လံာ်စီဆှံမၤစၢၤပှၤသ့. ခဲအံၤန့ၣ်​ ပကကွၢ်သကိး လံာ်စီဆှံအတၢ်ဟ့ၣ်ကူၣ်တနီၤ လၢအမၤစၢၤဘၣ်ဝဲ ပှၤလၢအကကွဲၢ်တဖၣ်​ ဒ်သိးအဟံၣ်ဖိဃီဖိ ကအိၣ်ဒီးတၢ်သးခု.

1.  ၁. ဖျီနသး ဒ်ပဒိၣ်တၢ်သိၣ်တၢ်သီ အိၣ်ဝဲအသိး. ပှၤတဂၤ မ့ၢ်ဖျီအသး ဒ်ပဒိၣ်တၢ်သိၣ်တၢ်သီ အိၣ်ဝဲအသိးန့ၣ်​ ကကဲထီၣ်​ တၢ်မၤစၢၤလၢ အဟံၣ်ဖိဃီဖိ ကအိၣ်ဒီးတၢ်သးခု.—မးသဲ ၁၉:၄-၆.

2.  ၂. ပာ်ဖျါထီၣ်တၢ်အဲၣ်ဒီး တၢ်ပာ်ကဲ. ရ့ဒီးနသးသမူတံၤသကိးဂ့ၤဂ့ၤ ဒ်နအဲၣ်ဒိးလၢ အဝဲကရ့ဒီးနၤအသိး. နမ့ၢ်မၤဒ်န့ၣ်န့ၣ်​ နပာ်ဖျါထီၣ်လၢ နအဲၣ်အီၤ ဒီးနပာ်ကဲအီၤ.—မးသဲ ၇:၁၂; အ့းဖ့းစူး ၅:၂၅, ၃၃.

3.  ၃. တဘၣ်တဲတၢ်ကတိၤလၢ အမၤဘၣ်ဒိပှၤသးတဂ့ၤ. နသးသမူတံၤသကိး မ့ၢ်တဲဆါဘၣ်နၤ မ့တမ့ၢ် မ့ၢ်မၤဘၣ်ဒိနသးန့ၣ်​ ဆဲးတဲတၢ်ဒီးအီၤလၢ တၢ်အဲၣ်တၢ်ကွံအပူၤ. (အ့းဖ့းစူး ၄:၃၁, ၃၂) ဖဲ ကတိၤဒိ ၁၅:၁ န့ၣ်တဲဝဲလၢ “ပှၤစံးဆၢတၢ် မုာ်မုာ်န့ၣ်​ မၤခုၣ်လီၤ တၢ်သးဒိၣ်လီၤ. မ့မ့ၢ် တၢ်ကတိၤလၢ အဆူၣ်အကိၤန့ၣ်​ ထိၣ်ဟူးထိၣ်ဂဲၤထီၣ်​ တၢ်သးထီၣ်လီၤ.”

4.  ၄. တဂၤဒီးတဂၤ ကဘၣ်သးတီလိာ်သး. ပာ်ဖျါထီၣ်တၢ်အဲၣ်​ ထဲလၢနသးသမူတံၤသကိးအဖီခိၣ်​ ဒီးမံဃုာ်ထဲလၢ နသးသမူတံၤသကိး. (မးသဲ ၅:၂၈) လံာ်စီဆှံတဲဝဲလၢ “မ်တၢ်ဆီဟံၣ်ဆီဃီ ကမ့ၢ်တၢ်လၢ အအိၣ်ဒီးအလၤကပီၤ လၢပှၤခဲလၢာ် အမဲာ်ညါတက့ၢ်. ဒီးနီၢ်ဒီမါဝၤအလီၢ်မံန့ၣ်​ မ်အသုတဘၣ်အၢတဂ့ၤ.”—ဧ့ၤဘြံၤ ၁၃:၄.

5.  ၅. သိၣ်က့ၤသီက့ၤနဖိလၢ တၢ်အဲၣ်တၢ်ကွံအပူၤ. တဘၣ်လူၤဘၣ်​ နဖိအသးအါတလၢတဂ့ၤ. ဒီးတဘၣ်သိၣ်က့ၤသီက့ၤအဝဲသ့ၣ်​ ဆူၣ်ဆူၣ်တဂ့ၤ.—ကတိၤဒိ ၂၉:၁၅; ကလီးစဲ ၃:၂၁.