Әм дькарьн бона һәвале хԝә бәрхԝә кʹәвьн, йе кӧ жь бо нәхԝәшийа емосийали дьчәрчьрә. Ле әм хәмкьрьна хԝә бь ԝе йәке ԝирʹа гәрәке нишан кьн, кӧ али ԝи бькьн ԝәки әԝ бькарьбә бәр нәхԝәшийа хԝә тәйах кә. Гәло чь щурʹәйи?

«Бьһистьнеда сәрхԝә бә» (АԚУБ 1:19).

Гавәкә лапә фәрз кӧ али һәвале хԝә бьки әԝ ә, кӧ гӧһ бьди ԝи. Ле әԝ йәк найе һʹәсабе, кӧ һәр готьна ԝи тӧ әʹсәйи гәрәке һьлди һʹәсаб. Ԝирʹа бьдә кʹьфше кӧ тӧ һазьр и гӧһ бьди ԝи у бона ԝи хәм бьки. Сәрԝахт бә у ләз нәкʹәвә кӧ ԝи сущдар ки. Бир нәкә кӧ һәвале тә дькарә тьштед ӧса бежә жь бо чь жи паше пʹошман бә (Ибо 6:2, 3).

«Дьл бьдьнә» (1 ТʹЕСАЛОНИКИ 5:14).

Дьԛәԝьмә һәвале тә бәрхԝә дькʹәвә йан жи дьфькьрә, кӧ әԝ кери тʹӧ тьшти найе. Пе кьред хԝә нишан кә кӧ тӧ бона ԝи хәм дьки, һәла һе ԝи чахи жи гава тӧ ньзани чь бежи.

«Һәвал һәр гав һʹьз дькә» (МӘТʹӘЛОК 17:17).

Ԝирʹа бьдә кʹьфше кӧ тӧ һазьр и али ԝи бьки. Дәԝса кӧ хԝәха сафи ки чьда али ԝи бьки, ԝе баш бә жь ԝи бьпьрси. Һәрге һәвале тәрʹа чәтьн ә дәрһәԛа хԝәстьна хԝә бежә, бьфькьрә чь һун дькарьн тʹәвайи бькьн. Мәсәлә, бежә ԝи кӧ һун дькарьн  тʹәвайи бьгәрʹьн, һәрʹьнә дькʹана кʹьнща, тʹәвайи мале бьдьнә һәв, йан жи тьштәки дьн бькьн (Галати 6:2).

«Сәбьра ԝә һәбә» (1 ТʹЕСАЛОНИКИ 5:14).

Дьԛәԝьмә һәвале тә ԝе тʹьме һазьр нибә дьле хԝә тәрʹа вәкә. Ԝе баш бә ԝи бьди баԝәркьрьне, кӧ те бь шабуне гӧһ бьди ԝи гава әԝ бьхԝазә дьле хԝә тәрʹа вәкә. Жь бо нәхԝәшийа хԝә һәвале тә дькарә тьштәки ӧса бькә йан бежә, жь бо чь жи дьле тә ԝе бешә. Дьбәкә әԝ жь бо тьштәки әʹщьз бә йан жи нәхԝазә рʹасти тә бе. Чахе бьхԝази тьштәкида али ԝи бьки, бь сәбьр бә у фәʹмкʹарийе бьдә кʹьфше (Мәтʹәлок 18:24).

«Әз баԝәр ьм ԝәки әз һәваләкә ӧса мә, кӧ һәвала мьн дькарә итʹбарийа хԝә мьн бинә. Рʹаст ә әз ньзаньм чаԝа проблема ԝе сафи кьм, ле әз һәр тьшти дькьм кӧ бь дьл гӧһ бьдьмә ԝе йәке, чь кӧ әԝ дьхԝазә бежә. Щарна әԝ дьхԝазә кӧ тʹәне гӧһ бьдьнә ԝе, ԝәки әԝ бькарьбә хԝә баш тʹәхмин кә»—Фера, a һәвала кʹижане жь бо нәхԝәшийа бәрхԝәкʹәтьне у депресийайе, нькарә хԝарьне бьхԝә.

«Һәваләкә мьн һәйә, йа кӧ гәләк һʹәйф у позитив ә. Щарәке әԝе әз тʹәглифи мала хԝә кьрьм сәр нан-хԝарьне. Дәрәща ӧса дьлгәрмда, мьнрʹа һеса бу дьле хԝә жерʹа вәкьм. Әве йәке гәләк әз һелан кьрьм!»—Һаун, йа кӧ жь депресийайе дьчәрчьрә.

«Сәбьркьрьн гәләк фәрз ә. Чахе кʹӧлфәта мьн тьштәкә ӧса дькә, жь бо чь әз хәмгин дьбьм, әз тиньм бира хԝә кӧ әԝ йәк жь бо депресийа ԝейә, нә кӧ әԝ хәйсәте ԝейә. Әԝ йәк али мьн дькә һерс нәкʹәвьм у һьндава ԝе фәʹмкʹарийе бьдьмә кʹьфше»—Аԛуб, жьна кʹижани жь депресийайе дьчәрчьрә.

«Кʹӧлфәта мьн гәләк пьштгьрийа мьн дькә у бәр дьле мьнда те. Чахе әз бь зедәйи бәрхԝә дькʹәвьм, әԝ тʹӧ щар зоре мьн накә ԝан тьшта бькьм, чь кӧ әз нахԝазьм бькьм. Әв йәк те һʹәсабе кӧ щарна әԝ нькарә ԝан тьшта бькә, чь кӧ һʹьз дькә бькә. Әԝ рʹӧһʹе хԝәԛӧрбанкьрьне дьдә кʹьфше у гәләк мәрʹд ә. Әԝ йәк бона мьн гәләк ԛимәт ә»—Енрико, йе кӧ жь бәрхԝәкʹәтьне дьчәрчьрә.