Kina kia 11 kia ngonde ya Novemba, 1918, e Vit’antete ya Nz’amvimba yafokoka. Makompani makangama, wantu bavaika muna nzila yo kina ye kiese kiawonso. Kansi, e kiese kiau ke kiazingila kolo kiayingi ko. Vabwa diaka sumbula kiatwasa e mpasi vioka zina za vit’antete ya nz’amvimba.

Vuku kimosi kiayikilwanga vo gripe Espanhola kiasambukila makesa kuna França muna ngonde a Yuni ya mvu wa 1918. E kimbevo kiaki kia vonza kikilu kiakala. Muna bonga e nona, muna ngonde zakete e kimbevo kiaki kiavonda makesa mayingi ma América kuna França vioka ana bafwa muna vita. Makesa ana bavutuka muna nsi zau banata kimbevo kiaki yo sambukisa kio mu nzaki mu nza yawonso.

Muna mvu mialanda, e nzala ye usukami wawokela. Ayingi muna nsi za Mputu bafwanga e nzala vava vita yafokoka muna mvu wa 1918. Muna mvu wa 1923, nzimbu za Alemanha ke zakala diaka mfunu ko. Vioka mvu 6, e nza yawonso yakota mu mpasi. Muna mvu wa 1939, e vit’anzole ya nz’amvimba yayantika. Ekuma sumbula yayi yabwila?

O ungunza wa Nkand’a Nzambi ukutusadisanga mu zaya e kuma mambu mampasi  mebwilanga musungula Vit’antete ya Nz’amvimba. Yesu Kristu wasakula e ntangwa ina ‘zula yadi telamena zula’ ye una nzala ye vuku yadi fwasila e nza. (Matai 24:3, 7; Luka 21:10, 11) Wavovesa alongoki andi vo e sumbula yayi yadi kala se sinsu kia lumbu yambaninu. Nkand’a Lusengomono usonganga mpe vo mambu makaka mampasi mebwanga va ntoto i mu kuma kia vita yanwanwa kun’ezulu.—Tala babu  “Vita Kun’ezulu ye Vita ova Ntoto.”

O nkanda wau uyikanga mpe anati yá a mvalu. Atatu muna anati awaya, sumbula ina Yesu kateka sakula besunzulanga i sia vo, vita, nzala ye vuku. (Tala e babu  “Nga Anati Yá a Mvalu mu Diata Kikilu Bena?”) Dialudi, e vit’antete yatwasa mpasi ke zifokokanga ko. Nkand’a Nzambi usonganga vo Satana i tuku dia mpasi zazi zawonso. (1 Yoane 5:19) Nga o nkum’a Satana usinga sukiswa?

Nkand’a Lusengomono usonganga ziku vo Satana “kolo kiandwelo kaka kena kiau.” (Lusengomono 12:12) I kuma kenena ye makasi ye otwasanga mpasi zayingi va nza. E sumbula ibwanga  isonganga e ziku vo ntangwa ya Satana mu fokoka ina.

E Vit’antete ya Nz’amvimba yasoba lusansu lwa wantu. Vita yayi yawokesa vita zakaka, ntantani yo kondwa kwa vuvu muna ayadi a nza. Isonganga mpe ziku vo Satana wayingwa kun’ezulu. (Lusengomono 12:9) Satana una nze nyadi a ntim’a mbadi on’ozeye vo lumbu yandi mu fokoka ina. Vava lumbu yayi ifokoka, e mpasi zina zayantika muna Vit’antete ya Nz’amvimba zifokoka mpe.

Mun’owu wa ungunza wa Nkand’a Nzambi, olenda bunda vuvu muna Yesu Kristu wa Ntinu eto ezulu ona ‘ofwasa mavangu ma Nkadi ampemba’ ke kolo ko. (1 Yoane 3:8) O unu, wantu ayingi besambanga vo Kintinu kia Nzambi kiza. Nga ngeye mpe olombanga e sambu kiaki? Muna lusadisu lwa Kintinu kiaki, o luzolo lwa Nzambi luvangama ova ntoto. (Matai 6:9, 10) Muna Kintinu kia Nzambi, e vita zawonso zifokoka. (Nkunga 46:9) Zaya diaka makaka mu kuma kia Kintinu yo zinga omu nza vava izala yo luvuvamu.—Yesaya 9:6, 7.