Гәло бефәʹмти йә һәрге мәрьв баԝәр кә кӧ мьри ԝе диса бьжин? Паԝлосе шанди ӧса нәдьфькьри. Әԝи бь рʹебәрийа Хԝәде ньвиси: «Һәгәр тʹәне әм бона ве жийине гӧмана хԝә Мәсиһ тиньн, кӧ ӧса йә әм жь һʹәму мәрьва мәʹрьмтьр ьн. Ле рʹаст Мәсиһ жь мьрьне рʹабуйә, чаԝа бәре дәрәмәта пешьн жь нава мьрийа рʹабуйи» (1 Корьнтʹи 15:19, 20). Паԝлос рʹабуна мьрийада дӧдьли нәдьбу. Чьмки рʹабуна Иса жь мьрьне, бона ԝи избаткьрьн бу a (Бьньһерʹә спартьн.) (Кʹаред Шандийа 17:31). Ләма Паԝлос Иса нав кьр ча «бәре пешьн», демәк Иса йе пешьн бу, кӧ жь мьрьне рʹабу бона жийина һʹәта-һʹәтайе. Ԝәки Иса йе пешьн бу, демәк бь логики йә кӧ диса йед дьн жи һәнә.

Диса мәʹникә дьн һәйә, кӧ чьрʹа әм дькарьн баԝәр бьн кӧ мьри ԝе рʹабьн. Йаһоԝа Хԝәдайе рʹастийе йә. Әԝ «Хԝәдейе хԝәйе готьна хԝә» йә (Тито 1:2). Йаһоԝа тʹӧ щар дәрәԝ нәкьрийә у нә жи ԝе бькә. Һәрге әԝ соз дьдә кӧ мьри ԝе рʹабьн, һьн жи әʹйан дькә кӧ әԝ дькарә әԝе йәке бькә, гәло әԝ ԝе хԝәйе созе хԝә нибә? Фәʹмдари йә әԝ ԝе хԝәйе созе хԝә бә.

Хԝәде чьрʹа дьхԝазә кӧ ахьрийеда мьри жь мьрьне рʹабьн? Әԝ йәк жь һʹьзкьрьна ԝи йә. Ибо гот: «Һәгәр мәрьв бьмьрә, гәло дькарә диса бьжи? . . . Те гази мьн бьки, әзе жи щаба тә бьдьм. Те бира әʹфьрандьнед дәстед хԝә бьки» (Ибо 14:14, 15, ДТʹ). Ибо баԝәр бу кӧ Баве ԝийи әʹзмана, ԝе гәләк бьхԝазә кӧ ԝи жь мьрьне рʹакә. Гәло Хԝәде һатийә гӧһастьне? Әԝ дьбежә: «Әз Йаһоԝа мә, әз найем гӧһастьн» (Малахи 3:6, ДТʹ). Һʹәта ньһа жи хԝәстьна Хԝәде зәʹф һәйә, кӧ мәрьва сьһʹәт-ԛәԝат у бәхтәԝар вәгәрʹинә жийине. Әԝ йәк мина хԝәстьна де-баве һʹьзкьри йә чахе зарʹа ԝан дьмьрә. Ле фьрԛи ԝе йәкеда нә, кӧ  ԛәԝата де-бав тʹӧнә, ле ԛәԝата Хԝәде һәйә ԝәки хԝәстьна хԝә бинә сери (Зәбур 135:6).

Йаһоԝа ԝе ԛәԝате бьдә Кӧрʹе хԝә, сәва кӧ шабунәкә беһʹәсаб бьдә ԝан мәрьва, йед кӧ мәрьвед хԝәйи незик ӧнда кьрьнә. Ле гәло Иса ча дьфькьрә дәрһәԛа рʹакьрьна мьрийа? Пешийа кӧ Лазар жь мьрьне рʹакьра, Иса дит кӧ чаԝа хушк у һәвалед Лазар бәрхԝәдькʹәтьн, у Иса хԝә нәгьрт у «гьрийа» (Йуһʹәнна 11:35). Ӧса жи, чахе Иса рʹасти жьнәбикә жь Найне һат, кʹижане кӧ кӧрʹе хԝәйи тайе тʹәне ӧнда кьрьбу, «гӧне ԝи ле һат у ԝерʹа гот: ‹Нәгьри›». У Иса дәрберʹа әԝ гәдә ԝәгәрʹандә жийине (Луԛа 7:13). Демәк әм дьвиньн кӧ Иса чаԝа дьньһерʹә сәр дәрда у мьрьне. Иса ԝе чьԛас ша бә, чахе әԝ ль сәр тʹәмамийа дьнйайе кʹәсәре бьгӧһезә сәр шабунәкә мәзьн!

Тә ԛә дәрде мьрьне дитйә? Дьбәк тӧ дьфькьри кӧ чʹарә мьрьне набә. Ле чʹарә һәйә. Хԝәде ԝе бь Кӧрʹе хԝә мьрийа рʹакә. Бира хԝәда хԝәй кә, Хԝәде дьхԝазә кӧ тӧ әве чʹарәйе бьвини. Әԝ дьхԝазә кӧ тӧ мәрьвед хԝәйи дәлал диса һʹәмез ки. Бьдә бәр чʹәʹве хԝә кӧ һуне һʹәта-һʹәтайе тʹәвайи бьжин, у тʹӧ щар мьрьне ида ԝә һәв нәԛәтинә!

Лионел, дәрһәԛа кʹижани тʹема дьнда һатә готьне дьбежә: «Ахьрийе, әз пеһʹәсийам дәрһәԛа рʹабуна мьрийа. Щара пешьн чахе мьн бьһист, мьнрʹа чәтьн бу баԝәр кьм, у мьн нә жи баԝәрийа хԝә ԝи мәрьви ани, кʹижани кӧ мьнрʹа дәрһәԛа ԝе йәке гот. Ле мьн Кʹьтеба Пирозда леколин кьр у дит кӧ әԝ рʹасти йә! Әз ӧса һивийе мә кальке хԝә диса бьвиньм, кӧ анщах тәйах дькьм».

Тӧ дьхԝази дәрһәԛа ве тʹемайе һе зедә пебьһʹәси? Шәʹдед Йаһоԝа ԝе бь шабун, пе Кʹьтеба тәйә Пироз тәрʹа шьровәкьн, кӧ чьрʹа әԝана баԝәр дькьн ԝәки ахьрийеда мьри ԝе рʹабьн. b