Йуһʹәннайе Ньхӧмдар пʹехәмбәре Хԝәде бу (Луԛа 1:76). Әԝ һатә буйине незики хьлазийа ԛьрʹна йәке Б.Д.М. у ԛьрʹна йәкеда Д.М.-да дьжит. Хԝәде тʹәми да ԝи, ԝәки рʹе һазьр кә бона Мәсиһ. Йуһʹәнна әв тʹәми ани сери у Ибранийарʹа мьзгинийа Хԝәде гьли дькьр, сәва кӧ ԝана пашда вәгәрʹинә щәм Хԝәде (Марԛос 1:1-4; Луԛа 1:13, 16, 17).

 Әʹламәтийа Йуһʹәнна али гәләк мәрьвед дьлсах кьрийә, ԝәки Исайе жь Ньсрәте ча Мәсиһе создайи ԛәбул кьн (Мәтта 11:10). Йуһʹәнна гӧһдарванед хԝә һелан дькьр, ԝәки гӧнед хԝә биньн рʹуйе хԝә у бенә ньхӧмандьне, чь кӧ ԝе нишан кьра ԝәки әԝана бь рʹасти тʹобә кьрьнә (Луԛа 3:3-6). Йуһʹәнна һатә навкьрьне Ньхӧмдар, чьмки әԝи гәләк мәрьв ньхӧмандьн. Ньхӧмандьна һәрә фәрз, кʹижан кӧ Йуһʹәнна ани сери, ньхӧмандьна Иса бу a (Марԛос 1:9).

Ве готареда

•  Йуһʹәннайе Ньхӧмдар жь пʹехәмбәред дьн чьда щӧдә дьбу?

•  Де-баве Йуһʹәннайе Ньхӧмдар кʹи бун?

•  Чь щурʹәйи Йуһʹәннайе Ньхӧмдар мьр?

•  Йуһʹәннайе Ньхӧмдар Исарʹа дькʹәтә ләще?

•  Кʹьтеба Пирозда дәрһәԛа чьԛас мәрьвед бь наве Йуһʹәнна те готьне?

 Дәрһәԛа шьхӧле ԝи һатьбу пʹехәмбәртикьрьне: Йуһʹәнна бь шьхӧле бәлакьрьна мьзгинийе, пʹехәмбәртийа дәрһәԛа ԛасьде Йаһоԝа ани сери (Малахи 3:1; Мәтта 3:1-3). Йуһʹәнна «щьмәʹтәке бона Хӧдан» һазьр кьр. Демәк әԝи рʹе бона Щьһуйа вәкьр, сәва кӧ әԝана мьзгинийа ԝәкʹиле Йаһоԝайи сәрәкә, Иса Мәсиһ, ԛәбул кьн (Луԛа 1:17).

 Шьхӧле Йуһʹәнна чь ахьри ани: Иса гот, ԝәки «тʹӧ кʹәс жь Йуһʹәннайе ньхӧмдар мәстьр нәбуйә. Ле Пʹадшатийа Әʹзманада йе һәри бьчʹук жь ԝи мәстьр ә» (Мәтта 11:11). Йуһʹәнна нә кӧ тʹәне пʹехәмбәр бу, ле ӧса жи «ԛасьде» создайи, ләма жи жь пʹехәмбәред Хԝәдейи пешийа ԝи, тʹӧ кәс нькарьбу жь ԝи «мәстьр» бьһата һʹәсабе. Жь гьлийе Иса те кʹьфше, ԝәки Йуһʹәнна ԝе Пʹадшатийа Хԝәдеда сәрԝертийе нәкә. b Әԝ пʹехәмбәре амьн мьр пешийа кӧ Иса рʹе вәкьра бона жийина ль әʹзмен (Ибрани 10:19, 20). Ле Йуһʹәнна ԝе бьбә бьнәлийе Пʹадшатийа Хԝәде, у ԝе мәщала ԝи һәбә кӧ Щьнәтеда сәр әʹрде һʹәта-һʹәтайе бьжи (Зәбур 37:29; Луԛа 23:43).

 Де-баве Йуһʹәнна Зәкәрйа у Елизабет бун. Зәкәрйа кʹаһине Щьһу бу. Йуһʹәнна бь кʹәрәмәти һатә буйине, чьмки дийа ԝи, Елизабете зарʹ нәданин. Хенщи ԝе йәке әԝ у Зәкәрийа ида әʹмьрда мәзьн бун (Луԛа 1:5-7, 13).

 Һеродәс Антипас Пʹадша әʹмьр кьр, ԝәки сәре Йуһʹәнна жекьн. Һеродәс кʹәтә бәр байе жьна хԝә Һеродийайе, ләма жи әв йәк кьр. Әԝе Йуһʹәнна нәфрʹәт дькьр, чьмки әԝи дьготә Һеродәс, кʹижан кӧ нивида Щьһу бу, ԝәки зәԝаща ԝи тʹәви Һеродийайе нә ль гора ԛануна Щьһуйа бу (Мәтта 14:1-12; Марԛос 6:16-19).

 Кʹьтеба Пирозда тʹӧ щийа найе готьне, ԝәки Йуһʹәнна Исарʹа дькʹәтә ләще (Йуһʹәнна 3:25-30). Ле дәԝсе Йуһʹәнна әшкәрә дьгот кӧ нета ԝи әԝ ә, ԝәки рʹе һазьр кә бона Мәсиһ, нә кӧ ԝирʹа бькʹәвә ләще. Йуһʹәнна дәрһәԛа Иса ӧса гот: «Әз һатьмә бь аве дьньхӧминьм, ԝәки ԝи Исраелева бьдьмә әʹйанкьрьне». Паше әԝи зедә кьр: «Әв ә Кӧрʹе Хԝәде» (Йуһʹәнна 1:26-34). Йуһʹәнна гәләк ша дьбу кӧ хьзмәткьрьна Иса пешда дьчу.