ԜӘʹДЕ бәре, ԝәкʹил щабдар бу бона мал йан жи һәбука мәрьве дьн. Хәбәра Ибрани у Йунани кӧ һатә ԝәлгәрʹандьне ча «ԝәкʹил», щара те һʹәсабе сәркʹар йан жи щабдар бона шьхӧлед мале.

Чахе кӧрʹе Аԛуб Усьв Мьсьреда хӧлам бу, әԝ бьбу ԝәкʹиле мала ахайе хԝә. Әԝ ахайе ԝийи Мьсьри, «чи ԝи һәбу һʹәму дәсте Усьвда һьшт» (Дәстп. 39:2-6). Паше, чахе Усьв Мьсьреда хԝәха бу сәрԝере мәзьн, әԝи бона мала хԝә ԝәкʹиләк кʹьфш кьр (Дәстп. 44:4).

Ԝәʹде Исада, хԝәйед әʹрда гәләк щар шәһәрада жь кʹарханед хԝә дәр дьжитьн. Ләма жи хԝәйед әʹрда ԝәкʹил кʹьфш дькьрьн, сәва сәр әʹрдед ԝан бәрпьрсийартийе бькьн сәр хәбате у хәбатчийа.

Ле мәрьвед чь щурʹәйи дьһатьнә кʹьфшкьрьне кӧ бьбьнә ԝәкʹил? Ньвискʹаре Рʹомайи йе ԛьрʹна йәке бь наве Колумелла, дьгот ԝәки хӧлам йе кӧ ча бәрпьрсийар, демәк ча ԝәкʹил дьһатә кʹьфшкьрьне, гәрәке «ԝи шьхӧлида рʹьнд һинкьри у щерʹьбанди бә». Әԝ гәрәке мәрьвәки ӧса буйа, «кӧ һʹӧкӧме хԝә ӧса бьда хәбате, ԝәки нә бетʹалаш бә у нә жи берʹәʹм бә һьндава хәбатчийа». Әԝи ньвискʹари гьлийед хԝә бәрдәԝам кьр гот: «Йа лапә фәрз бона ԝәкʹил әԝ ә, кӧ әԝ гәрәке нәфькьрә, ԝәки һәр тьшти занә, у гәрәке бьхԝазә тʹьме тьштед тʹәзә һин бә».

Хәбәра Хԝәдеда мәсәла ԝәкʹил те хәбьтандьне, чахе те готьне дәрһәԛа шьхӧлед кӧ щьватед Мәсиһитида тенә кьрьне. Мәсәлә, Пәтрусе шанди Мәсиһи һелан дькьрьн, ԝәки пе фәрәсәтед кӧ Хԝәде дайә ԝан, «һәврʹа хьзмәткʹарийе бькьн, чаԝа ԝәкʹилед ԛәнщә ԝан кʹәрәмед Хԝәде» (1 Пәт. 4:10).

Иса жи мәтʹәлокеда мәсәла дәрһәԛа ԝәкʹил да хәбате, кӧ Луԛа 16:1-8-да ньвисар ә. Ӧса жи пʹехәмбәртийеда дәрһәԛа нишана һатьна Пʹадша, Иса шагьртед хԝәрʹа соз да, ԝәки ԝе «хӧламе амьн у сәрԝахт», йане «ԝәкʹилхәрще амьн», кʹьфш кә. Шьхӧле сәрәкә йе ԝи ԝәкʹили әԝ бу, кӧ ԝәʹде хьлазийа дьнйайе ԝәʹдәда хԝарьна рʹӧһʹани бьдә шагьртед Иса (Мәт. 24:45-47; Луԛа 12:42). Әм гәләк дьшекьриньн, ԝәки дьстиньн ԝан әʹдәбийәта, кʹижан кӧ ԝәкʹиле амьн һазьр дькә сәва баԝәрийа мә бьшьдинә у ӧса дькә кӧ сәр тʹәмамийа дьнйайе мәрьв дькарьн бьстиньн.