Рози дьбежә: «Мьн тʹьме гәләк бәрхԝәдькʹәт бона тьшта у сәва мьн әв ча барәки гьран бу. Ле бь рʹасти һʹәму тьшт ӧса хьраб нибу, чаԝа кӧ мьн тʹьре». Кʹижан рʹезед жь Кʹьтеба Пироз али ԝе кьрьн? Йәк жь ԝана Мәтта 6:34: «Иди бона рʹожа сьбе хәма нәкьн, чьмки рʹожа сьбе ԝе бона хԝә хәма бькә. Хәмед рʹоже бәси ԝе нә». Рʹози дьбежә кӧ гьлийед Иса али ԝе кьрьн хәма нәкә дәрһәԛа ԝе йәке, чь кӧ дькарә сьбе бьԛәԝьмә. Әԝ зедә дькә: «Щәм мьн епʹещә чәтьнайи һәбун, сәрда жи әз хәмгин дьбум дәрһәԛа ԝан дәрәща йед кӧ нәԛәԝьмин».

Кʹӧлфәтәки жи бь наве Йасемин, тʹәхмин дькьр кӧ хәмгинийа ԝе әԝ зәфт кьрьбу. «Чәнд рʹожа әз дьгьрийам, у хәԝ нәдькʹәтә чʹәʹве мьн. Мьн тʹәхмин дькьр кӧ фькьред нәрʹаст, шабуна мьн дьтәмьрандьн». Кʹижан рʹез али ԝе кьр? Әԝ дина хԝә дьдә 1 Пәтрус 5:7: «Һʹәму хәмед хԝә бавежьнә сәр ԝи [Хԝәде], чьмки әԝ бона ԝә хәм дькә». Йасемин дьбежә: «Мьн бәрдәԝам дькьр Йаһоԝарʹа дӧа кьм, у Әԝ щаба дӧайед мьн дьда. Те бежи барәки гьран жь стийе мьн кʹәт. Һәмьки щар-щара фькьред нәрʹаст диса дькʹәвьнә сәре мьн, ле ньһа ида әз заньм чь бькьм».

Кʹӧлфәтәкә щаһьл бь наве Изабелла дьбежә: «Әз дьфькьрьм ԝәки тʹәмбәли бь генетики дәрбази мьн буйә, чьмки баве мьн жи йәки ӧса йә. Мьн хԝә әглә дькьр, кӧ тьштед фәрз нәкьм, ле тʹәне һәвәк һеса бьм у телевизйоне бьньһерʹьм. Әв хәйсәтәкә нәбаш ә, чьмки әв стреса мәрьв зедә дькә у әԝ нькарә баш хәбата хԝә бькә». Принсипа кӧ али ԝе кьрьбу әм дьвиньн 2 Тимотʹейо 2:15-да, йе кӧ дьбежә: «Бькә кӧ тӧ ль Хԝәде хԝәш бейи, пʹаләки ӧса кӧ шәрм нәки». Изабелла дьбежә: «Мьн нәдьхԝәст, кӧ наве Йаһоԝа жь бо хәбата мьн хьраб буйа, чьмки мьн тʹәмбәлийе дькьр». Ле Изабелла карьбу хԝә бьгӧһезә.

Анәгори ԝе, Келси жи дьбежә: «Хәбата мьн һәбу, ле мьн һʹәта сәнийа пашьн дькʹьшанд у паше дькьр. Әз дьгьрйам, хәԝн нәдькʹәтә чʹәʹве мьн у әз бәрхԝәдькʹәтьм. Әв бона мьн нәбаш бу. Келси аликʹари жь Мәтʹәлок 13:16 дит: «Һәр кәсе аԛьл бь заньстийе дькә, ле йе ахмах, ахмахтийе дьдә кʹьфше». Әԝ шьроԝәдькә кӧ чаԝа фькьред ве рʹезе әԝ һин кьрьн: «Баш ә кӧ әм керһати бьн у пешда һʹәму тьшти сафи кьн. Ньһа ль сәр сьфьра мьн дәфтʹәрәк һәйә, кʹижанеда әз кʹьфш дькьм хәбата кӧ гәрәке бькьм. У әв йәк али мьн дькә щабдар бьм у һʹәта сәнийа пашьн хәбата хԝә нәкʹьшиньм».

Кʹӧлфәта бь наве Кирстен дьбежә: «Мере мьн әз тʹәви чар зарʹа һиштьм». Кʹижан принсипа жь Кʹьтеба Пироз али ԝе кьр? Дь Мәтʹәлок 17:17-да әм дьхуньн: «Һәвал һәр тьм һʹәз дькә у бьра дь рʹожа тәнгда хӧйа дьбә». Кирстен хԝә ль щьвате дьгьрт у ль ԝьр аликʹари дьгәрʹийа. Әв йәк чь ԝерʹа ани? Әԝ дьбежә: «Һәвалед мьн һʹәму алийава тʹәви мьн бун! Һьнәка жь ԝана, хԝарьн у кӧлирка бәр дәре мьн дьһиштьн. Се щара, хушк-бьра али мьн у зарʹед мьн кьрьн, кӧ жь маләки дәрбази мала дьн бьн. Әԝана ӧса жи али мьн кьрьн хәбат бьвиньм. Һәвалед мьн тʹьме тʹәви мьн бун».

Зәйнәб, дәрһәԛа кʹижани кӧ жоре һатьбу готьне, жь бо тʹәнебуне дьчәрчьри. Дьлтәнгийа хԝәда, кӧ әԝе һаԛас тьшт ӧнда кьр, әԝ дьбежә: «Мьн тʹьре кӧ жийина мьн нәжийин ә, чьмки гьшк тʹәвайи бәхтәԝарийеда дьжитьн, ле әз тʹәне бум». Рʹезәк кӧ али ԝе кьр жь Зәбур 68:6 бу, кʹидәре кӧ те готьне: «Хԝәде мале дьдә бекәсан». Әԝ дьбежә: «Мьн заньбу ԝәки ве рʹезеда ньһа хут дәрһәԛа маләкә реали найе готьне. Мьн фәʹм кьр кӧ Хԝәде маләкә рʹӧһʹани дьдә мә, демәк щийе бехофийе, кʹидәре кӧ һәләԛәтийа незик дькарьн тʹәви мәрийа һәбьн, у йед кӧ Йаһоԝа һʹьз дькьн. Ле мьн фәʹм дькьр кӧ әзе нькарьбьм незики мәрийа бьм, һәрге незики Йаһоԝа набьм. Зәбура 37:4 гәләк али мьн кьр. Ль вьр ӧса ньвисар ә: ‹Бьра Хӧдан шабуна тә бә, Әԝе хԝәстьнед дьле тә бьдә тә›».

Зәйнәб тʹәмам дькә: «Мьн тедәрхьст кӧ әз гәрәке ԛәԝи хԝә ль Йаһоԝа бьгьрьм. Әԝ Достәки лапи баш ә». Паше, мьн хԝәрʹа кʹьфш кьр һьнә шьхӧла, кʹижан кӧ әз дькарьбум тʹәви йед дьнена бь шабун бькьм, тʹәви ԝан текли бьм чьмки әԝана жи Йаһоԝа һʹьз дькьн. Әз һин бум тьштед баш нав мәрийада бьвиньм у шашийед ԝан гәләк һьлнәдьм бәр дьле хԝә, ле фәʹм бькьм кӧ әԝана жи гӧнәкʹар ьн.

Һәмьки, һәвалед мә кӧ Хԝәдерʹа хьзмәт дькьн, әԝана жи гӧнәкʹар ьн. Шәʹдед Йаһоԝа ԝәк һʹәму мәрийа, рʹасти щурʹә-щурʹә чәтьнайа тен. Ле һинбуна Кʹьтеба Пироз мәрийа һелан дькә али йед дьнена бькьн. Ԝе баш бә һәрге әм һәвален ӧса хԝәрʹа бьгәрʹьн. Принсипед Кʹьтеба Пироз дькарьн проблемен даһа чәтьнда жи али мә бькьн, мәсәлә нәхԝәшийед кӧ найенә ԛәнщкьрьне у ӧндакьрьна мәрьвед незик.