DILONGI 52
Samu na yinki mvuatulu mpe mutindu na beto ya kubongisa nzutu kele mfunu?
Beto nionso beto kesepelaka kupona bilele na beto mpe mutindu ya kusala munzele na beto. Kana beto mesadila ndambu ya bansikudukusu ya Biblia na diambu metadila mvuatulu, beto lenda suka kaka ve na kupona mvuatulu yina beto zola kasi mpe yina kesepedisa Yehova. Beto tadila ndambu ya bansikudukusu yango.
1. Yinki bansikudukusu fueti tuadisa bansodolo na beto na diambu metadila mvuatulu mpe mutindu na beto ya kubongisa nzutu?
Beto fueti pona ‘bilele yina mebonga, kondua kulutisa ndilu mpe [beto] vuanda na mabanza ya mbote,’ mpe kutatamana kumonika ya kuvedila na meso ya bantu yankaka samu yamonisa ti beto ‘[me]kangamaka na Nzambi.’ (1 Timoteo 2:9, 10) Beto tadila bansikudukusu yiya: (1) Mvuatulu na beto fueti vuanda ya ‘kubonga.’ Mutindu kaka nge kemonaka yau na balukutakanu ya kimvuka, bisadi ya Yehova kevuataka mutindu mosi ve, kasi mvuatulu mpe mutindu na beto ya kubongisa nsuki kemonisaka luzitu na beto samu na Nzambi yina beto kesambilaka. (2) Kuvuata ‘kondua kulutisa ndilu’ zola monisa ti mutindu na beto ya kuvuata na ntuala ya bantu fueti lamusa ve bansatu ya kusangisa nzutu, to yabenda dikebi ya bantu nionso na beto. (3) Beto kemonisaka ‘mabanza ya mbote’ ntangu beto kendimaka ve mutindu nionso ya mvuatulu to ya kubongisa nzutu ya bilumbu yayi. (4) Mutindu na beto ya kumonana na meso ya bantu fueti monisa ntangu nionso ti beto ‘[me]kangama na Nzambi,’ mpe yamonisa na bantu yankaka ti beto kesambilaka Nzambi ya kedika.—1 Bakorinto 10:31.
2. Yinki mutindu mvuatulu mpe mutindu na beto ya kubongisa nzutu lenda vuanda na bupusi na bampangi na beto Baklisto?
Atako beto kele na kimpuanza ya kupona bilele yina beto kevuata, beto fueti kanisa bupusi yina mvuatulu na beto kevuanda na yau na bantu yankaka. Na kisika ya kubudisa muntu dibaku, beto kesalaka ngolo na ‘kupesa mpangi na [beto] kiese samu na mambote na yandi mpe samu na kupesa yandi ngolo.’—Tanga Baroma 15:1, 2.
3. Yinki mutindu mvuatulu na beto lenda benda bantu yankaka na sambudulu ya kedika?
Ntangu beto kena kusala ngolo samu na kuvuata mbote na konso diluaku, beto ketula diaka dikebi mingi kuluta na mvuatulu na beto ntangu beto kekuendaka na balukutakanu na kimvuka mpe na kisalu ya kusamuna. Beto kezolaka ve bantu tula dikebi na bau na mvuatulu na beto na kisika ya kutula dikebi na nsangu ya mfunu yina beto kena tubila bau. Mutindu na beto ya kubongisa nzutu lenda benda bantu yankaka na kedika mpe ‘bakumisa malongi ya Mvuluzi na beto.’—Tito 2:10.
KOTA NA MPINDA
Tadila yinki mutindu mvuatulu na beto mpe mutindu na beto ya kubongisa nzutu lenda sadisa bantu babakusa ti beto kele Baklisto.
Mvuatulu mpe mutindu na beto ya kubongisa nzutu lenda monisa kana beto kezitisaka bamfumu. Atako Yehova kemonaka yina kele na ntima, kasi mvuatulu mpe mutindu na beto ya kubongisa nzutu fueti monisa luzitu samu na yandi
4. Mvuatulu mpe mutindu na beto ya kubongisa nzutu kemonisaka luzitu samu na Yehova
Yinki diambu meluta mfunu yina ketindaka beto beto bongisa nzutu? Tanga Nkunga 47:2, mpe na manima tadila biuvu yayi:
-
Kuzaba ti beto kemonikisaka Yehova, yinki mutindu yalenda vuanda na bupusi na mvuatulu na beto?
-
Nge mekanisa ti yakele mbote kutadila mvuatulu na beto ntangu beto mekuenda na balukutakanu mpe na kisalu ya kusamuna? Samu na yinki, to samu na yinki ve?
5. Mutindu ya kusala bansodolo ya mbote na diambu metadila mvuatulu mpe munzele
Ata kana bilele na beto kele ya ntalu mingi to ve, yafueti vuanda bunkete mpe yina mebonga na kutadila kisika to diambu yina beto kena kusala. Tanga 1 Bakorinto 10:24 mpe 1 Timoteo 2:9, 10. Mpe na manima, tadila samu na yinki beto kezolaka kumanga bilele yina . . .
-
kele ya yimbi to yina kele plina-plina.
-
kena kukanga nzutu, kumonisa bitini yankaka ya nzutu, to yina kelamusaka bansatu ya kusangisa nzutu.
Atako Baklisto kele na yinsi ya minsiku ya Mose ve, kasi minsiku yango kemonisaka mabanza ya Yehova. Tanga Kulonga 22:5, mpe na manima tadila kiuvu yayi:
-
Samu na yinki beto fueti manga mvuatulu yina kekumisaka babakala lokola banketo to banketo lokola babakala?
Tanga 1 Bakorinto 10:32, 33 mpe 1 Yoane 2:15, 16, mpe na manima tadila biuvu yayi:
-
Samu na yinki beto fueti tadila kana mvuatulu na beto kena kubudisa bantu dibaku na kisika beto kevuandaka to na kimvuka?
-
Yinki mitindu ya mvuatulu to ya kusala munzele kele na kisika nge kevuandaka?
-
Nge mekanisa ti mitindu yankaka ya mvuatulu bonga ve samu na Baklisto? Samu na yinki, to samu na yinki ve?
Beto kele na dikoki ya kuvuata mpe kubongisa nzutu na mitindu mingi mpe kusepedisa kaka Yehova
BANTU YANKAKA METUBA: “Mukele na yinsua ya kuvuata konso kima munu zola.”
-
Nge mendima yau? Samu na yinki, to samu na yinki ve?
BUNKUFI
Ntangu beto kesalaka bansodolo ya mbote na mvuatulu, beto kemonisaka luzitu na Yehova mpe na bantu yankaka.
Mvutukulu
-
Samu na yinki mvuatulu to munzele na beto na ntuala ya bantu kele mfunu samu na Yehova?
-
Yinki ndambu ya bansikudukusu yina fueti tuadisa banzengolo na beto samu na mutindu ya kubongisa nzutu?
-
Yinki mutindu kubongisa nzutu na beto lenda tinda bantu yankaka na nsambudulu ya kedika?
SOSA
Tala yina bantu kekanisa samu na nge ntangu bakena kumona mvuatulu na nge.
“Namonanaka ndenge nini na miso ya bato?” (Disolo na Internet)
Longuka samu na yinki yakele nduenga kukanisa tekila nge tula kashe to tatuwaje na nzutu.
“Biblia elobi nini na likambo ya kosala mayemi na nzoto?” (Disolo na Internet)
Tadila bansikudukusu yankaka yina lenda tuadisa banzengolo na beto.
“Elateli na yo ekumisaka Nzambe?” (Linɔngi ya Mosɛnzɛli ya Septembre 2016)
Yinki nketo mosi ya ntima mbote salaka samu na kuvuanda na bukatikati na mutindu na yandi ya kutadila mvuatulu ya bantu yankaka?
“Nazalaki kokanisa ete kosala monzɛlɛ ezali mabe na miso ya Nzambe” (Lamuká! ya 22 Décembre 2003)
