Lwaki Abantu Tebasobola Kuleeta Mirembe gya Nnamaddala?
Bayibuli ky’egamba
Abantu balemereddwa okuleetawo emirembe era tebajja kusobola kuleeta mirembe gya nnamaddala. Lwaki?
“Omuntu talina buyinza kuluŋŋamya bigere bye.” (Yeremiya 10:23) Abantu tebaatondebwa na busobozi bwa kwefuga bokka, n’olwekyo tebasobola kuleeta mirembe gya nnamaddala.
“Temwesiganga bafuzi, oba omuntu omulala yenna atasobola kulokola. Omukka gwe gumuvaamu, n’addayo mu ttaka; ku lunaku olwo ebirowoozo bye ne bisaanawo.” (Zabbuli 146:3, 4) Abafuzi abantu obuntu, nga mw’otwalidde n’abo abalina ebigendererwa ebirungi, tebasobola kumalirawo ddala ntalo.
“Mu nnaku ez’enkomerero, ebiseera biriba bizibu nnyo. Kubanga abantu baliba . . . bakambwe, nga tebaagala bulungi, nga ba nkwe, nga bakakanyavu, nga beegulumiza.” (2 Timoseewo 3:1–4) Tuli mu “nnaku ez’enkomerero,” ekiseera omuli ebintu ebitasobozesa mirembe gya nnamaddala kubaawo.
“Zisanze ensi n’ennyanja, kubanga Omulyolyomi asse gye muli, ng’alina obusungu bungi ng’amanyi nti alina akaseera katono.” (Okubikkulirwa 12:12) Sitaani Omulyolyomi, omulabe wa Katonda, yasuulibwa ku nsi era aviiriddeko abantu okukola ebikolwa eby’obukambwe. Nga Sitaani akyafuga ensi eno, ensi tesobola kubaamu mirembe.—Yokaana 12:31.
“[Obwakabaka bwa Katonda] bulibetenta era bulizikiriza obwakabaka [obuziyiza Katonda], era bwo bwokka bwe bulibeerawo emirembe n’emirembe.” (Danyeri 2:44) Obwakabaka bwa Katonda, so si gavumenti z’abantu, bwe bwokka obujja okuleeta emirembe egya nnamaddala.—Zabbuli 145:16.