DILONGI 30
Bantu yina nge vuandaka zola lenda zinga diaka!
Lufua kepesaka kiadi mingi. Yau yina Biblia kebokidilaka lufua mbeni. (1 Bakorinto 15:26) Na Dilongi 27, beto longukaka ti Yehova kenunga mbeni yango. Kasi, yinki yandi kesala samu na bantu yina mekufuaka? Na dilongi yayi, beto kemona mambu mingi metadila nsilulu ya kitoko ya Yehova—yandi kevutusa na luzingu bamilion ya bantu yina mekufuaka samu bazinga mvula na mvula na kiese. Yandi kefutumuna bau! Yau kesalama mpenza? Bakefutumuka samu na kuzinga na dizulu to na ntoto?
1. Yinki Yehova kele na nsatu ya kusala samu na bantu yina beto vuandaka zola mekufuaka?
Yehova kele na nsatu ya kuvutula na luzingu bantu ya kufua. Muntu ya kiminu na nkumbu ya Yobi vuandaka ndima ti Nzambi kezimbakana yandi ve ntangu yandi kekufua. Yandi tubaka na Nzambi: ‘Nge kebokila, mpe munu kendima [na kati ya maziamu].’—Tanga Yobi 14:13-15.
2. Yinki mutindu beto mezaba ti bantu ya kufua lenda futumuka?
Ntangu Yesu vuandaka na ntoto, Nzambi pesaka yandi kilendo ya kufutumuna bantu. Yesu futumunaka muana mosi ya nketo ya bamvula 12 mpe muana mosi kaka ya bakala ya nketo yina mefuilaka bakala. (Marko 5:41, 42; Luka 7:12-15) Na manima, nkundi ya Yesu, Lazare kufuaka. Atako Lazare kufuaka mpe yasalaka bilumbu yiya banda bazikaka yandi, Yesu vutulaka yandi na luzingu. Na manima ya kusala kisambu na Nzambi mpe yandi tubaka: ‘Lazare, bima!’ Mpe ‘muntu yina kufuaka bimaka’—yandi mevutuka na luzingu! (Yoane 11:43, 44) Kanisa kiese yina dibuta mpe bankundi ya Lazare vuandaka na yau!
3. Yinki kivuvu beto kele na yau samu na bantu yina beto vuandaka zola mekufuaka?
Biblia mepesa nsilulu: ‘Bantu ya lunungu na bantu ya kukondua lunungu kefutumuka.’ (Bisalu 24:15) Bantu yina Yesu futumunaka na ntama kuendaka na dizulu ve. (Yoane 3:13) Basepelaka kuvutuka na luzingu awa na ntoto. Mutindu mosi, Yesu kefutumuna ntama mingi ve bamilion ya bantu samu basepela na luzingu na paradiso awa na ntoto. Yandi tubaka ti ‘bantu nionso yina kele na maziamu ya makanisi—ata bantu yina kena kumonana ti bamezimbakanaka bau, kasi bakele na makanisi ya Nzambi—yandi kefutumuna bau.—Yoane 5:28, 29.
KOTA NA MPINDA
Tadila mambu yina kele na Biblia yina memonisa ti bantu ya kufua lenda futumuka. Mpe longuka mutindu mfutumukunu lenda bomba mpe kupesa kivuvu.
4. Yesu monisaka ti yandi vuandaka na kilendo ya kufutumuna bantu ya kufua
Tadila mbotembote yina Yesu salaka samu na nkundi na yandi Lazare. Tanga Yoane 11:14, 38-44, mpe na manima tadila biuvu yayi:
-
Yinki mutindu beto mezabila ti Lazare kufuaka mpenza?—Tala verse 39.
-
Kana Lazare kuendaka na dizulu, nge mekanisa ti Yesu zolaka vutula yandi samu na kuzinga awa na ntoto?
5. Bantu mingi kefutumuka!
Tanga Nkunga 37:29, mpe na manima tadila kiuvu yayi:
-
Wapi kisika bamilion ya bantu yina kefutumuka kevuanda?
Yesu kefutumuna bantu mingi, ata bayina vuandaka sambila Yehova ve. Tanga Bisalu 24:15, mpe na manima tadila kiuvu yayi:
-
Nani nge kesepela kumona na mfutumukunu?
Kanisa diambu yayi: Yesu lenda futumuna muntu na pete nionso, mutindu kaka tata mosi lenda lamusa muana na yandi yina kele ya kuleka
6. Mfutumukunu lenda bomba nge mpe kupesa nge kivuvu
Disolo ya muana ya Yairusi ya nketo yina futumukaka, bombaka bantu yina vuandaka na kiadi. Tanga disolo yango ya kedika na Luka 8:40-42, 49-56.
Tekila yandi futumuna muana ya Yairusi, Yesu tubaka na tata ya muana yango: ‘Kubanga ve, vuanda kaka na kiminu.’ (Tala verse 50.) Yinki mutindu kivuvu ya mfutumukunu lenda sadisa nge . . .
-
Ntangu muntu yina nge kezolaka mingi mekufua?
-
Ntangu luzingu kele na kivonza?
Tula VIDEO, mpe na manima tadila kiuvu yayi melanda.
-
Yinki mutindu kivuvu ya mfutumukunu bombaka mpe pesaka ngolo na bibuti ya Phelicity?
BANTU YANKAKA METUBA: “Disolo ya mfutumukunu kele diambu ya kedika ve.”
-
Yinki nge mekanisa?
-
Yinki verse nge lenda sadila samu na kumonisa ti mfutumukunu kele diambu ya kedika?
BUNKUFI
Biblia mepesa nsilulu ti bamiliare ya bantu yina mekufuaka bakefutumuka. Yehova zola bazinga diaka, mpe yandi mepesa Yesu kilendo ya kufutumuna bantu.
Mvutukulu
-
Yinki mutindu Yehova mpe Yesu ketadilaka diambu ya kuvutula bantu ya kufua na luzingu?
-
Wapi kisika bamilion ya bantu yina kefutumuka kevuanda —na dizulu to na ntoto? Samu na yinki nge metuba plina?
-
Yinki kena kundimisa nge ti bantu yina nge vuandaka zola kezinga diaka?
SOSA
Longuka mambu yina nge lenda sala samu na kununga kiadi.
“Okoki kolonga mpasi ya kobungisa moto na liwa” (Lamuká! No. 3 2018)
Bansikudukusu ya Biblia lenda sadisa mpenza muntu yina kele na kiadi?
Yinki mutindu bana lenda baka lusadusu na manima ya lufua ya muntu mosi yina bavuandaka zola?
Yakele na muntu mosi yina mefutumukaka samu na kukuenda na dizulu? Nani kefutumuka ve?
