibuti na bo. (Kulonga 21:18-21) Ntangu me sobaka ve minsiku yina pusaka Nzambi na kupesa bansiku yina. (Baefezo 6:1-3) Yo vanda beto kele baleke to bambuta, Ngangi na beto ta sambisa beto. Na kuwakana ti lusilu na yandi, bana yina ke zitisaka yandi mpi bibuti na bo ta vanda ti luzingu ya nda. Ya kieleka, bo kele ti kivuvu ya kuzinga mvula na mvula.—1 Timoteo 4:8; 6:18, 19.

 Beto lenda baka dilongi ya mfunu na kisika yina nsiku ya kele na Kubasika 20:12 kele na kati ya Bansiku Kumi. (Kubasika 20:1-17) Bansiku yina kele na ntwala na yo ke tendula mambu yina bantu ya Izraele fwete sala sambu na Nzambi, mu mbandu kusambila kaka yandi. Bansiku yina kele na nima na yo ke tendula mambu yina bo fwete sala sambu na bampangi na bo, mu mbandu nsiku ya kuvanda ya kwikama na nkento to bakala na yandi mpi nsiku ya kuyiba ve. Yo yina, bantu ke tubaka nde nsiku ya kukumisa “tata na nge ti mama na nge” kele bonso pont ya mbote na kati ya bimvuka zole yina ya bansiku.